1 TIMOTI 5

1Tɔ, taa kae uja u por na. Li sur u ke aate na. Li sur bijab bi kaa por na ke aanaabitiib na. 2Li sur bipiib bi por na ke aana na. Li sur bipiib bi kaa por na ke aaninkpatiib na, ki li bi chain bi chee. 3Li ter bikpopiib bi sil ye bikpopiib na. 4Ukpopii mu yaa kpa mbim aan u ti ki kpa yabitiib le kan, ni ŋan ke bin bae Uwumbɔr aah ban ke bin ter baachiln ni aanib pu na, ki teen binatiib ni biyatiib baah nan kpiin bi pu na; ba pu? nima le piir Uwumbɔr aasui. 5Ukpopii u sil ye ukpopii ki gur ubaa na, u kpa limakl Uwumbɔr pu la. Le u ga li mee Uwumbɔr ki gaŋni u nwiin pu ni kinyeek. 6Le ukpopii u kaa bi mbamɔm na, u lann limɔfal Uwumbɔr chee ki laa chuun fu. 7Tuk Yesu aanib ke bi li ŋani maah len pu na, aan bikpopiib bi bi bikaasisik ni na taa li kpa ngalm. 8Unii u kaa ter udo yaab, kaa ter uma ubaa aachiln ni aanib ki jer biken na, u yii Yesu aasan le na, ki ye kiniwambiik ki jer bin kaa gaa Yesu ki kii na. 9Ukpopii yaa kaa fuu ŋibin imonko itaa kan, aa taa ŋmee waayimbil bikpopiib aagbaŋ ponn ni. Uchal yaa nan ye ujabaan kan, 10binib yaa len ke u tun lituln nyaan kan, u yaa nan kpiini mbim kan, u yaa nan ŋani bicham tichann kan, u yaa nan ter Uwumbɔr aaninyaan kan, u yaa nan ter binib bi bi limukl ni na kan, unimbil yaa man lituln nyaan mɔmɔk pu kan, aa ŋmee waayimbil bikpopiib aagbaŋ ponn ni. 11Taa ŋmee bikpopiib bi kaa por na aayimbil; ba pu? bijab aakpeek yaa chuu bi kan, bi ga di Kristo aatuln lii, ki ban ke bin mɔn tichal, 12kaan gbiin baah puu tipuul ti na. Nima le bi ga li kpa ngalm. 13Ki ki cha, bi ga li san ligbanyakl, ki ga buen ŋidichal ŋidichal ni. Naa ye ke bi ga li san ligbanyakl baanja, bi ga li ye bibɔtukb la, ki ga li koo binib aabɔr ni, ki ga len naah kaa ba ŋan bi len pu na. 14Bikpopiib bi kaa por na, m ban ke bin mɔn tichal, ki ma mbim, ki li lik baachiln ni aabɔr, ki taa tii timi aadim nsan bin galn timi. 15Ba pu? bikpopiib bibaa yenn a, ki dii Kinimbɔŋ aasan. 16Upii u gaa Yesu ki kii na, bikpopiib yaa bi udo kan, ni ŋan ke u li ter bi, aan ki taa muk Yesu aanib ke bin ter bikpopiib ngbaan. Nima le bi ga ŋma ter bikpopiib bi kaa kpa doyaab na. 17Tɔ, Yesu aanib aaninkpiib bi joo baanib mbamɔm na, ni ŋan ke Yesu aanib pa bi lipal li wiir na. Yesu aanib aaninkpiib bi tun lituln linimaln, ki mooni Uwumbɔr aaliin, ki mɔk binib yaatataa na, ni ŋan ke bima le aapar li wiir jer biken yaan. 18Ba pu? Uwumbɔr aagbaŋ len ke, "Unaaja yaa taa gbaa idi ki tii binib kan, bi taa di tiwan ki di buu umɔb ke u taa ŋmɔ," ki ki len ke "Ututuln ŋeer waapar la." 19Tɔ, bi yaa galn Yesu aanib aaninkpil kan, taa gar baah len pu na, see bisiiraadam bilee bee bitaa len. 20Binib bi tun titunwambir na, kae bi Yesu aanib mɔmɔk aanimbil ni, aan bin gur na san ijawaan. 21M sur si Uwumbɔr ni Tidindaan Yesu Kristo ni waatuuntiib bi bi chain na aanimbil ni la, aa li ŋani maah len pu na, ki li joo Yesu aanib mbamɔm, ki taa pak ubaa ki jer uken. 22Unii yaa kaa yunn Uwumbɔr aasan ni kan, taa lee u un tun Uwumbɔr aatuln. Taa cha biken aatunwambir li ye saataani. Cha saabimbin li bi chain. 23Saah kaa kpa laafee kpaala kpaala na, taa ki nyu nnyun baanja, aa nyu ŋisubil aadaan siib, aan ni ter aaponn ni. 24Binib bibaa aatunwambir bi mpaan pu, ki tii bi ntafadaan mala. Bibaa mu aatunwambir aa kpiir mala. 25Kena, le lituln nyaan mu bi lipaal. Li yaa bɔɔ kan, laan li bɔɔ n-yoonn mɔmɔk.

will be added

X\