1 TIMOTI 2

1Tɔ, tibɔr ti ye tibɔrkpaan na le ye m ban ke ni li mee Uwumbɔr ki tii binib mɔmɔk, ki li gaŋni u ke un san bi kinimbaak, ki li dooni u bi pu. 2Ni li mee Uwumbɔr kena ki tii bibɔrb ni kitiŋ aaninkpiib mɔmɔk, aan ti li bi tibaa pu, ki li kpa nsuudoon, ki li dii Uwumbɔr aasan, ki li ŋani tiwan mɔmɔk mbamɔm. 3Ni yaa mee Uwumbɔr kena kan, ni ŋan, ki piir Uwumbɔr u ye timi aaŋmaŋmardaan na aasui. 4U ban ke binib mɔmɔk ŋmar, aan ki bee waabɔr ti ye mbamɔn na. 5Ba pu? Uwumbɔr ye Uwumbɔrbaan la. Uchandaatuln ubaa baanja le bi Uwumbɔr ni binib aakaasisik ni. Uma le ye Yesu Kristo u nan kpaln unibɔn 6ki sil binib mɔmɔk aasisiiyaan ki kpo, ke un gaa bi lii. Ni ŋeer ti li ŋani siiraa kena. 7Uwumbɔr lee mi ke m le ye Yesu aakpambal, ke m tuk bin kaa ye Juu yaab na Yesu aabɔr ngbaan, ke bin gaa u ki kii, ki bee waaliin i ye mbamɔn na. Maa mɔn nnyaamɔn, maah len pu na, ti gbii la. 8Nima pu na, m ban ke bijab bi bi ni kookoo na mee Uwumbɔr, ki yoor iŋaal paacham. Bi li ye binib bi bi chain na, ki taa li kpa liŋuul, ki taa li kpa kinikpakpak. 9M ban ke bipiib li pee tiwanpeenkaan ni ŋeer bipiib bi dii Uwumbɔr na, ki li bi suuna, ki taa li kpa kalmbaani, ki taa fiini tiyikpir saakpen siini, ki taa tuun ŋitafajɔn ŋi kpa kidaak na, ki taa gbin nleen mu kpa kidaak na, ki taa li peeni tiwanpeenkaan ni kpa kidaak na. 10Bi li tun lituln nyaan. Nima le ŋann bipiib bi len ke bi dii Uwumbɔr aasan na. 11Bi li ŋmin ki li bae Uwumbɔr aaliin ki li ŋun tibɔr. 12Maa kii ke bipiib tuk bijab Uwumbɔr aaliin, kaa kii ke bi li ye bijab aayidam. Bi li ŋmin. 13Ba pu? Uwumbɔr nan puen naan tiyaja Adam, le ki nin naan upuu Iif. 14Kinimbɔŋ aa ŋmann Adam, u ŋmann upii ngbaan la, le u tun titunwambir. 15Tɔ, bipiib mu yaa gaa Yesu ki kii, ki gee binib, ki bi chain, ki bi suuna kan, bi ga ŋmar imalween ni.

will be added

X\