LITULN 3

1Daalbaadaal tikur titaa, le Piita ni Jɔnn buen Uwumbɔr aadichal ni. Ni nan ye mmeen yoonn le nima. 2Uja ubaa le nan bi nima. U ye uwɔb la. Baah nan ma u na, u po ye uwɔb la. Idaa mɔmɔk bi yoor u nan kaan Uwumbɔr aadichal aabisamɔb. Bi yi mbisamɔb ngbaan ke "Mbisamɔb nyaan." Bi yoor u di siin, un mee binib bi koo ni Uwumbɔr aadichal ni na, ke bin tii u ŋimombil. 3Le u kan Piita ni Jɔnn koo ni Uwumbɔr aadichal ni. Waah kan bi na, le u mee bi ke bin tii u tiwan. 4Le Piita ni Jɔnn lik u. Le Piita bui u, "Lik timi." 5Le u lik bi, ki dak ke bi ga tii u tiwan la. 6Le Piita bui u, "Maa kpa ŋimombil. M ga tii si maah kpa ni na la. Yesu Kristo u ye Nasaret aatiŋ aanii na aayimbil pu, m tuk si, fii chuun." 7Le Piita chuu uŋaaŋgii, ki fiin u. Le u fii sil. Libuul ngbaan ni, le utaagbin pɔɔk a. 8Le u fii yuk, le ki sil utaa pu, ki piin ki chuun gonni, le ki dii bi, ki koo ni Uwumbɔr aadichal ni, ki chuun, ki yukr, ki pak Uwumbɔr. 9Le kinipaak mɔmɔk kan u chuun ki pak Uwumbɔr. 10Le bi bee ke u ye uwanmeer u ba ka Uwumbɔr aadichal aabisamɔb nyaan na. Waah pɔɔk na, le ni gar bi pam. 11Le uja ngbaan aah laa joo Piita ni Jɔnn na, le binib ngbaan mɔmɔk san buen bi chee kikaakpaak kibaa ni, bi yi ki ke "Solomon aakaakpaak." Ni gar bi pam. 12Tɔ, Piita aah kan bi na, le u baa bi, "Israel yaab, ba pu ni gar nimi? Ba pu ni lik timi kena? Ni dak ke ni ye tibaa aapɔɔn le cha uja wee pɔɔk aa? Ni dak ke ni ye timi aabimbin mu bi chain na pu uu? Naa ye. 13Uwumbɔr le cha u pɔɔk. Abraham ni Aisak ni Jakob Aawumbɔr, u ye tiyajatiib Aawumbɔr na, u nyuŋ Waabo Yesu la. Nimi le nan di Yesu di kooh, le ki yii u Pailat chee. Pailat nan ban un di u di lii. Le naa kii. 14Yesu le ye unii u Uwumbɔr lee u na, ki ye uninyaan na. Le ni yii u, ki bui Pailat ke un di unikur di lii. 15Ni ku Yesu u tii timi limɔfal na. Le Uwumbɔr fikr u nkun ni. Timi le ye waasiiraadam ke u fikr nkun ni a. 16Ni kan uja wee, ki bee u la. Yesu aayimbil le kpa mpɔɔn, le ki teb u. Taah ŋa Yesu aayimbil naadii pu na, nima le cha uja ngbaan pɔɔk. Taah gaa Yesu ki kii na, le u tii uja ngbaan laafee mbamɔm, ki cha u sil ninimbil ni. 17"Nnaabitiib, m nyi ke ni ni nimi aaninkpiib aah ku Yesu pu na, naa nyi naah tun lituln li na. 18N-yaayoonn na, Uwumbɔr nan cha waabɔnabtiib mɔmɔk len ke Waanileekoo Kristo ga nan ji falaa. Baah len pu na, le Uwumbɔr cha ni ŋa kena. 19Nima pu na, kpeln nimi aabimbin man, ki dii Uwumbɔr aasan. Ni yaa ŋa kena kan, Tidindaan Uwumbɔr ga di cha pinn nimi aatunwambir, ki tii nimi lifuur, 20ki ki tun ni Yesu ni chee, ni ŋmar. Uma le ye Kristo, u Uwumbɔr lee u na. 21Uma Yesu le ga li bi Uwumbɔr do ki ti saa n-yoonn mu Uwumbɔr ga toor tiwan mɔmɔk na. N-yaayoonn na, Uwumbɔr aabɔnabtiib bi bi chain na, nan len tibɔr timina. 22Uwumbɔr aabɔnabr Moses nan len ke, 'Tidindaan Uwumbɔr ga tun ni ubɔnabr ubaa ni chee, ke waah tun ni mi pu na. U mu ga li ye ninaabitiib ponn ni ubaa la. Li keei man, waah ga len tibɔr ti na mɔmɔk. 23Unii umɔk kaa kii ubɔnabr ngbaan aah ga len pu na kan, Uwumbɔr ga yakr u, ki nyan ni u waanib ponn ni, ki ku u.' 24Uwumbɔr aabɔnabtiib bimɔk nan len tibɔr na, Samuel ni bibɔnabtiib bi mu paan u pu na, bi mu nan len tibɔr timina. 25Nimi le ye bibɔnabtiib ngbaan aayabitiib. Uwumbɔr nan puu tipuul tii niyajatiib. Nimi le yeh tipuul ngbaan. Uwumbɔr nan tuk Abraham ke u ga ŋa tinyoor ŋinibol ŋimɔk bi dulnyaa wee ni na pu, uma Abraham aayabil pu. 26Nima pu na Uwumbɔr nan lee Waabo, ki nan tun ni u ni chee njan, ke u nan ŋa nimi tinyoor; u cha ni di cha nimi aatunwambir; tinyoor ngbaan le na."

will be added

X\