LITULN 28

1Taah nyan nnyun ngbaan ni na, le bi tuk timi ke bi yi lidikl ngbaan ke Malta. 2Le kitiŋ ngbaan aanib gaa timi ki ŋa timi tiŋann pam. Le utaal piin ki bi nu, le tiwoor bi. Le bi tuur mmii ki tii timi. 3Le Pɔɔl ti peeni idɔ, le ki nan di ŋa mmii ni. Le waah di ŋa mmii ni na, le idɔ na tɔŋ. Le uwaa nyan idɔ na ni, le ki juu dab uŋaal, le ki jɔn. 4Waah juu dab uŋaal ki jɔn na, le kitiŋ ngbaan ponn ni aanib kan, le ki bui tɔb ke uja ngbaan ye unikur la, le ki nyan ni nnyusaakpem na ni; Uwumbɔr mu aan cha u ŋmar. 5Le Pɔɔl gbak, le uwaa na lir mmii ni. Naa ŋa u nibaa. 6Bi dak ke ni ga duun la, ni yaa kaa ye kena kan, u ga kpo. Bi lik ni yunn, ki mu aa kan nibaa ŋa u. Le bi ki dak ke u ye liwaal la, le ki kpaln unii. 7Tɔ, kitiŋ ngbaan aanib aaninkpil mu nan bi. Bi yi u ke Publius. Le waasaak aa daa taah bi nin chee na. Le u gaa timi, le ki chann timi tichann ki ŋa timi tibulchin iwiin itaa. 8Le ute bun, ki dɔ kidiik ni. Le uwon ton, le u peel nsin. Le Pɔɔl koo u chee kidiik ni, le ki mee Uwumbɔr tii u, le ki di uŋaal paan u pu, le ki teb u. 9Pɔɔl aah ŋa kena na, le bibum biken bi bi lidikl ngbaan aatiŋ ni na mu dan Pɔɔl chee, le u teb bi mu. 10Le bi tii timi ipiin pam. Le taah ban ti buen na, le bi ki tii timi, timi aasachuln aapiin. 11Le ti nan bi nima iŋmal itaa. Le buŋɔb bubaa nan bi nima tiwoor ni libuln yoonn. Bu nyan ni kitiŋ kibaa ni, bi yi ki ke Aleksandria. Bi yi buŋɔb ngbaan ke "Bijaam." Le ti koo buŋɔb ngbaan ni, ki buen. 12Le ti fuu kitiŋ kibaa ni, bi yi ki ke Sirakus, le ki bi nima iwiin itaa, 13le ki nyan nima, le ki buen, le ki fuu kitiŋ kibaa ni, bi yi ki ke Regium. Le ki woln kitaak, le libuln nyan ni tipuwɔb, ki daar choo. Le ti nyan nima, le ki buen. Iwiin ilee le ti ti fuu kitiŋ kibaa ni, bi yi ki ke Puteoli. 14Le ti kan Yesu aanib bibaa nima. Le bi gaŋ timi ke ti li bi bi chee iwiin ilule. Iwiin ilule aah jer na, le ti chuun kitiŋ buen Rom aatiŋ ni. 15Le Yesu aanib bi bi Rom aatiŋ ni na ŋun ke ti choo. Le bi tooh ni timi nsan pu. Le bibaa tooh ni timi Apius Aanyaŋ ponn ni, le bibaa mu tooh ni timi Tidir Daakaan Titaa na chee. Le Pɔɔl aah kan bi na, le u doon Uwumbɔr, le ki kan lipoobil. 16Tɔ, le ti fuu Rom aatiŋ ni. Taah fuu nima na, le bi cha Pɔɔl koo kidiik kibaa ni, le suja ubaa si kii u. 17Le iwiin itaa jer. Le Pɔɔl yin Juu yaab aaninkpiib ke bin kuun ni u chee. Baah kuun ni u chee na, le u bui bi, "Nnaabitiib, maa ŋa timi aanib bakaa, kaa bii tiyajatiib aakaal. Bi po chuu mi Jerusalem le ki di ŋa Rom yaab aaŋaal ni. 18Le bi ji mi tibɔr, le ki bee ke maa ŋa bakaa, naa ŋeer bin ku mi. Le bi ban ke bin di cha mi. 19Le Juu yaab aa kii ke bin di cha mi. Nima pu na, le m len ke m ban ke Ubɔrkpaan Siisa le ji mi tibɔr ngbaan. Naa ye ke m ban ke m galn maanib u chee. 20Tibɔr ngbaan pu, le m yin nimi ke ni dan m chee, aan ti len ti. Timi Israel yaab kpa limakl ke Uwumbɔr Aanileekoo Kristo ga dan. Uma le pu, le bi buu mi tikululn tee." 21Le bi bui u, "Judea aatiŋ aanib aa ŋmee saabɔr kigbaŋ ki tii ni timi. Tina aabo ubaa aa nyan ni nima, ki nan tuk timi saabɔr, kaa len tibɔbil aa pu. 22Ti bee ke ntim mɔmɔk ponn ni, bi len ke Yesu aasan aa ŋan. Nima pu na, le ti ban ti ŋun tibɔr ti bi aamɔb ni na." 23Le bi siin bundaln bi ga ki kuun Pɔɔl chee na. Le leyaadaal aah fuu ni na, le bi ki kuun waadiik ni, ki wiir pam. Le kichakpiik ni le u len bi chee, le ki nan saa kijook, ki tuk bi Uwumbɔr aanaan aabɔr, ke Moses ni Uwumbɔr aabɔnabtiib nan ŋmee Yesu aabɔr Uwumbɔr aagbaŋ ponn ni. Le Pɔɔl pɔɔni ubaa ke bin gaa Yesu ki kii. 24Le Juu yaab bibaa kii tii waah len pu na, bibaa mu aa kii tii. 25Le bi kpak tɔb kinikpakpak. Baah ban bin nyan Pɔɔl aadiik ni na, le u bui bi, "Uwumbɔr Aafuur nyaan nan cha waabɔnabr Aisaya tuk niyajatiib mbamɔn. 26U tuk Aisaya ke 'Li cha ti tuk binib ngbaan ke Uwumbɔr len ke ni ga ŋun ki ŋun, kaan bee maaliin aatataa. Ni ga lik ki lik, kaan li waa. 27Binib ngbaan aatafal pɔɔ. Bitafal kpaa la. Bi ŋub binimbil. Baa ban ke binimbil li woln, kaa ban ke bitafal ŋun, kaa ban ke bisui bee maaliin aatataa, kaa ban ke bin kpeln baabimbin ki dii maasan, aan m teb bi."' 28Le Pɔɔl ki bui bi, "M ban ke ni bee ke Uwumbɔr tun mi ke m buen binib bi kaa ye Juu yaab na chee, ki ti tuk bi waabɔr, aan bi mu ŋmar. Bima le ga ŋun." 29Pɔɔl aah len kena na, le Juu yaab ngbaan nyan waadiik ni, le ki beenin kpak tɔb kinikpakpak saakpen.] 30Le Pɔɔl nan bi kidiik ponn ni ŋibin ŋilee. U pai kidiik ngbaan pu, le ki bi ni ni. Le binib dan nan mann u nima. Le u gaa bi mɔmɔk ni mpopiin. 31Le u beenin tuk binib Uwumbɔr aanaan aabɔr, ni Tidindaan Yesu Kristo aabɔr. Le u kpa lipoobil ki len. Ubaa mu aa bui ke un di cha.

will be added

X\