LITULN 24

1Le iwiin iŋmu jer. Le Uwumbɔr aatotoorninkpil Ananias dan Siisarea aatiŋ ni. Le Juu yaab aaninkpiib bibaa ni looya ubaa dii u. Bi yi looya ngbaan ke Tetulus. Le bi sil Ubɔr Feliks aanimbiin ni, le ki bii Pɔɔl. 2Le bi yin Pɔɔl ke un dan. Waah fuu ni na, le Tetulus piin ki bi bii u, le ki bui Ubɔr Feliks, "Timi aaninkpil, ti pak si. Aa joo timi ni ŋan, ki cha timi aatiŋ kee mɔ. Aa kpa nlan, ki ter timi aanib saakpen. 3Ti mɔmɔk bee saah ŋani pu na, ki doon si mbamɔm. 4Maan len tibɔr ti li wiir. Maa ban ke ni ŋun si. Pɔɔn aabaa, ki li pel maah ban m len pu na. 5Ti bee ke Pɔɔl muk binib saakpen a. U muk Juu yaab bi bi dulnyaa wee mɔmɔk ni na, ki cha bi ŋma tijar. Binib bibaa bi, ki dii Yesu u ye Nasaret aatiŋ aanii na aasan. Pɔɔl ye bi ponn ni aaninkpil ubaa la. 6U nan ban un bii Uwumbɔr aadichal. Nima pu na le ti chuu u. Ti nan ban ti ji u tibɔr timi aakaal aah dii pu na. 7Le sujatiib aapor Laisias dan nan nyan u mpɔɔn ti chee, 8le ki tuk binib bi galn u na, ke bi li choo aa chee, ki nan len waah ŋa pu na. Aa yaa jin u tibɔr ngbaan kan, aa mamaŋ ga bee tibɔr ngbaan aah bi pu na." 9Tetulus aah len pu na, le Juu yaab kpaan kii, ke ti gbii. 10Le Feliks yoor uŋaal ki tii Pɔɔl, ke un len. Le Pɔɔl bui ke, "M bee ke aa joo maanib ngbaan ŋibin pam. Kena pu na le m kpa mpopiin ki tuk si maabamɔn. 11M nan buen Jerusalem m ti doon Uwumbɔr. Naa jer iwiin kipiik ni ilee. Aa ga ŋma baa binib ke ti gbii aan taa gbii. 12Maah nan bi Uwumbɔr aadichal ni na, ni mmeen aadir ni na, ni kitiŋ ni na, Juu yaab aa kan mi m kpak unii ubaa kinikpakpak, kaa kan mi m muk unii ubaa. 13Bi bii mi la, ki mu aa ŋma mɔk ke baah len pu na ti gbii. 14M kii ke ti gbii ke maah dooni tiyajatiib Aawumbɔr pu na, m dii Yesu aasan la. Juu yaab len ke nsan ngbaan aa ye mbamɔn. M kii Moses aakaal mɔmɔk mu, ki kii tii Uwumbɔr aabɔnabtiib aah nan ŋmee pu na mɔmɔk. 15M kpa limakl ke Uwumbɔr ga fikr binib mɔmɔk, bin ŋan na, ni bin kaa ŋan na mɔmɔk, nkun ni. Juu yaab mu kpa limakl kena la. 16N-yoonn mɔmɔk m pɔɔni mbaa ke m taa li kpa taani Uwumbɔr chee ni binib chee. 17"Ŋibin ŋibaa le maa nan bi Jerusalem. Le m ki buen nima m ti tii maanib ŋimombil, ki toor kitork ki tii Uwumbɔr. 18M buen Uwumbɔr aadichal ni, m ti ŋa mbaa chain, aan ki toor kitork tii Uwumbɔr. Maah ŋa kena na, le Juu yaab kan mi Uwumbɔr aadichal ni. Kinipaak aa nan bi m chee. Kifuuk mu aa nan bi m chee. 19Le Juu yaab bibaa, bi nyan ni Asia aatim ni na, bi mu nan bi nima. Bi yaa kaa gee maah ŋa pu na kan, ni ŋan ke bima bibaa dan aa chee, ki nan tuk si maah ŋa pu na. 20Kooti ni aaninkpiib jin mi tibɔr Jerusalem ponn ni la. Bi yaa kan maataani kan, cha binib ngbaan tuk si. 21Maah nan si bi chee na, le m teen ke 'M pak ke Uwumbɔr ga fikr bin kpo na nkun ni. Nima pu le ni ji mi tibɔr din.' Maah len kena na, nibaakan bi dak ke naa ŋan." 22Le Feliks nyi Yesu aasan aabɔr. Le u bui bi, "M ga di cha kena la. Sujatiib aapor Laisias yaa fuu ni kan, le m ga lik maah ga ŋa tibɔr ngbaan pu na." 23Le u tuk sujatiib nkub aaninkpil ke u cha waasujatiib li kii Pɔɔl, ki taa joo u mpɔɔn, ki cha ujɔtiib ter u ki tii u waah ban pu na. 24Le iwiin ibaa jer. Le Ubɔr Feliks ni upuu Drusila fuu ni. Upuu nan ye Juu aabo. Le Feliks tun unii ke un ti yi ni Pɔɔl ke un dan nan len tibɔr ngbaan aan bi pel. Le Pɔɔl tuk bi baah ga ŋa pu ki gaa Yesu Kristo ki kii, 25ki ŋa bininyaan, ki li chur bibaa, ki taa tun titunwambir; ba pu? Uwumbɔr ga ji binib mɔmɔk tibɔr. Pɔɔl aah len kena na, le ijawaan chuu Feliks. Le u bui Pɔɔl, "Ni ŋeer aa di cha kena. M yaa kan mfaawom kan, m ga yin si." 26Le Feliks dak ke nibaakan Pɔɔl ga tii u ŋimombil, aan u piir u lii. Nima pu na, n-yoonn mɔmɔk kan, u ti yi ni u ki nan len u chee tibɔr. 27Le ŋibin ŋilee jer. Le ubɔr bi yi u ke Posius Festus dan nan leŋ Feliks aaleleŋ. Le Feliks ban un piir Juu yaab aasui. Nima pu na, waa nyan Pɔɔl kiyondiik ni. U cha u beenin pii, le ki buen.

will be added

X\