LITULN 22

1U len ke "Ntetiib ni nnaabitiib, li pel man, ki cha m tuk nimi maabamɔn." 2Baah ŋun ke u len bima bibaa aaliin na, le bi sil chii. Le Pɔɔl len ke, 3"M ye Juu yaab aanii la. Bi nan ma mi Tasus aatiŋ ki bi Silisia aatiŋ ponn ni na. M nan bae mbaen Jerusalem du chee na la. Gamaliel le nan mɔk mi. M nan bae tiyajatiib aakaal mbamɔm. Nnimbil nan man Uwumbɔr aatuln pu, ke ni mɔmɔk aah bi pu dandana wee na. 4M nan ŋa binib bi dii Yesu aasan na falaa, ki ban m ku bi. M nan chuu bijab ni bipiib mpɔɔn, ki di buu tikululn, ki di ŋa tiyondir ni. 5Uwumbɔr aatotoorninkpil ni Juu yaab aaninkpiib ga ŋma tuk nimi ke m len mbamɔn la. Bi nan ŋmee kigbaŋ ki tii Juu yaab bi bi Damaskus aatiŋ ni na, ke bin tii mi nsan m ti chuu Yesu aanib bi bi nima na, ki di tikululn di buu bi, ki di dan Jerusalem, ke m nan daa bitafal. Le m nan buen." 6"Le m nan bi nsan ni ki ti peen Damaskus aatiŋ ni. Nwiin kaasisik ni, le nwiihn nyan paacham, ki woln ki mann gonn mi, ki wiin chain. 7Le m lir kitiŋ, le ki ŋun nneel len ke, 'Sɔɔl, Sɔɔl, ba ŋa aa ŋa mi falaa?' 8Le m baa u, 'Ndindaan, ŋmaa ye?' Le u bui mi, 'Min le ye Yesu u ye Nasaret aatiŋ aanii na. Aa ŋani mi falaa la.' 9Bijab bi si m chee na kan nwiihn ngbaan, kaa ŋun udaan u len m chee na aaneel. 10Le m baa u, 'Ndindaan, m ga ŋa kinye?' Le u bui mi, 'Fii sil ki buen Damaskus aatiŋ ni. Unii ubaa bi nima, ki ga ti tuk si tiwan nimɔk Uwumbɔr ban ke aa ŋa na.' 11Le nwiihn ngbaan aah deer nnimbil na, le m job, kaa ki waa. Le binib bi dii mi na dar mi di buen Damaskus aatiŋ ni. 12"Le uja ubaa nan bi nima, bi yi u ke Ananias. U dii Uwumbɔr aasan mbamɔm, ki kii timi aakaal la. Juu yaab bimɔk bi nima na pak u. 13Le u dan nan sil m chee ki bui mi, 'Nna aabo Sɔɔl, likr.' Libuul ngbaan ni, le m kpaan likr ki kan u, kaa ki ye ujoon. 14Le u bui mi, 'Tiyajatiib Aawumbɔr lee si, ke aa bee waageehn, ki kan Waabo nyaan, ki ŋun waaneel len aa chee. 15Aa ga li ye waasiiraadaan, ki tuk binib mɔmɔk saah kan pu na, ni saah ŋun pu na. 16Taa taan. Fiin, ki yi waayimbil ki mee u, ki cha m di si ki muin si nnyun ni, ki finn aapoobil saatunwambir pu."' 17"Nimina aah jer na, le m nan gir buen Jerusalem, le ki ti koo Uwumbɔr aadichal ni, le ki mee Uwumbɔr. Maah mee Uwumbɔr na, 18le m kan Tidindaan tidaŋ ponn ni. Le u bui mi, 'Fiin, ki nyan ni Jerusalem mala. Aa yaa tuk du chee na aanib maabɔr kan, bi ga yii, kaan gaa ti.' 19Le m bui u, 'Ndindaan, bi nyi ke m nan buen mmeen aadir ni, ki chuu binib bi gaa si ki kii na, ki gbaa bi. 20Binib aah nan ku saasiiraadaan Stiifen na, m mu nan bi nima, ki kii ke ni ŋan, ki joo binib bi ku u na aabɔkur la.' 21Le Tidindaan bui mi, 'Li cha. M ga tun si ni daa na, bin kaa ye Juu yaab na chee."' 22Pɔɔl aah len kena na, le kinipaak ngbaan aa ki pel. Le bi mɔmɔk teen mpɔɔn pu, "Ku u man. Naa ŋan ke u ki li bi dulnyaa wee ni." 23Le bi mɔmɔk tar, ki yoor baabɔkur ki feeni paacham, ki yoor titan ki mae paacham le kitangbaak fee. 24Le sujatiib aapor tuk waasujatiib ke bin yoor Pɔɔl ki di koo ni kidiik na ponn ni, ki gbaa u ŋinaalab, aan ki nin baa u waah ŋa budabu na, ke bin nyi budabu ŋa aan Juu yaab ŋma tijar u pu na. 25Le bi di tikululn buu u, bin ti gbaa u ŋinaalab. Le Pɔɔl bui sujatiib aaninkpil u si u chee na, "Naah ban ni gbaa mi na, nkaal na kii kena aa? Naa jin mi tibɔr, ki mu aa kan maataani. M ye Rom yaab aanii la." 26Uninkpil ngbaan aah ŋun kena na, le u buen upor ngbaan chee, le ki bui u, "Li nyi saah ga ŋa pu na. Uja na ye Rom aanii la." 27Le upor ngbaan buen Pɔɔl chee, le ki baa u, "Aa ye Rom aanii la aa?" Le Pɔɔl kii ke u ye. 28Le upor ngbaan bui u, "M nan pai ŋimombil pam, le ki kpaln Rom aanii." Le Pɔɔl bui u, "M ye Rom aabo la." 29Pɔɔl aah len kena na, le bijab bi ban bin gbaa u na aa ki kaar u, le ki sur bipuwɔb. Upor ngbaan aah bee ke Pɔɔl ye Rom aanii na, le u mu san ijawaan. U bee ke waah di tikululn buu u na, naa ŋan. 30Tɔ, le upor ngbaan ban un bee mbamɔm Juu yaab aah len Pɔɔl aah ŋa pu na. Le ki woln kitaak, le u chuu buur tikululn ti bi di buu Pɔɔl na, le ki tuk Uwumbɔr aatotoorninkpiib, ni kooti ni aaninkpiib mɔmɔk ke bin kuuni, le ki di Pɔɔl nan di siin binimbiin ni.

will be added

X\