LITULN 23

1Le Pɔɔl lik bi le ki len ke, "Nnaabitiib, m bee nsui ni ke maabimbin le ŋan Uwumbɔr chee, le ki di nan saa din." 2Waah len kena na, le Uwumbɔr aatotoorninkpil Ananias tuk binib bi si Pɔɔl chee na ke bin faa umɔb. 3Le Pɔɔl bui u, "Uwumbɔr ga faa si. Aa bi ke ligoln li kaa ŋan, bi di pente pipiin di pente le na. Aa ka du, ke aa ji mi tibɔr nkaal aah dii pu na. Saah tuk binib ke bin gbaa mi na, sin le bii nkaal." 4Le binib bi si Pɔɔl chee na baa u, "Aa sii Uwumbɔr aatotoorninkpil la aa?" 5Le Pɔɔl len ke, "Nnaabitiib, maa nyi ke u ye Uwumbɔr aatotoorninkpil. M yaa ba nyi kan, maa ba ga len kena; ba pu? ni ŋmee Uwumbɔr aagbaŋ ni ke, 'Taa sii saanib aaninkpil."' 6Tɔ, le Pɔɔl bee ke bi ponn ni bibaa ye binib bi dii Sajusii yaab aamɔkm na, bibaa mu ye binib bi dii Farisii yaab aamɔkm na. Le u teen, "Nnaabitiib, m ye unii u dii Farisii yaab aamɔkm na la. Nte mu nan ye unii u dii Farisii yaab aamɔkm na la. M kpa limakl ke binib bi kpo na ga fikr nkun ni. Limakl ngbaan pu, le bi ji mi tibɔr." 7Waah len kena na, le binib bi dii Farisii yaab aamɔkm na, ni binib bi dii Sajusii yaab aamɔkm na, bi yakr tɔb chee, ki kpak tɔb kinikpakpak. 8(Sajusii yaab len ke binib aan fikr nkun ni, ke Uwumbɔr aatuuntiib aa bi, ke unii aawiin mu aa bi. Farisii yaab len ke binib ga fikr nkun ni, Uwumbɔr aatuuntiib bi, unii aawiin mu bi.) 9Le bi kpak tɔb kinikpakpak, ki teeni mpɔɔn pu, le ki kpa kifuuk. Le Uwumbɔr aakaal aamɔmɔkb ponn ni bibaa, bi ye Farisii yaab na fii sil, le ki kpak saakpen, le ki len, "Taa kan uja wee aataani. Nibaakan Uwumbɔr aatuun bee unii aawiin sil len u chee." 10Le Farisii yaab ni Sajusii yaab kpak tɔb kinikpakpak saakpen, ki ŋma tijar. Le sujatiib aapor dak ke bi ga chuu daar par Pɔɔl. Le u tuk waasujatiib ke bin buen ti gaa ni Pɔɔl, ki nyan u bi chee, ki nan di ŋa baadichal ni. 11Kinyeek ngbaan, le Tidindaan si Pɔɔl chee, le ki bui u, "Chuu aabaa, ki taa san ijawaan. Saah tuk binib maabɔr Jerusalem ponn ni pu na, kena le aa ga tuk bi maabɔr Rom aatiŋ mu ni." 12Le ki woln kitaak kichakpiik ni, le Juu yaab bibaa kuun tɔb chee, le ki kpokl, le ki puu ke baan ji tijikaar kaan nyu nnyun see bi ku Pɔɔl. 13Binib bi nan kpokl kena na jer bijab imonko ilee. 14Le bi buen Uwumbɔr aatotoorninkpiib ni Juu yaab aaninkpiib chee, le ki bui bi, "Ti puu ke taan ji nibaa see ti ku Pɔɔl. 15Ti ban ke ni ni kooti ni aaninkpiib tun unii ke un buen sujatiib aapor chee, ki tuk u ke u li joo ni Pɔɔl ni chee, ke ni ban ni ki baa u tibɔr tiken kpee. Bi yaa joo u choo kan, waan pii ni du. Ti ga ku u nsan ponn ni." 16Le Pɔɔl aaninkpan aajapɔɔn ŋun baah kpokl pu na. Le u koo sujatiib aadichal ni, le ki tuk Pɔɔl. 17Le Pɔɔl yin sujatiib aaninkpil ubaa, le ki tuk u ke un di unachipɔɔn wee di buen sujatiib aapor chee, un ti tuk u tibɔr tibaa. 18Le uninkpil ngbaan di u buen sujatiib aapor chee, le ki bui u, "Unaagbiija Pɔɔl yin mi, ke m dan u chee, le ki tuk mi ke m di unachipɔɔn wee di dan aa chee, u nan tuk si tibɔr tibaa." 19Le upor ngbaan chuu uŋaal ki dar u ki di buen ngbaan, le ki baa u, "Aa ban aa tuk mi bayaa?" 20Le u bui u, "Juu yaab nan kpokl, ke bi ga tuk si ke aa fo li joo ni Pɔɔl kooti ni aaninkpiib chee, ke bi nan baa u tibɔr tiken kpee. 21Bi yaa bui si kena kan, aa taa kii. Bijab jer imonko ilee ga bɔr ki kiir Pɔɔl bin ti ku u. Bi mɔmɔk puu ke baan ji tijikaar kaan nyu nnyun, see bi ku u. Dandana wee bi gor a, ke bin ku u, ki kiir bin ŋun saah ga len pu na." 22Le sujatiib aapor bui unachipɔɔn ngbaan, "Taa ki tuk unii ke aa tuk mi tibɔr ngbaan," le ki cha u buen. 23Le upor ngbaan yin waasujatiib aaninkpiib ponn ni bilee, ke bin dan u chee, le ki tuk bi ke bin yoor sujatiib ikub ilee, ni bitaandam imonko itaa ni kipiik, ni sujatiib bi joo tikpaatuln na ikub ilee, bi li gor ki nan buen kinyeek ngbaan tikur tiwae Siisarea aatiŋ ni, 24ki pak itaan tii Pɔɔl un diŋ, ki di u buen Ubɔr Feliks chee, un nyan chakb, nibaa taa ŋa u. 25Le upor ngbaan ŋmee kigbaŋ bin ti tii Ubɔr Feliks. U ŋmee ke: 26"Min Klɔdius Laisias, m doon si Ubɔrkpaan Feliks. 27Juu yaab nan chuu uja wee, ki gbaa u bin ti ku u. M ŋun ke u ye Rom aanii la. Maah ŋun kena na, le m di sujatiib le ti ti nyan ni u, 28le ki kpaan di u buen Juu yaab aakooti ni aaninkpiib chee. M nan ban ke m ti bee baah len ke u ŋa pu na. 29Baah jin u tibɔr na, le m bee ke waah ŋa pu na, naa ŋeer ti ku u, kaa ŋeer ti di u ŋa kiyondiik ni. Baakaal pu, le bi galn u. Bi len ke u bii baakaal. 30Le unii ubaa tuk mi ke Juu yaab kpokl ke bin ti ku u. Maah ŋun kena na, libuul ngbaan ni le m tun ni u aa chee, le ki tuk binib bi galn u na, ke bin mu buen aa chee, ki tuk si waah ŋa pu na." Le u ŋmee doo. 31Tɔ, le sujatiib ngbaan ŋa baapor aah tuk bi pu na. Le kinyeek ngbaan, le bi di Pɔɔl ki di buen Antipatris aatiŋ ni. 32Le ki woln kitaak le sujatiib bi chuun kitiŋ na labr kun baadichal ni Jerusalem ponn ni. Le bitaandam cheen Pɔɔl buen Siisarea aatiŋ ni. 33Baah fuu nima na, le bi di kigbaŋ ngbaan di tii Ubɔr Feliks, le ki di Pɔɔl di kaan u chee. 34Le ubɔr ngbaan karn kigbaŋ ngbaan, le ki baa Pɔɔl, "Aa nyan ni kilatiŋ ni?" Le Pɔɔl mu bui u, "M nyan ni Silisia aatiŋ ni la." Waah ŋun ke u nyan ni Silisia aatiŋ ni na, 35le u bui u, "Binib bi galn si na yaa fuu ni kan, m ga ji si tibɔr." Le u tuk waasujatiib ke bin di Pɔɔl di ŋa lidichal li Ubɔr Herod nan maa li na ni, ki cha bi li kii u.

will be added

X\