1 KORINT YAAB 7

1Naah ŋmee mi kigbaŋ tibɔr ti pu na, ni ŋan ke uja taa nyi upii. 2Tɔ, kidaagook aatuln pu, ni ŋan ke uja mɔmɔk li kpa uma ubaa aapuu, upii mɔmɔk li kpa uma ubaa aachal. 3Upii yaa ban uchal kan, u taa yii, uja mu yaa ban upuu kan, u taa yii. 4Upii aa joo uwon, uchal le joo ti. Uja mu aa joo uwon, upii le joo ti. 5Ubaa taa yii uken, see ni puen kii tii tɔb ki di cha siib, aan ki li kpa n-yoonn ki mee Uwumbɔr, [ki lul bumɔb,] le ki ki kpaan tɔb chee. Ni yaa kaa ki kpaan tɔb chee kan, Kinimbɔŋ ga tɔŋ nimi ni tun kidaagook aatuln. Ba pu? naan ŋma chuu nibaa. 6Maah ga len tibɔr ti na le ye ke m ga cha ni ŋa kena, maa len ke see ni ŋa kena. 7Maageehn le ye ke ni mɔmɔk li bi ke maah bi pu na. Uwumbɔr mu tii unii mɔmɔk uma ubaa aapiin. Ti mɔmɔk aapiin aa kpaa. U tii ti mɔmɔk mbaabaa. 8Bijakpaab ni bisaapɔm ni bikpopiib, m tuk nimi la, ni ŋan ke ni li bi kena, ke maah bi pu na. 9Ni mu yaa kaa ŋma chuu nibaa kan, cha bijab din, bipiib mu mɔn. Bijab ni bipiib yaa yoor tɔb kan, ni soor ni binimbil man tɔb pu, kaa kan. 10Bipiijoob ni bichadam, m ga tuk nimi naah ga ŋa pu na, naa ye min le tuk nimi, Tidindaan le tuk nimi, ke upii taa di uchal lii. 11U yaa di uchal lii kan, u li bi ubaa, see u ki gir buen uchal chee, bin ti took. Uja mu taa jenn upuu. 12Bin gur na, Tidindaan aa len baabɔr. Min le tuk bi ke uja u dii Uwumbɔr aasan na yaa kpa puu u kaa dii Uwumbɔr aasan na kan, upii ngbaan yaa kii ke u li bi u chee kan, u taa jenn u. 13Upii u mu dii Uwumbɔr aasan na yaa kpa chal u kaa dii Uwumbɔr aasan na kan, uja ngbaan yaa kii ke u li bi u chee kan, u taa di uchal di lii. 14Uja u kaa dii Uwumbɔr aasan na, upuu u dii na pu, u ye chain la. Upii u mu kaa dii Uwumbɔr aasan na, uchal u dii na pu, u mu ye chain la. Ni yaa kaa ba ye kena kan, nimi aabim aa ba ga li ye chain. Tɔ, naah ye kena na, bi ye chain la. 15Un kaa dii Uwumbɔr aasan na yaa ban un di upuu bee uchal u dii Uwumbɔr aasan na di lii kan, cha u li cha. Naa ye limukl. Uwumbɔr yin timi ke ti li kpa nsuudoon. 16Upii, aa nyi ke sin pu aachal ga ŋmar aan waan ŋmar? Uja, aa nyi ke sin pu aapuu ga ŋmar aan waan ŋmar? 17Tɔ, Tidindaan aah tii unii mɔmɔk pu na, u li bi kena. Unii mɔmɔk aah nan bi pu Uwumbɔr nan yin u na, u li bi kena. Maah tuk nimi pu na, kena le m tuk Yesu aanib ni kookoo. 18Ubaa yaa nan ye uchakpangendaan Uwumbɔr nan yin u na kan, u li bi kena, u taa toor li. U mu kaa ye uchakpangendaan Uwumbɔr nan yin u na kan, u taa ki gii. 19Lichakpangee aa kpa tinyoor. Unii yaa kaa gii kan, ni mu aa kpa tinyoor. Ti yaa kii Uwumbɔr aamɔb kan, nima le kpa tinyoor. 20Unii mɔmɔk aah nan bi pu Uwumbɔr nan yin u na, u li bi kena. 21Uwumbɔr aah nan yin si na, aa yaa ye unaagbiija kan, taa cha ni li wu si. Aa mu yaa ga ŋma nyan tinaagbiir ngbaan ni kan, nyan ki li bi aabaa. 22Tidindaan mu yaa yin unii u ye unaagbiija na kan, u ye Tidindaan aanii u bi daafir na la. Kena le ye Tidindaan yaa yin unii u kaa ye unaagbiija na kan, u ye Kristo aanaagbiija la. 23Uwumbɔr daa timi le ki pai. Nima pu na, ni taa li ye binib aanaagbiib. 24Nnaabitiib, unii mɔmɔk aah nan bi pu Uwumbɔr nan yin u na, u li bi kena Uwumbɔr chee. 25Binachipɔm ni bisaapɔm aabɔr, Tidindaan aa tuk mi; waanimbaasaln pu, m ye unibamɔnn la, ki ga tuk nimi maah dak pu na. 26Dandana aafalaa pu, m dak ke ni ŋan ke unii li bi ke waah bi pu na. 27Aa yaa kpa puu kan, taa li ban ke aa jenn u. Aa yaa kaa kpa puu kan, taa ki ban. 28Uja mu yaa din upii kan, naa bir. Usaapɔɔn mu yaa mɔn uja kan, naa bir. Le bipiijoob ni bichadam mu ga kan falaa dulnyaa wee ni. Le maa ban ke ni kan falaa ngbaan. 29Nnaabitiib, maah len pu na le ye ke n-yoonn mu gur na, mu par a. Nima pu na, bin kpa puutiib na, bi li bi ke baah kaa kpa le na; 30bin wii na mu li bi ke baah kaa wii le na, bin kpa mpopiin na mu, bi li bi ke baah kaa kpa mpopiin le na, bin daa tiir na mu, bi li bi ke baah kaa kpa nibaa na. 31Bin kpa dulnyaa aawan ki joo tun baatuln na, bi taa cha binimbil li man ni pu; ba pu? dulnyaa wee, ni waawan bi jer la. 32Maa ban ke nibaa li muk nimi nisui ni. Un kaa kpa puu na, utafal bi Tidindaan aabɔr ni la. U dakl waah ga ŋa pu ki piir Tidindaan aasui na la. 33Un kpa puu na, utafal bi dulnyaa wee aabɔr ni la, u dakl waah ga ŋa pu ki piir upuu aasui na la. 34Upii u kpa chal na, ni usaapɔɔn u kaa nyi uja na, bi mu aa kpaa. Un kaa kpa chal kaa nyi uja na, utafal bi Tidindaan aabɔr ni la; u ban ke uwon ni waawiin li bi chain. Un kpa chal na, utafal bi dulnyaa wee aabɔr ni la, u dakl waah ga ŋa pu ki piir uchal aasui na la. 35M ban m ter nimi la. Nima le cha m len kena. Naa ye ke m ban m leŋ nimi la. M ban ke ni li ŋani tiwan mɔmɔk mbamɔm, ninimbil li man Tidindaan aabɔr pu, nibaa taa leŋ nimi. 36Uja yaa kpa bisal u jer lichamɔln na kan, ki yaa dak ke u jinn ubisal inimɔɔn kan, ni yaa muk ute kan, cha u ŋa waah ban pu na, cha u kunn ubisal ngbaan uchal do. Naa bir. 37Nibaakan uja ubaa bi le ki kpa nsan ki ga ŋma ŋa waah gee pu na, unii ubaa aa chuu u mpɔɔn, waalandak mu aa kpelni, le u di ŋa usui ni ke waan di ubisal kunn uchal do, udaan ngbaan ŋa ni ŋan la. 38Nima pu na, uja u kunn ubisal uchal do na, u ŋa ni ŋan la. Uja mu u kaa kunn ubisal uchal do na, u ŋa ni ŋan ki jer uja u kunn ubisal uchal do na. 39N-yoonn mumɔk upii ni uchal bi na, upii ye uchal yoo la. Uchal yaa kpo kan u ga ŋma mɔn uja u dii Tidindaan aasan na u waah gee u na. 40M mu dak ke u yaa bi ke waah bi pu na kan, u ga li kpa mpopiin ki jer u yaa ki mɔn kan. M mu dak ke m kpa Uwumbɔr Aafuur nyaan.

will be added

X\