3 JƆNN 1

1Min Jɔnn u ye uninkpil na dooni si, njɔgeen Geus. M gee si mbamɔm la. 2Njɔgeen, m mee Uwumbɔr tii si, ke aa li kpa laafee, ki kanni tinyoor, ke saawiin aah kpa tinyoor Uwumbɔr chee pu na. 3Tinaabitiib bibaa dan du la, ki tuk mi saah dii mbamɔm pu na. Le ni ŋa mi mpopiin saakpen a. Aa sil dii mbamɔm la. 4M yaa ŋun ke maabim dii mbamɔm kan, ni ŋa mi mpopiin la. Nibaa aa bi ki ŋa mi mpopiin ki jer kena. 5Njɔgeen, m nyi ke aa ter Yesu aanib bi ye bicham na n-yoonn mɔmɔk; saah kaa nyi bi na mu, aa ter bi la. Saah ŋani kena na, aa ŋani mbamɔm la. 6Bi tuk m ni Yesu aanib bi bi du na saah gee bi pu na. Aa pɔɔk aabaa, ki li beenin ter bi baasachuln ponn ni. Ter bi Uwumbɔr aah ban pu na. 7Yesu pu, le bi chuun tuk binib waaliin, kaa gaa tiwan nibaa binib bi kaa dii Yesu aasan na chee. 8Nima pu, ni ŋan ke timi bi dii Yesu aasan na li ter bi. Ti yaa ter bi kan, ti ter bi ke bin tuk binib Yesu aabɔr ti ye mbamɔn na la. 9M nan ŋmee tibɔr tibaa ki di tii Yesu aanib. Le Diotrefes aa gar ti. U ban ki u li ye Yesu aanib aayidaan. 10U len tibɔbil ki nan inyaamɔn ki paan timi. Waah ŋa kena na, waa faar. Tinaabitiib yaa dan kan, waa channi bi tichann. Binib bi ban bin channi bi tichann na, u kiir bi, kaa kii, ki ban ke un jenn nyan bi Yesu aanib ponn ni. M yaa fuu ni kan, m ga baa u waah ŋani pu na, aan ti nyan mpaan pu. 11Njɔgeen, taa dii unii u kaa ŋan na aataabuu. Li dii un ŋan na le aataabuu. Unii umɔk ŋani nin ŋan na kan, u ye Uwumbɔr yoo la. Unii umɔk ŋani nin kaa ŋan na kan, waa nyi Uwumbɔr. 12Binib mɔmɔk pak Demetrius la. Waah dii mbamɔn aasan pu na le mɔk ke u ye unii. Ti mu pak u la. Aa bee ke taah len pu na, ti gbii la. 13M kpa tibɔr saakpen, ki ban m tuk si. Maa ban m ŋmee ti kigbaŋ kee ponn ni. 14M dak ke ni yaa kpee siib kan, m ga kan si, ki len aa chee. 15Uwumbɔr tii si nsuudoon. Yesu aanib bi bi du na dooni si la. Aa doon Yesu aanib bi bi aa chee na mɔmɔk ubaabaa ki tii timi.

will be added

X\