1 Nnaabitiib, m ban m teer nimi maah nan tuk nimi tibɔnyaan ti na. Ni nan gaa tibɔnyaan ngbaan, ki sil ti pu. 2 Tibɔnyaan ngbaan mu pu le ni ŋmar. Ni yaa joo maah tuk nimi ti na mbamɔm, ki yaa kaa gaa ti ki kii fam kan, ni ŋmar a. 3 Maah nan gaa tibɔnyaan ngbaan na, tima le m nan di ki tuk ni mu. Ti ye tibɔrkpaan ki jer tibɔr mɔmɔk. Tibɔnyaan ngbaan le ye ke Kristo nan kpo timi aatunwambir pu. Ni ŋmee kena Uwumbɔr aagbaŋ ni. 4 Le bi nan di u di sub. Iwiin itaa daal le Uwumbɔr fikr u nkun ni. Ni ŋmee kena Uwumbɔr aagbaŋ ni. 5 Waah fikr nkun ni na, le Siifas kan u. Le waakpambalb kipiik ni bilee mu kan u. 6 Le waadidiliib jer ikub iŋmu mu nan kpaan kan u. Bi ponn ni pam beenin bi, le bibaa mu kpo. 7 Le Jems mu kan u. Le Yesu aakpambalb mɔmɔk mu kan u. 8 Gbilngbiln yaan le m mu kan u. Min u bi ke baah ker ubo u lii na, m mu kan u. 9 Yesu aakpambalb mɔmɔk jer mi. Maa ŋeer bin yi mi ke Yesu aakpambal; ba pu? m nan ŋa waanib falaa. 10 Le Uwumbɔr aah ter mi pu na, m bi ke maah bi pu dandana na. Waah ter mi pu na, waa ter mi yooli. M tun lituln ki jer Yesu aakpambalb mɔmɔk. Ni mu aa ye min le tun lituln ngbaan. Uwumbɔr aaterm mu bi m chee na, le cha m tun. 11 Nima pu na, min le yaa nan tuk nimi tibɔnyaan ngbaan, bee bima le yaa nan tuk nimi kan, ti mɔmɔk tuk nimi kena la, ni mu gaa ti ki kii kena la. 12 Tɔ, taah nan tuk nimi ke Uwumbɔr fikr Kristo nkun ni na, ni ponn ni bibaa ŋa kinye ki len ke binib bi kpo na aan fikr nkun ni. 13 Bi yaa len ke binib bi kpo na aan fikr nkun ni kan, ni ŋmɔk ke Uwumbɔr aa fikr Kristo nkun ni. 14 Uwumbɔr yaa kaa nan fikr Kristo nkun ni kan, taah tuk nimi tibɔnyaan ti na mu, ti ye yooli la. Ni mu gaa Yesu ki kii yooli la; 15 ni mu ŋmɔk ke ti mɔn nnyaamɔn paan Uwumbɔr; ba pu? ti len ke u fikr Kristo nkun ni. Ni yaa ye mbamɔn ke binib bi kpo na aan fikr nkun ni kan, ni ŋmɔk ke Uwumbɔr aa fikr Yesu mu nkun ni. 16 Ba pu? Bi yaa len ke binib bi kpo na aan fikr nkun ni kan, ni ŋmɔk ke Uwumbɔr aa fikr Kristo mu nkun ni. 17 Uwumbɔr yaa kaa nan fikr Kristo nkun ni kan, ni gaa u ki kii yooli, ni beenin bi nimi aatunwambir ni. 18 Binib bi nan dii Yesu ki kpo na mu, ni ŋmɔk ke bi mu bee yooli. 19 Ti yaa kpa limakl Kristo pu dulnyaa wee ponn ni baanja kan, ti kpa kinimbaak ki jer binib mɔmɔk. 20 Tɔ, ni ye mbamɔn la, Uwumbɔr sil fikr Kristo nkun ni. Uma le ye njan aanii u puen fikr nkun ni na, le ki mɔk ke binib bimɔk kpo na mu ga nan fikr nkun ni. 21 Uja ubaa pu, le nkun bi. Uja ubaa mu pu, le bin kpo na mu ga fikr nkun ni. 22 Adam pu, le binib mɔmɔk kpu. Kristo pu, le binib mɔmɔk ga kan limɔfal. 23 Kena le bi ga li paa tɔb pu. Kristo le ye njan aanii u puen fikr nkun ni na. U yaa gir ni kan, bin ye uyaab na, bi mu ga fikr nkun ni. 24 Tiwan nimina mɔmɔk yaa ti ŋa kan, le tiwan mɔmɔk ga doo. N-yoonn ngbaan le u ga kuln waadim aaboŋ mɔmɔk aapɔɔn, ki di nnaan di tii Ute Uwumbɔr, 25 ki ga li ye Ubɔr ki nan saa buyoonn u di waadim mɔmɔk ŋa utaapɔtaan ni na. 26 Kookoo aadin u ga bii u na le ye nkun. 27 Uwumbɔr aagbaŋ le len ke u di tiwan mɔmɔk di ŋa Kristo aataapɔtaan ni, ni kii waamɔb. Uwumbɔr aagbaŋ aah len ke u cha tiwan mɔmɔk kii Kristo aamɔb na, nima le aa ŋmɔk ke Uwumbɔr ubaa mu ga kii waamɔb. 28 Uwumbɔr yaa cha tiwan mɔmɔk kii Kristo aamɔb kan, le Kristo, u ye Uwumbɔr Aajapɔɔn na, u mu ga kii Uwumbɔr u nan cha tiwan mɔmɔk kii waamɔb na, aamɔb. Nima kan, tiwan mɔmɔk pel pel Uwumbɔr le ga li joo. 29 Tɔ, ni muin binib bibaa nnyun ni, ke bin sil bin kpo na aasisiiyaan la. Bibaa yaa bui ke bin kpo na aan fikr nkun ni kan, ba pu ni muin binib nnyun ni baasisiiyaan? 30 Binib yaa kaan fikr nkun ni kan, ba pu ti kanni linimaln n-yoonn mɔmɔk? 31 Nnaabitiib, idaa mɔmɔk m chuun nkun ni la. M kpa kipupuk ni pu Tidindaan Yesu Kristo aasan ni, nima le cha m len kena. 32 Ipeel nan tak mi Efesus aatiŋ ni. M yaa po ye unibɔn u kaan fikr nkun ni kan, m kan tinyoor ni pu uu? Aayii. Bin kpo na yaa kaan fikr nkun ni kan, "Cha ti li ji ki li nyu; ba pu? ti ga fo kpo fon." Tɔ, ni ye mbamɔn, bin kpo na ga sil fikr nkun ni la. 33 Ni taa cha unii ubaa ŋmann nimi man. "Ni yaa dii binib bi kaa ŋan na kan, nimi aabimbin nyaan ga bii." 34 Fiin ngeen pu man, ki tun lituln li ŋan na, ki taa ki tun titunwambir. Ni ponn ni bibaa aa nyi Uwumbɔr. M len kena ke m jinn nimi inimɔɔn la. 35 Le unii ubaa ga baa ke "Bin kpo na ga ŋa kinye ki fikr nkun ni? Bi yaa fikr nkun ni kan, tiwon ngbaan aaboln ga li bi kinye?" 36 Ujɔr, aa yaa di lijikaabuul di bun kan, li yaa kaa kpo kan, laan punn. 37 Lijikaabuul li aa di bun na, laa bi ke li ga lu na aah ga li bi pu na. Ni po ye lijikaabuul la, nibaakan idi, nibaakan tijikaar tiken. 38 Le Uwumbɔr tii lijikaabuul ngbaan tiwon waah gee pu na. U tii lijikaabuul mɔmɔk aawon aaboŋ aaboŋ. 39 Tiwan mɔmɔk aawon aa kpaan. Binib aawon bi tibaa, tiwankur mu aawon bi tibaa, inyoon mu aawon bi tibaa, ijan mu aawon bi tibaa. 40 Paacham aawan mu bi la, le ki cha kitiŋ aawan. Paacham aawan kpa kinyaan, kitiŋ aawan mu kpa kinyaan. Naanyaan mu aa kpaan. 41 Nwiin ni uŋmal ni ŋiŋmabil kpa kinyaan; ni mu aanyaan aa kpaan; ŋiŋmabil mɔmɔk aanyaan mu aa kpaan. 42 Binib yaa nan fikr nkun ni kan, ni ga nan li bi kena la. Tiwon ti bi di sub na, ni ye tiwan ni ga bur na la. Ni yaa fikr nkun ni kan, ni ga nan li ye tiwon ti kaan ŋma bur na la. 43 Tiwon ti bi di sub na, aa ye lisil aawon. Tiwon ti ga nan fikr nkun ni na, tima le ga li ye lisil aawon. Tiwon ti bi di sub na aa kpa mpɔɔn. Tiwon ti ga nan fikr nkun ni na, tima le ga li kpa mpɔɔn. 44 Tiwon ti bi di sub na, ti ye dulnyaa aawon la. Tiwon ti ga nan fikr nkun ni na ga nan ŋeer Uwumbɔr Aafuur nyaan aah ban pu na la. Dulnyaa wee ponn ni aawon aah bi na, tiwon ti ga ŋeer Uwumbɔr Aafuur nyaan aah ban pu na mu bi la. 45 Ni ŋmee Uwumbɔr aagbaŋ ni ke Uwumbɔr nan naan njan aanii Adam, ki tii u limɔfal. Kookoo yoo le ye Mfuur nyaan mu tii timi limɔfal li kaa kpa ndoon na. Uma le ye Kristo. 46 Njan ti kpa dulnyaa aawon. Leelee le ti ga kan tiwon ti ga ŋeer Uwumbɔr Aafuur nyaan aah ban pu na, paacham. 47 Uwumbɔr nan di titan le naan njan aanii Adam. U nyan ni kitiŋ la. Leelee aanii, u ye Kristo na, uma le nyan ni Uwumbɔr do. 48 Binib bi ye kitiŋ yaab na bi ke un nyan ni kitiŋ na aah bi pu na la. Bin ye Uwumbɔr do yaab na, bi mu bi le ke un nyan ni paacham na aah bi pu na la. 49 Ti naahn unii u nyan ni kitiŋ na la. Kena le ti ga li naahn un nyan ni Uwumbɔr do na mu. 50 Nnaabitiib, maah len pu na le ye ke tiwon ti ye tinann ni nsin na, aan ŋma koo Uwumbɔr aanaan ni. Nin ga bur na mu aan ŋma le ye nin kaan bur na. 51 Li pel man, m ga tuk nimi tibɔr ti bɔɔ na. Timi bibaa ga kpo, bibaa mu ga pii Kristo aah ga gir ni bundaln na. Le ti mɔmɔk ga kpaln. 52 Kaakaan yaa wii kookoo yaan kan, libuul ngbaan ni le ti ga kpaln. Naan pii linimbil aah ga kab pu na. Le kaakaan ga nan wii, le bin kpo na ga fikr nkun ni, kaan ki bur. Le Uwumbɔr ga kpaln timi aawon. 53 See tiwon timina ti ga bur na kpaln tiwon ti kaan ki bur na, tiwon ti ga kpo na kpaln ti kaan kpo na. 54 Tiwon ti ga bur na yaa nan kpaln ti kaan bur na kan, tiwon ti ga kpo na yaa nan kpaln ti kaan ki kpo na kan, leyaadaal ngbaan le Uwumbɔr aagbaŋ aah len pu na ga gbiin ke "Uwumbɔr nyaŋ nkun, ki kuln mu. 55 Nkun aapɔɔn bi la chee? Nkun aaween ki bi la chee?" 56 Titunwambir le ye nkun aaween. Uwumbɔr aakaal le mɔk timi ke titunwambir aa ŋan. 57 Le ti dooni Uwumbɔr; ba pu? Tidindaan Yesu Kristo pu le u tii timi bunyaŋ. 58 Nnaabigeem, nima pu na, n-yoonn mɔmɔk ni li tun Tidindaan aatuln saakpen, ki taa cha nibaa leŋ nimi. Ni li bi li ni; ba pu? ni nyi ke ni yaa tun lituln Tidindaan pu kan, naa tun fam.
