1 TIMOTI 6

1Tɔ, Yesu aanib ponn ni bi ye bitutuliib na, bi mɔmɔk li pak bidindaatiib mbamɔm, aan binib taa bii Uwumbɔr aayimbil ni waaliin. 2Bitutuliib bi kpa dindaatiib bi gaa Yesu ki kii na, bi taa lik bidindaatiib fam, ke bi ye binaabitiib. Bi li moo tun lituln ki tii bidindaatiib ngbaan ki jer baah ba ga tun pu na; ba pu? dindaatiib bi kanni tinyoor baatuln ponn ni na ye binib bi gaa Yesu ki kii na la, le bi gee bi. Tuk bi ki sur bi ke bi li ŋani kena. 3Tidindaan Yesu Kristo aaliin le ye iliin nyaan, ki mɔk timi taah ga dii Uwumbɔr aasan mbamɔm pu na. Unii ubaa yaa mɔk bi mmɔkm yaayan kaa kii iliin ngbaan kan, 4u ye kalmbaanidaan la, kaa nyi nibaa. U gee ke un kpak kinikpakpak Yesu aaliin aatataa pu. Nima le cha lipiipoln bi, ni tibɔr, ni ŋisiibil, ki cha bi dak ilandak i kaa ŋan na tɔb pu. 5Le binib bi dak ilandakbir na kpak tɔb kinikpakpak. Baa ki nyi mbamɔn. Bi dak ke Uwumbɔr aasan ye liwankpal aasan la. [Nya binib ngbaan chee.] 6Tɔ, unii aanimbil yaa gbiin waah kpa ni na pu kan, u yaa dii Uwumbɔr aasan kan, nima le ye tinyoor saakpen le ki tii u. 7Taah nan dan dulnyaa wee ni buyoonn na, taa nan joo ni nibaa. Taah ga ki nyan dulnyaa wee ni buyoonn na, taan ki ŋma li joo nibaa nyan. 8Nima pu na, taah kpa tijikaar ni tiwanpeenkaan ni na, cha tinimbil gbiin ni. 9Binib biyaanimbil man liwankpal pu na, bi ga kan ntɔŋ, ki lir. Binimbil ga li man kijɔrk aawan saakpen le pu. Ni ye fam la, ki ga bii bi. Tiwan ngbaan aaboln le cha binib bee yooli ki kan ntafadaan mu kaa kpa ndoon na. 10Binib yaa gee ŋimombil saakpen kan, nima le cha bi tun titunwambir mɔk aaboŋ. Binib bibaa aanimbil aah man ŋimombil pu na le cha bi yenn kaa ki dii Yesu aasan, ki kan mpombiin ki ti chaa jer. 11Saah ye Uwumbɔr aanii na, yii titunwambir timina mɔmɔk, ki li dii mbimbin nyaan, ki li bi Uwumbɔr aah ban pu na, ki li tun waatuln mbamɔm, ki li kpa ngeehn, ni suklaa, ki li bi suuna. 12Saah gaa Yesu ki kii pu na, ni ŋan ke aa pɔɔni aabaa ki yii lituln limɔk kaa ŋan na, ki li ŋub limɔfal li kaa kpa ndoon na mbamɔm. Uwumbɔr yin si ke aa kan limɔfal ngbaan, le aa tii siiraa nyaan binib pam aanimbil ni, ki tuk bi saah gaa Uwumbɔr ki kii pu na. 13Yesu Kristo nan tii siiraa nyaan Pontius Pailat aanimbiin ni. M sur si Yesu ni Uwumbɔr u tii tiwan mɔmɔk limɔfal na aanimbil ni, 14aa tun Uwumbɔr aah tii si lituln li na mbamɔm, ki li bi chain, ki taa li kpa taani ubaa, ki nan saa Tidindaan Yesu Kristo aah ga gir ni buyoonn na. 15Ni yaa ŋeer kan, Uwumbɔr ga cha u gir ni. Uwumbɔr u ti pak u na, uma baanja le ye tiwan mɔmɔk Aayidaan. U ye bibɔrb mɔmɔk Aabɔr, ki ye dindaatiib mɔmɔk Aadindaan. 16Uma baanja le ye limɔfal li kaa kpa ndoon na Aadindaan. U bi nwiihn ni la. Ubaa aan ŋma duun mu ni. Ubaa aa kee waa u. Ubaa mu aan ŋma kan u. Cha binib mɔmɔk nyuŋ u, ki kii waamɔb n-yoonn mu kaa kpa ndoon na. Amii. 17Binib bi kpa liwankpal dulnyaa wee ni na, aa sur bi, bi taa li kpa kalmbaani, ki taa li kpa limakl liwankpal ngbaan pu. Ba pu? li ye libuln la. Bi li kpa limakl Uwumbɔr pu. U tii timi saakpen taa ti ki nyi ni mɔk, u ban ke ti gaa, ki li kpa mpopiin. 18Tuk biwankpadam ngbaan ke bi li ter biken, ki li tun lituln nyaan saakpen, ki li kpa tibulchin, ki li ban ke bin yakr baawankpal ki tii biken. 19Bi yaa ŋa kena kan bi ga di liwankpal ki bil paacham. Ni ga li ye nterm nyaan ki tii bi n-yoonn mu choo na, le bi ga kan limɔfal li ye libamɔln na. 20Timoti, li joo tibɔr ti Uwumbɔr di ŋa aaŋaal ni na. Binib bibaa len tibɔr yool yool, ki yii Uwumbɔr aaliin, ki dak ke bi nyi la, kaa nyi. Yii baah len pu na. 21Ba pu? binib bibaa bi, ki len ke bi nyi nnyim, ki mu yenn kaa ki dii Yesu aasan. Tɔ, Uwumbɔr ŋa tinyoor ki ŋa ni pu.

will be added

X\