1 KORINT YAAB 2

1Nnaabitiib, nima pu na, maah nan dan nan tuk nimi Uwumbɔr aabɔr na, maa nan di mmɔmɔɔn ni binib aalan ki tuk nimi. 2Ba pu? maa nan ban m dak tibɔr tibaa nikaasisik ni see Yesu Kristo aabɔr, ni waah kpo ndɔpuinkoo pu na aabɔr. 3Maah nan bi ni chee na, m nan ye udabur la. Ijawaan pu, le nwon nan gbaar. 4M nan joo Uwumbɔr aaliin ki tuk nimi, kaa nan joo mmɔmɔɔn ni binib aalan ki tuk nimi. M nan tuk nimi Uwumbɔr aaliin ki mɔk nimi Waafuur nyaan aah kpa mpɔɔn pu na; 5ba pu? m nan ban ke ni gaa Yesu ki kii Uwumbɔr aapɔɔn pu, naa ye binib aalan pu. 6Tɔ, ti len nlan ki tuk binib bi chikr Uwumbɔr aaliin wɔb na. Nlan ngbaan mu aa ye dulnyaa aalan, ki mu aa ye dulnyaa wee aabɔrb aalan. Dulnyaa wee aabɔrb aapɔɔn bi bar la. 7Ti len Uwumbɔr aabɔbɔrkaan aalan, mu nan bɔr na. Uwumbɔr aah kaa nan kee naan dulnyaa wee na, u nan dakl nlan mue, ke ti mu ti ji waamɔɔn. 8Dulnyaa aabɔr ubaa aa bee nlan ngbaan. Bi yaa ba bee kan, baa ba ga kpaa Tidindaan u yeh tiwan mɔmɔk na, ndɔpuinkoo pu. 9Ni ŋmee Uwumbɔr aagbaŋ ni ke "Tiwan ni binib aanimbil aa kee kan ni na, bitafal aa kee ŋun ni na, baalandak aa kee dak naabɔr ni na, nima le Uwumbɔr ŋa ki tii binib bi gee u na." 10Le Uwumbɔr cha Waafuur nyaan kpiir tiwan ngbaan ki mɔk timi. Ba pu? Mfuur nyaan ngbaan bee tiwan mɔmɔk, ki bee Uwumbɔr aasui ni aabɔr mu. 11Unibɔn ma kan, ubaa aa nyi usui ni aabɔr. Waawiin mu bi u ni na baanja le nyi. Kena ubaa aa nyi Uwumbɔr aasui ni aabɔr. Uwumbɔr Aafuur nyaan baanja le nyi. 12Timi, naa ye dulnyaa wee aabimbin le ti gaa. Uwumbɔr Aafuur nyaan le ti gaa, aan ti bee tiwan ni Uwumbɔr tii timi na waabulchin pu na. 13Tibɔr ngbaan le ti joo tuk binib. Naa ye iliin i binib aalan mɔk timi na, le ti joo tuk bi. Ti joo iliin i Uwumbɔr Aafuur nyaan mɔk timi na la. Ti joo Uwumbɔr Aafuur nyaan aaliin ti li tuk binib Waafuur nyaan aabɔr. 14Unii u kaa kpa Uwumbɔr Aafuur nyaan na, u yii Mfuur nyaan aabɔr, ki dak ke Mfuur nyaan aabɔr ye kijɔrk aabɔr la. Uwumbɔr Aafuur nyaan le cha binib bee mu aabɔr. Nima pu na, un kaa kpa Uwumbɔr aafuur nyaan na, waa ŋma bee mu aabɔr. 15Un kpa Uwumbɔr Aafuur nyaan na bee tibɔr mɔmɔk, le unii ubaa aa bee udaan ngbaan aabimbin. 16Ŋmaa nyi Uwumbɔr aalandak? Ŋmaa ga ŋma mɔk u waah ga ŋa pu na? Timi, ti kpa Kristo aalandak la.

will be added

X\