1 JƆNN 3

1Lik Tite Uwumbɔr aah gee timi saakpen pu na. U yi timi ke waabim. Le ti mu sil ye waabim. Dulnyaa aanib aa nyi Uwumbɔr. Baah kaa nyi Uwumbɔr na, nima pu le baa nyi ti mu. 2Maanigeekaan, dandana wee ti ye Uwumbɔr aabim la. Taa kee nyi taah ga nan li bi pu na. Ti po nyi ke Yesu yaa gir ni kan, ti ga kan waah bi pu na. Nima pu le ti mu ga li naahn u. 3Unii umɔk kpa limakl ngbaan Yesu pu na, u ŋani ubaa chain la, ke Yesu aah ye chain pu na. 4Unii umɔk tun titunwambir na, u ŋani Uwumbɔr aakaal aah kɔ pu na la; ba pu? unii yaa ŋa Uwumbɔr aakaal aah kɔ pu na kan, nima le ye titunwambir. 5Ni bee ke Yesu aah nan dan dulnyaa wee ni na, u dan u nan nyan titunwambir la. Ni bee ke Yesu aa tun titunwambir tibaa. 6Unii umɔk bi Yesu ni na aan ki li beenin tun titunwambir. Unii umɔk beenin tun titunwambir na aa kan u, ki mu aa nyi u. 7Maabim, taa cha unii ubaa ŋmann nimi. Unii umɔk ŋani ni ŋan na, udaan ye unibamɔnn ke Yesu aah ye unibamɔnn pu na la. 8Unii umɔk tun titunwambir n-yoonn mɔmɔk na, u ye Kinimbɔŋ bi yi u ke Defil aanii la. Ba pu? Kinimbɔŋ Defil aah nan piin buyoonn na, u po tun titunwambir la. Uwumbɔr Aajapɔɔn aah nan dan dulnyaa wee ni na, u dan ke u nan ŋa Defil ngbaan aatuln yooli la. 9Unii umɔk ye Uwumbɔr aabo na, Uwumbɔr aabimbin bi u ni. Nima pu, waan ki li beenin tun titunwambir. Ute le ye Uwumbɔr. Nima pu, waan ŋma dii titunwambir aasan. 10Unii umɔk kaa ŋani ni ŋan na aa ye Uwumbɔr aabo. Unii umɔk kaa gee una aabo na, u mu aa ye Uwumbɔr aabo. Nima le cha ni bee binib bi ye Uwumbɔr aabim na, ni bin ye Kinimbɔŋ Defil aabim na. 11Naah nan piin ki dii Yesu aasan ki di nan saa din na, naah ŋun iliin i na le ye ke "Cha ti li gee tɔb." 12Taa cha ti li bi ke Keen na. U nan ye Kinimbɔŋ u kaa ŋan na aanii la, le ki ku unaal. Ba pu u ku unaal? Uma Keen aatuln aa ŋan. Unaal aatuln ŋan. Nima le cha u ku u. 13Nnaabitiib, dulnyaa aanib yaa nan nimi kan, taa cha ni gar nimi. 14Taah gee tinaabitiib na, nima le cha ti bee ke ti nyan nkun ni, ki kpa limɔfal li kaa kpa ndoon na. Unii umɔk kaa gee una aabo na, u beenin bi nkun ni la. 15Unii umɔk nan una aabo na ye unikur la. Ni nyi ke unikur ubaa aa kpa limɔfal li kaa kpa ndoon na. 16Yesu nan sil timi aasisiiyaan ki kpo ti pu. Nima le cha ti bee ngeehn aah ye pu na. Ni ŋan ke ti mu ga ŋma kpo tinaabitiib pu. 17Unii yaa kpa liwankpal ki yaa kan una aabo bi igiin ni ki yaa kaa san u kinimbaak kan, Uwumbɔr aageehn aa bi usui ni. 18Maabim, taa cha ti li gee binib timɔb ni baanja. Nima ye fam la. Cha ti li gee bi mbamɔm, ki li ter bi. 19Nima le ga cha ti bee ke ti dii mbamɔn aasan. Nima le ga cha ti li kpa nsuudoon Uwumbɔr chee. 20Ti yaa dak tisui ni ke timi aabɔr bii kan, cha ti li teer ke Uwumbɔr jer tisui ki nyi tiwan mɔmɔk. 21Maanigeekaan, ti yaa bee tisui ni ke timi aabɔr aa bii kan, ti kpa lipoobil Uwumbɔr chee la. 22Ti kii waamɔb la, ki ŋani tiwan ni piir usui na la. Nima pu, taah mee u tiwan ni na, u tii timi la. 23Waah tuk timi ke ti li ŋani pu na le ye ke: ti li gaar Ujapɔɔn Yesu Kristo ki kii, ki li gee tɔb, Yesu aah tuk timi pu na. 24Unii umɔk kii Uwumbɔr aamɔb na, u bi Uwumbɔr ni la. Uwumbɔr mu bi u ni la. U tii timi Waafuur nyaan la, nima le cha ti bee ke u bi ti ni.

will be added

X\