1 TESALONIKA YAAB 5

1Nnaabitiib, naa ban ke m ŋmee ki tuk nimi bundaln tiwan nimina mɔmɔk ga ŋa na. 2Ba pu? nimi nibaa bee mbamɔm ke Tidindaan aawiindaal ga fuu ni ke unaayuk aah fuu ni kinyeek pu na. 3Buyoonn binib ga len ke bi bi bibaa pu la, nibaa aan ŋa bi nibaa na, libuul ngbaan ni le tibɔbil ga lir bi pu. Ni ga li bi ke imalween aah chuu upii pu na la. Baan ŋma nyan ti. 4Nnaabitiib, nimi le aa bi mbɔmbɔɔn ni. Nima pu na Tidindaan aawiindaal taa ŋa nimi lijinjiir ke unaayuk aah fuu ni pu na. 5Ba pu? ni mɔmɔk ye nwiin pu aabim. Ni ye kitaak aah woln na aabim la. Taa ye kinyeek yaab, kaa ye mbɔmbɔɔn ni yaab. 6Nima pu na, ti taa li geeni, ke biken aah geeni pu na. Cha ti li kii, ki chuu tibaa man. 7Binib bi dɔ geen na, kinyeek le bi dɔ geen. Binib bi nyu ndaan gbii na, kinyeek le bi gbii. 8Timi, ti ye kitaak aah woln na aabim la, nima pu na cha ti chuu tibaa man. Cha ti gaa Yesu ki kii, ki li gee tɔb, ki li kpa limakl ke ti ga sil ŋmar. Ti yaa gaa Yesu ki kii, ki kpa limakl u pu, ki gee tɔb kan, nima le ga biin ti pu, ke tikur ti biin kibiŋ pu na, ni tikur aayikpupuk aah biin suja pu, pu na. 9Uwumbɔr aah lee timi na, waa lee timi ke u gee liŋuul ti pu, u lee timi ke ti ŋmar Tidindaan Yesu Kristo pu la. 10Uma le nan kpo ti pu. Nima pu na, ti yaa bi, ke ti yaa kpo bundaln u ga gir ni na kan, ti ga buen ti li bi u chee. 11Nima pu na, ni li pɔɔni tɔb aataakpab, ki li ter tɔb ni li moo dii Uwumbɔr aasan mbamɔm, ke naah ŋani pu dandana wee na. 12Tinaabitiib, ti gaŋ nimi, ni li pak nimi aaninkpiib Tidindaan aasan ni, bi tun waatuln nikaasisik ni ki sur nimi na. 13Ni li pak bi mbamɔm, ki li gee bi baatuln pu. Ni mɔmɔk li kpaan kimɔbaan man. 14Tinaabitiib, ti gaŋ nimi, ni sur binib bi kaa ban bi tun lituln na, ki li pɔɔni binib biyaataakpab yɔl na aataakpab, ki ter binib bi kaa pɔɔ na, ki li kpa limɔr binib mɔmɔk pu. 15Ni taa cha unii ubaa teen uken waah ŋa bakaa u na pu. Pɔɔn nibaa man ki li ŋani tɔb ni binib mɔmɔk tibulchin n-yoonn mɔmɔk. 16Ni li kpa mpopiin n-yoonn mɔmɔk, 17ki li mee Uwumbɔr n-yoonn mɔmɔk, 18ki li dooni u tiwan mɔmɔk pu. Uwumbɔr aageehn le ye ke ni li ŋani kena; ba pu? ni ye Yesu Kristo aanib. 19Ni taa yii Uwumbɔr Aafuur nyaan aah ban pu na. 20Unii yaa len Uwumbɔr Aafuur nyaan aah tii u iliin i na kan, ni taa lik iliin ngbaan fam. 21Ni li lik tibɔr mɔmɔk aah bi pu na, ke ti ŋan aan taa ŋan, ki li joo ti ŋan na mbamɔm. 22Ni yii man isan i kaa ŋan na mɔmɔk aaboŋ. 23Uwumbɔr u tii timi nsuudoon na, ŋa nimi aabimbin mɔmɔk chain, ki li joo nimi aawiin, ni nisui, ni nimi aawon mbamɔm, ni taa li kpa taani ubaa bundaln Tidindaan Yesu Kristo ga gir ni na. 24Uwumbɔr u yin nimi na, u ŋani waah len pu na la, ki ga ŋa nimina mɔmɔk. 25Tinaabitiib, ni mee Uwumbɔr tii timi. 26Ni doon tinaabitiib mɔmɔk mbamɔm. 27M gaŋ nimi Tidindaan aayimbil pu, cha bin karn kigbaŋ kee ki tii tinaabitiib mɔmɔk. 28Tidindaan Yesu Kristo ŋa tinyoor ki ŋa ni pu. [Amii.]

will be added

X\