LITULN 26

1Tɔ, le Ubɔr Agripa bui Pɔɔl, "Aa ga ŋma tuk timi saabɔr aah bi pu na." Le Pɔɔl yoor uŋaal ki doon u, le ki len ke, 2"Ubɔr Agripa, maah bi du din m tuk si maabamɔn na, m kpa mpopiin pam. Juu yaab galn mi saakpen a. 3M nyi ke aa bee Juu yaab aakaal aah bi pu na. Aa nyi baah kpak tɔb budabu pu baakaal pu na. Kena pu na, maah kpa nsan m tuk si maabamɔn pu na, le m kpa mpopiin saakpen. M gaŋ si ke aa li kpa limɔr ki li pel maah ga len pu na. 4"Maah nan ye unachipɔɔn na, m nan bi maanib ponn ni, ni Jerusalem ponn ni. 5Juu yaab mɔmɔk nyi maabimbin n-yoonn ngbaan. Bi nyi ke n-yoonn ngbaan mɔmɔk m nan dii Farisii yaab aasan. M nan ye bin dii Moses aakaal mbamɔm na ponn ni ubaa la. Bi yaa gee kan, bi ga ŋma tuk si kena. 6M kpa limakl ke Uwumbɔr ga gbiin tipuul ti u nan puu ki tii tiyajatiib na. Nima le cha ni ji mi tibɔr din. 7Timi Juu yaab aanibol kipiik ni ŋilee dooni Uwumbɔr kinyeek ni nwiin pu, ki mu kpa limakl ke bi ga kan tipuul ngbaan. Ubɔr Agripa, m mu kpa limakl ngbaan, nima le cha Juu yaab galn mi. 8Nimi Juu yaab, ba pu ni dak ke Uwumbɔr aan ŋma fikr binib nkun ni? 9"N-yoonn mbaa min mbaa nan dak ke ni ŋan ke m pɔɔk mbaa ki bii Yesu u ye Nasaret aatiŋ aanii na aayimbil. 10Le m nan ŋa kena Jerusalem ponn ni. M nan buen Uwumbɔr aatotoorninkpiib chee, bin tii mi nsan m chur Uwumbɔr aanib di ŋa tiyondir ni. Juu yaab yaa nan len ke bi ga ku bi kan, m mu nan keei la. 11N-yoonn mɔmɔk m nan cha mmeen aadir ni ki dar bitafal, ki mukr bi ke bin sii Yesu. M nan gee liŋuul saakpen bi pu; nima pu na le m nan buen ntim muken ponn ni, ki ti ŋa bi falaa." 12"Le Uwumbɔr aatotoorninkpiib nan tii mi nsan ke m chuu Yesu aanib bi nan bi Damaskus aatiŋ ni na. Le m nan buen nima. 13Ubɔr Agripa, maah nan bi Damaskus aasan pu na, ki cha nima, le nwiin kaasisik ni, le nwiihn nyan paacham, ki wiin jer nwiin, ki woln ki mann gonn m ni bijab bi dii na. 14Le ti mɔmɔk lir kitiŋ. Le m ŋun nneel len Juu yaab aaliin ponn ni, 'Sɔɔl, Sɔɔl, ba ŋa aa ŋa mi falaa? Ni pɔɔ aa di aataal lee ikokon.' 15Le m baa u, 'Ndindaan, ŋmaa ye?' Le u bui mi, 'Min le ye Yesu u aa ŋa u falaa na. 16Fii sil. M dan aa chee, ke m lee si aa tun maatuln, ki li ŋani siiraa, ki tuk binib saah kan mi pu na, ki tuk bi maah ga mɔk si n-yoonn mu choo na pu na. 17M ga nyan si Juu yaab aaŋaal ni, ni bin kaa ye Juu yaab na aaŋaal ni, ki cha aa buen bi chee, 18aa ti tuk bi maaliin, ki cha binimbil woln, ki nyan bi mbɔmbɔɔn ni, ki cha bi li bi nwiihn ni, ki nyan bi Kinimbɔŋ aaŋaal ni, ki di bi ŋa Uwumbɔr aaŋaal ni, aan ki cha bi gaa min Yesu ki kii, aan Uwumbɔr di cha baatunwambir pinn bi, ki di lifaal tii bi ni binib bi ŋa chain na, baah gaa min Yesu ki kii pu na."' 19"Ubɔr Agripa, Tidindaan aah nyan paacham ki cha m kan u pu na, le m kii waamɔb. 20Njan, m tuk binib bi nan bi Damaskus aatiŋ ni na, ke bin kpeln baabimbin, ki dii Uwumbɔr aasan, ki tun lituln li ga mɔk ke bi sil kpeln baabimbin na. Njan m nan tuk bi kena Damaskus aatiŋ ni, le ki nin buen Jerusalem, le ki nin bɔɔ dii Judea aatim mɔmɔk ponn ni, le ki nin buen bin kaa ye Juu yaab na aatim ponn ni, ki tuk bi mu kena. 21Nima pu, le Juu yaab chuu mi Uwumbɔr aadichal ni, ki ban bin ku mi. 22Le Uwumbɔr mu ter mi n-yoonn mɔmɔk ki nan saa din, le ki cha m si du, ki ye waasiiraadaan, ki tuk binib aaboŋ mɔmɔk waabɔr. M po tuk bi Uwumbɔr aabɔnabtiib ni Moses aah nan len pu na. Bi nan len tiwan ni ga ŋa na, 23ke Kristo ga nan ji falaa, ki li ye unii u ga puen fikr nkun ni na, ki tuk Juu yaab ni bin kaa ye Juu yaab na tibɔr ti ga woln binimbil na." 24Pɔɔl aah len kena na, le Festus teen, "Pɔɔl, aa ye uwaar la. Saah bae mbaen saakpen na, le cha aa waar." 25Le Pɔɔl bui u, "Ubɔr Festus, maa ye uwaar. Maah len pu na, ni ye mbamɔn la. Naa ye uwaar aaliin. 26Ubɔr Agripa nyi tibɔr ngbaan la. Nima pu, le m len unimbiin ni, ni lipoobil. M bee ke u nyi tibɔr timina, tibaa aa bɔr u. Tibɔr ngbaan nan ŋa binib aanimbil ni la. 27Ubɔr Agripa, aa gaa Uwumbɔr aabɔnabtiib aah nan len pu na ki kii ii? M bee ke aa gaa kii la." 28Le Agripa baa Pɔɔl, "Aa dak ke naa pɔɔ m ŋa Kristo yoo la aa?" 29Le Pɔɔl bui u, "M mee Uwumbɔr ke ni pɔɔye naa pɔɔye, aa ni binib bimɔk pel maah len pu dandana wee na, ŋa Kristo yaab ke min na. M mu aa ban ke bi buu nimi tikululn, ke min na." 30Le Ubɔr Agripa, ni Ubɔr Festus, ni Beniis, ni binib bi ka bi chee na, fii nyan lipaal. 31Baah nyan lipaal na, le bi bui tɔb, "Uja ngbaan aah ŋa pu na, naa ŋeer ti ku u, kaa ŋeer ti di u ŋa kiyondiik ni." 32Le Agripa bui Festus, "Uja ngbaan yaa kaa ba len ke u ban ke Ubɔrkpaan Siisa ji u tibɔr kan, ti ba ga ŋma di u lii."

will be added

X\