2 TIMOTI 2

1Maabo, pɔɔn aataakpab Yesu Kristo aah ter si pu na. 2Aa nan ŋun Uwumbɔr aaliin m chee kinipaak aanimbil ni. Di iliin ngbaan ki di ŋa bijab bi bi mbamɔm ki ga ŋma tuk biken na aaŋaal ni. 3Ji falaa Yesu Kristo pu ke waasuja nyaan na. 4Suja u to butɔb na aatafal aa bi dulnyaa wee aabɔr ni; ba pu? u ban un piir waaninkpil aasui la. 5Unii u san litaasaln na, u yaa kaa dii litaasaln ngbaan aakaal kan, waan ji litaasaln aanyoor. 6Ukpaal u tun lituln linimaln na, ni ŋan ke uma le puen ji kisaak ngbaan aajikaar. 7Aa dakl lik maah len pu na aatataa, le Tidindaan ga ter si aa bee ni mɔmɔk aatataa. 8Teer Yesu Kristo aabɔr. U fikr nkun ni, ki ye Ubɔr David aayabil la. Maah tuk binib tibɔnyaan ti na le na. 9Tibɔnyaan tee pu, le m ji falaa. Le bi buu mi idɔribi kiyondiik ni, ke bakadaan na. Uwumbɔr aaliin ma aa buu. 10Nima pu le m kpa limɔr falaa mɔmɔk ni, Uwumbɔr aanileekaan pu, aan bi mu kpaan Yesu Kristo ni, ki ŋmar, ki li kpa mpopiin mu kaa kpa ndoon na. 11Tibɔr tee gbii: "Timi aabimbikpok yaa kpo Yesu chee kan, ti ga li kpa limɔfal u chee. 12Ti yaa dii u ki kpa limɔr kan, ti ga ji nnaan u chee. Ti yaa len ke taa nyi u kan, u mu ga len ke waa nyi timi. 13Ti yaa kaa ye mbamɔndam kan, uma beenin ye mbamɔndaan la, waan ŋma yii uma ubaa aabimbin." 14Aa li teer bi tibɔr timina, ki sur bi Tidindaan aanimbil ni ke bi taa li kpak kinikpakpak iliin aatataa pu; ba pu? naa kpa tinyoor, kaa ter binib ke bin dii mbamɔm. 15Cha aanimbil li man aa piir Uwumbɔr aasui, ki li ye waatutuln bamɔnn u kaan ji inimɔɔn waatuln pu na, ki tuk binib Uwumbɔr aaliin i ye mbamɔn na, ki mɔk bi yaatataa mbamɔm. 16Yii tibɔr ti ye fam na; ba pu? binib bi len kena na, bi ga moo tun titunwambir. 17Baaliin aa ŋan ki ga pɔr ke mbuun aah pɔr pu na la. Bi ponn ni binib bilee ye Haimeneus ni Filetus. 18Bi yenn kaa dii mbamɔn. Bi len ke ti fikr nkun ni a. Baah len kena na, nima le binib bibaa aa ki gaa Yesu ki kii mbamɔm. 19Tɔ, Uwumbɔr aanib ye waadinyikl li pɔɔ na, ki sil la, ki kpa kidaan. Kidaan ngbaan le ye ke "Tidindaan nyi bin ye waanib na," ki ki ye ke "Binib bi pur Tidindaan aayimbil na, bi mɔmɔk di cha titunwambir." 20Tɔ, lidichasaakpel ni, ŋisambil aaboŋ bi. Ŋibaa ye salmaa, ŋibaa ye aansilfa, ŋibaa mu ye busub yaan, ŋibaa mu ye tiyakr. Bi joo ŋibaa ki tun litukpaan, ki joo ŋibaa ki tun lituwaatiir. 21Unii yaa di cha titunwambir mɔmɔk kan, u ga li ye lisambikpaan la, le ki tii Tidindaan Uwumbɔr, ki ga li bi chain, ki gor ke un tun lituln nyaan mɔmɔk ki tii Tidindaan Uwumbɔr. 22Chuu aabaa ki taa dii tiwan ni kaa ŋan na aakpeek ke binachipɔm aah dii pu na. Aa li dii mbimbin nyaan, ki tun Tidindaan aatuln mbamɔm, ki li kpa ngeehn, ni nsuudoon. Binib bi mu bi kena na, ki mee Tidindaan bisui mɔmɔk, kpaan bima le chee. 23Yii mbaan mu ye kijɔrk aabaan kaa kpa ŋitaa na. Aa nyi ke nima le cha binib kpak kinikpakpak. 24Tidindaan aatutuln taa li kpak kinikpakpak. Ni ŋan ke u li ŋani binib mɔmɔk tibulchin, ki tuk bi Uwumbɔr aaliin mbamɔm, ki li kpa limɔr, 25ki li bi suuna, ki sur binib bi kpak u kinikpakpak na. Nibaakan Uwumbɔr ga cha bi kpeln bipoobil ki bee waabɔr ti ye mbamɔn na, 26ki ki kpaln binib, ki nyan ni Kinimbɔŋ u nan chuu bi ke bin ŋani waageehn na aaŋaal ni.

will be added

X\