2 PITA 3

1Maanigeekaan, kigbaŋ kimina ye kigbaŋ leeler le m ki ŋmee ki di tii nimi. Tigbann tilee mɔmɔk ponn ni, le m teer nimi, ki fiin nimi aalandak i bi chain na. 2M ban ke ni li teer iliin i Uwumbɔr aabɔnabtiib chain aah nan len pu n-yaayoonn na, ki li teer Tidindaan u ye timi Aaŋmaŋmardaan na aaliin i timi waakpambalb aah tuk nimi pu na. 3Njan, m ban ke ni li bee ke binib bi dii bisui aah ban pu na ga li bi kookoo aayoonn, ki ga ŋa nimi mbɔɔnyun, 4ki ga bui ke "Yesu Kristo aah puu tipuul ti ke u ga gir ni na, tipuul ngbaan bi la chee? Buyoonn titetiib nan kpo ki nan saa dandana wee na, tiwan mɔmɔk beenin bi ke naah nan bi pu buyoonn Uwumbɔr naan dulnyaa wee na." 5Baageehn pu, le bi sunn ke n-yaayoonn na, Uwumbɔr nan len ki naan paacham, ni kitiŋ ki nyan ni nnyun ni ki bi nnyun aakaasisik ni na. 6Nnyun le nan jin dulnyaakpok, le ki bii u. 7Bi sunn ke Uwumbɔr aaliin ichachaan le joo paacham ni kitiŋ u bi dandana wee na, ki nan saa buyoonn u ga see paacham ni taab mmii ki kuln titunwambirdam na; leyaadaal ngbaan le u ga ji bi tibɔr le ki bii bi. 8Maanigeekaan, ni taa sunn ke nwiin mbaa naahn ŋibin lichur libaa la, le Tidindaan chee. Ŋibin lichur libaa mu naahn nwiin mbaa la, le u chee. 9Tidindaan aan yoon ke un ŋa waah puu tipuul ti na, ke binib bibaa aah dak pu na. U ji limɔr ni pu la, kaa ban ke unii ubaa bii. U ban ke binib mɔmɔk kpeln baabimbin ki ŋmar. 10Tidindaan aawiindaal ga fuu ni ke unaayuk aah fuu ni pu na la. Leyaadaal ngbaan le paacham ga ŋa kifuuk saakpen ki jer. Mmii mu ton saakpen na ga doln paacham aawan mɔmɔk. Kitiŋ, ni tiwan nimɔk bi kitiŋ na mu ga gaa mmii la. 11Tiwan nimina mɔmɔk aah ga bii kena na, ni ŋan ke ni li ye ba aaniboln? Ni ŋan ke ni li bi chain, ki san Uwumbɔr, 12ki li lik Uwumbɔr aawiindaal aah ga fuu ni buyoonn na, ki cha ninimbil li man nwiin ngbaan pu. Leyaadaal ngbaan, le paacham ga gaa mmii, le ki doln. Mmii mu ton saakpen na ga doln paacham aawan mɔmɔk. 13Uwumbɔr mu aah nan puu tipuul ti na, ti kpa limakl ke paacham pɔɔn ni kitiŋ pɔɔn le ga li bi. Nima chee le tiwan mɔmɔk ga li bi mbamɔm. 14Maanigeekaan, naah kpa limakl kena na, ni li pɔɔni nibaa ki li bi suuna, ki li bi chain, ki taa li kpa taani ubaa Uwumbɔr aanimbil ni bundaln u ga lik nimi aabimbin aah bi pu na. 15Tidindaan aah ji limɔr kaa gir ni mala na, ni bee ke u tii binib nsan ke bin ŋmar le waahr, le u nin gir ni. Tinaabogeekoo Pɔɔl mu nan ŋmee kigbaŋ ki di tii ni nimi, ki tuk nimi kena, Uwumbɔr aah tii u nlan pu na. 16Waagbann mɔmɔk ponn ni u ŋmee Uwumbɔr aawiindaal aabɔr, ki mɔk nimi tibɔr timina. Tibɔr ti pɔɔ unii bee taatataa na tibaa mu bi waagbann ponn ni. Le binib bi kaa kpa nlan ki ga ŋma yenn mala na kpeln taatataa, ke baah kpeln Uwumbɔr aagbaŋ aaliin iken pu na. Nima pu na Uwumbɔr ga daa bitafal la. 17Maanigeekaan, ni puen bee baah ŋani pu na la. Naah dii mbamɔm pu na, ni li nyi man, ki taa dii titunwambirdam aanyaamɔn aan ki yenn. 18Ni li moo gaa Tidindaan Yesu Kristo u ye timi Aaŋmaŋmardaan na aaterm, ki li moo bae waaliin. Uma le yeh mpakm dandana wee ki ti saa n-yoonn mu kaa kpa ndoon na. Amii.

will be added

X\