LITULN 2

1Le Juu yaab aawiin nyaan daal mubaa fuu ni. Bi yi mu ke Pentekost daal. Le binib bi dii Yesu na mɔmɔk bi kidiik kibaa ni. 2Libuul ngbaan ni, le bi ŋun kifuuk nyan ni kitaapaak. Ni bi ke libuln pɔpɔɔl aah kpa kifuuk pu na ki gbiin lidichal li bi ka li ponn ni na. 3Le bi kan tiwan nibaa, ni bi ke imiigaal na, ki tɔŋ bi mɔmɔk aayil paab. 4Le Uwumbɔr Aafuur nyaan gbiin bi mɔmɔk. Le bi len iliin yaayan, Uwumbɔr Aafuur nyaan aah cha bi len pu na. 5N-yoonn ngbaan le Juu yaab bi Jerusalem. Bi ye binib bi pak Uwumbɔr na. Bi nyan ni ŋinibol mɔmɔk ponn ni dulnyaa wee ponn ni. 6Le bi ŋun Yesu aanib len iliin yaayan. Le bi kuuni nima, ki wiir. Le bi mɔmɔk ŋun bi len baaliin ibaabaa. Le ni muk bi nima chee, ki gar bi pam. 7Le bi bui ke "Bijab ngbaan bi len kena na, bi mɔmɔk ye Galilee aatiŋ aanib la. 8Bi ŋa kinye aan ki len timi aaliin aaboŋ kena? Ti ŋun bi len ti mɔmɔk aaliin ibaabaa la. 9Timi bibaa nyan ni Patia aatiŋ ni, bibaa mu nyan ni Media aatiŋ ni, bibaa mu nyan ni Elam aatiŋ ni, bibaa mu nyan ni Mesopotamia aatiŋ ni, bibaa mu nyan ni Judea aatiŋ ni, bibaa mu nyan ni Kapadosia aatiŋ ni, bibaa mu nyan ni Pontus aatiŋ ni, bibaa mu nyan ni Asia aatiŋ ni, 10bibaa mu nyan ni Frijia aatiŋ ni, bibaa mu nyan ni Pamfilia aatiŋ ni, bibaa mu nyan ni Ijipt aatiŋ ni, bibaa mu nyan ni Libia aatim mu bi Sairene aatiŋ chee na, bibaa ye Juu yaab, ni Biniyaayam bi kpaln bibaa ki dii Juu yaab aasan na, bi nyan ni Rom aatiŋ ni na, 11bibaa mu nyan ni Krete aatiŋ ni, bibaa mu nyan ni Arabia aatiŋ ni. Ti mɔmɔk ŋun bi len timi aaliin ki mooni Uwumbɔr aah tun lijinjiir aatun pu na." 12Le ni muk bi mɔmɔk, ki gar bi. Le bi baa tɔb, "Naatataa ye kinye?" 13Le bibaa mu ŋani bi mbɔɔnyun ki bui ke bi nyu ndaan le ki gbii. 14Le Piita ni Yesu aakpambalb kipiik ni ubaa fii sil. Le Piita len mpɔɔn pu, ki tuk kinipaak ngbaan, "Nnaabitiib, Juu yaab, ni nimi bimɔk bi Jerusalem na, ni li pel mbamɔm, ki ŋun maah ga len pu na. 15Ni dak ke binib ngbaan nyu ndaan gbii la. Baa nyu. Dandana, ni ye tikur tiwae kichakpiik ni la. Nima pu na, baa nyu ndaan. 16Baah len iliin yaayan pu na, ni ye Uwumbɔr aabɔnabr Joel aah nan len pu na. Joel nan len ke Uwumbɔr len: 17'N-yoonn mu choo na, m ga di Maafuur nyaan di ŋa binib mɔmɔk pu. Nijapɔɔteeb ni nibisatiib ga nabr Uwumbɔr aah len pu na. Nimi aanachipɔm ga kan lijinjiir aawan. Nimi aaninkpiib ga daŋ tidaŋ. 18N-yoonn ngbaan m ga nan di Maafuur nyaan ki di ŋa maanaagbiijab ni maanaagbiipiib pu, le bi ga nabr maah len pu na. 19M ga ŋa lijinjiir aatun kitaapaak ni, ni kitiŋ ni; nsin ni mmii ni iŋmanyu ga li bi; 20nwiin ga bɔln, uŋmal ga li mann ke nsin na, le ki waahr le Tidindaan Uwumbɔr aawiin daal nin fuu ni. Mu ga li ye nwiin saakpiin daal mu kpa liyimbil na. 21Leyaadaal ngbaan, unii umɔk mee Tidindaan na, uma le ga ŋmar."' 22Le Piita ki len ke, "Israel yaab, li pel man! Uwumbɔr ban ke u mɔk binib ke uma le tun ni Yesu, u ye Nasaret aatiŋ aanii na. Nima pu na le u cha u ŋani lijinjiir aatun, ni lituln li kpa liyimbil na, nimi ponn ni. Nimi nibaa le bee kena. 23Uwumbɔr aageehn pu le bi nan di Yesu ki di ŋa niŋaal ni. Uwumbɔr nan bee ke bi ga ŋa kena la. Le ni di u ki di ŋa mbiindam aaŋaal ni ke bin ti kpaa u ndɔpuinkoo pu, ki ku u. Nima pu na, nimi le ku u. 24Uwumbɔr le fikr u nkun ni ki bii nkun aapɔɔn, kaa cha nkun joo u. 25Ubɔr David nan len Yesu aabɔr ke 'M nan kanni Tidindaan m chee n-yoonn mɔmɔk la. U bi ŋŋaaŋgii wɔb, ki biin m pu la, aan tiwan nibaa taa muk mi. 26Nima pu na, m kpa mpopiin, ki len mpopiin aaliin; 27le ki kpa limakl ke saan cha maawiin bee bitekpiido. M ye saabo u ye chain na, le saan cha maawon bur. Nima le m bi dulnyaa wee ni le ki kpa nsuudoon. 28Aa nan mɔk mi limɔfal aasan. Saah bi m chee na, le m kpa mpopiin saakpen."' 29Le Piita ki len ke, "Nnaabitiib, m ban m tuk nimi tiyaja David aabɔr chain. U nan kpo. Le bi sub u. Din pu na, waakaakul bi du. 30U nan ye Uwumbɔr aabɔnabr ubaa la, ki nyi ke Uwumbɔr puu tipuul tii u, ke u ga di uyabil ubaa ki di ŋa ubɔr, ke waah ye ubɔr pu na. 31David nan bee Uwumbɔr aah ga ŋa pu na. Nima pu na, u nan len ke Uwumbɔr ga nan fikr Waanileekoo Kristo nkun ni, kaan cha u bee bitekpiido. Waawon aa bur. 32Uwumbɔr fikr Yesu nkun ni. Le tinimbil kan. Le ti tuk binib. 33Uwumbɔr nyuŋ Yesu, ki di u kaan uŋaaŋgii wɔb. U gaa Mfuur nyaan Ute Uwumbɔr chee, Uwumbɔr aah nan puu tipuul ti ke u ga tii u na. Dandana, naah kan pu na, ni naah ŋun pu na, ye Uwumbɔr Aafuur nyaan le u di ŋa ti pu. 34David aa nan buen paacham. U mu nan len ke 'Tidindaan Uwumbɔr tuk Ndindaan: Kaln ŋŋaaŋgii wɔb, 35ki ti saa buyoonn m ga nyaŋ saadim mɔmɔk na."' 36Le Piita ki len ke, "Israel yaab mɔmɔk, m ban ke ni sil bee ke ni ye Yesu aabɔr le m len. Nimi le kpaa u ndɔpuinkoo pu. Uwumbɔr le mɔk ke uma Yesu le ye Waanileekoo Kristo, ki ye Tidindaan." 37Kinipaak ngbaan aah ŋun Piita aah len pu na, le ni muk bi saakpen a. Le bi baa Piita ni Yesu aakpambalb biken, "Tinaabitiib, ti ga ŋa kinye?" 38Le Piita bui bi, "Ni mɔmɔk kpeln nimi aabimbin, ki cha ti di nimi ki di muin nimi nnyun ni, Yesu Kristo aayimbil pu. Le Uwumbɔr ga di cha nimi aatunwambir pinn nimi, ki tii nimi ipiin, i ye Waafuur nyaan na. 39Tidindaan Uwumbɔr nan puu tipuul ke u ga di Waafuur nyaan di tii nimi, ni nimi aabim, ni binib bi bi ni daa na: binib bi u ga yin bi na mɔmɔk." 40Le Piita di tibɔr ti wiir na, ki tuk bi Yesu aabɔr, le ki sur bi ki bui bi, "Pɔɔn nibaa man ki ŋmar, ki nyan ntafadaan mu ga pii titunwambirdam ngbaan na ni." 41Le bi di binib bi gaa Piita aah len pu na, ki muin bi nnyun ni. Leyaadaal ngbaan le binib ŋichur ŋitaa ŋmar, ki kpee bi pu. 42Le binimbil man bin bae Yesu aabɔr waakpambalb chee. Le bi mɔmɔk kpaan kimɔbaan, ki ji tɔb chee tijikaar, le ki kpaan tɔb chee ki mee Uwumbɔr. 43Le Uwumbɔr cha Yesu aakpambalb tun lijinjiir aatun pam. Nima pu na, le binib mɔmɔk san Uwumbɔr. 44Le binib bimɔk gaa Yesu ki kii na kpaan tɔb chee, ki di baawan ki di yakr tɔb. 45Binib aah kpa ni na, bi di ni ki di kooh, ki di ŋimombil ngbaan ki di yakr tɔb, baah ban pu na. 46Idaa mɔmɔk bi nan kuuni Uwumbɔr aadichal ni, ki kpaani bido ki ji tijikaar, ki pak Uwumbɔr, ki kpa mpopiin, ni tibulchin. Le binib mɔmɔk pak bi. Idaa mɔmɔk Tidindaan le joo binib bi ŋmar na, ki joo kpae waanib pu.

will be added

X\