1 KORINT YAAB 12

1Nnaabitiib, m ban ke ni bee tibɔr ti joo cha Uwumbɔr Aafuur nyaan aapiin wɔb na. 2Ni bee ke naah kaa nan kee dii Uwumbɔr aasan na, ni nan dii ŋiwaa ŋi ye bibirb na. Ŋi nan cha ni yenni n-yoonn mɔmɔk la. 3Nima pu na m ban ke ni bee ke Uwumbɔr Aafuur nyaan aapɔɔn yaa cha unii len tibɔr kan, waan ŋma sii Yesu. Unii ubaa mu aan ŋma len ke Yesu le ye Udindaan see Uwumbɔr Aafuur nyaan le ga cha u len kena. 4Uwumbɔr Aafuur nyaan aapiin aaboŋ aaboŋ le bi; Mfuur nyaan mubaa ngbaan le tii timi ipiin ngbaan mɔmɔk. 5Lituln aaboŋ aaboŋ mu bi; Tidindaan ubaa le ti tun tii. 6Uwumbɔr aapɔɔn le cha binib tun lituln aaboŋ. Le Uwumbɔr u cha unii mɔmɔk tun lituln ngbaan mɔmɔk na, u ye ubaa. 7Uwumbɔr Aafuur nyaan tii unii mɔmɔk waapiin, ke un di ter Uwumbɔr aanib biken. 8Mu cha ubaa len nlan aaliin. Muma muchachaan cha ubaa mu bee tibɔr ki len. 9Muma muchachaan cha ubaa mu gaa Uwumbɔr ki kii mbamɔm. Muma muchachaan ngbaan le tii ubaa mu ipiin un teei bibum. 10Mu tii ubaa mu mpɔɔn un tun lijinjiir aatun. Mu cha ubaa mu nabr Uwumbɔr aah len pu na. Mu cha ubaa mu bee mu ye Uwumbɔr Aafuur nyaan na, ni mu kaa ye na. Mu cha ubaa mu len iliin yaayan. Mu cha ubaa mu nabr iliin yaayan ngbaan. 11Uwumbɔr Aafuur nyaan muchachaan ngbaan le cha unii mɔmɔk tun lituln ngbaan mɔmɔk. Mu yakr tii unii mɔmɔk ipiin aaboŋ aaboŋ mu aah ban pu na. 12Tiwon kpa tiwan pam, ki tee ye tiwonbaan la. Kristo aanib mu bi kena la. Bi wiir, ki mu ye unibaan la. 13Ti ponn ni bibaa ye Juu yaab, bibaa mu ye bin kaa ye Juu yaab na, bibaa mu ye binaagbiib, bibaa mu ye bimalb, le Yesu gbiin ti mɔmɔk Mfuur nyaan mubaa ni, ki kpaan timi unibaan. U cha ti mɔmɔk kan Mfuur nyaan mubaa la. 14Tɔ, tiwon aa kpa tiwan nibaa baanja. Ti kpa tiwan kipaak la. 15Kitaafaak yaa bui ke "Maah kaa ye kiŋaafaak na, maa ye tiwon aawan" kan, naa ye tiwon aawan aa? 16Litafal mu yaa bui, "Maah kaa ye linimbil na, maa ye tiwon aawan" kan, naa ye tiwon aawan aa? 17Tiwonmɔn yaa ba ye linimbil ŋmeen kan, ti ba ga ŋa kinye ki ŋun? Ti yaa ba ki ye litafal ŋmeen kan, ti ba ga ŋa kinye ki ŋun nnun? 18Le naah ye pu na, Uwumbɔr le di tiwon aawan mɔmɔk ki di saŋ tɔb ponn ni, waah ban pu na. 19Tiwonmɔn yaa ba ye liwambaal kan, ni ba ga li ye tiwon aa? 20Le naah ye pu na, tiwon kpa tiwan aaboŋ aaboŋ, le ki ye tiwonbaan. 21Nima pu na linimbil aan ŋma tuk kiŋaafaak, "Maa ban si." Liyil mu aan ŋma tuk titaafar, "Maa ban si." 22Tiwon nin chee kaa kpa mpɔɔn ke niken na, see ni mu li bi. 23Tiwon nin chee lann lisil na, ti ga tii nima chee lisil ki jer niken. Le tiwon nin chee kaa ŋan na, ti ga ŋa nima chee ni ŋaŋ. 24Le tiwon nin chee ŋan na, naa ki ban nterm. Uwumbɔr le di tiwon aawan di saŋ tɔb ni, ki di lisil di tii nin chee ni lann lisil na. 25Nima na, tiwon aawan aan li kpak tɔb kinikpakpak, ni ga li ter tɔb ke naah ter nibaa pu na. 26Tiwon nibaa chee yaa ji falaa kan, ni mɔmɔk ga kpaan ji falaa kena. Nibaa chee mu yaa kan nnyuŋ kan, ni mɔmɔk ga li kpa mpopiin. 27Nimi le ye Kristo aawon. Unii mɔmɔk ye waawon aawan nibaabaa. 28Uwumbɔr di timi ki di ŋa waanib ponn ni la; njan, bibaa ye Yesu aakpambalb; leeler, bibaa mu ye Uwumbɔr aabɔnabtiib; taatar, bibaa mu ye bimɔmɔkb; le u tii bibaa mu mpɔɔn bin tun lijinjiir aatun; ki tii bibaa mu ipiin bin teei bibum; bibaa mu ye biteterb; bibaa mu ye biyidam; bibaa mu len iliin yaayan. 29Ti mɔmɔk ye Yesu aakpambalb aa? Ti mɔmɔk ye Uwumbɔr aabɔnabtiib aa? Ti mɔmɔk ye bimɔmɔkb aa? Ti mɔmɔk kpa mpɔɔn ki tun lijinjiir aatun aa? 30Ti mɔmɔk ŋma teei bibum aa? Ti mɔmɔk len iliin yaayan aa? Ti mɔmɔk ŋma nabr iliin yaayan ngbaan aa? 31Tɔ, cha ninimbil li man ipiin i ŋan ki jer iken na pu. Le m ga mɔk nimi nsan mu ŋan ki jer muken na.

will be added

X\