Psalms 86

1Abeet GODAU, taani hiyyeesanne metootanchcha asa gidiyo gishshau, ta waasuwaa siyada, taassi alla. 2Taani Xoossaa asa gidiyo gishshau, tana paxa wotta. Nenan ammanettiya tana, ne ashkkaraa ashsha. Neeni ta Xoossaa. 3Abeet Godau, taani gallassa ubbaa neeyyo waassiyo gishshau, taayyo qaretta. 4Abeet Godau, taani ta shemppuwaappe nena woossiyo gishshau, tana, ne ashkkaraa ufaissa. 5Abeet Godau, neeni kehanne atto giyaagaa; nena xeegiya ubbaayyo aggenna ne siiqoi dariyoogaa. 6Abeet GODAU, ta woosaa siya; taani watiwatiyo watiwatuwaa ezgga. 7Neeni taayyo alliyo gishshau, ta metuwaa gallassan taani neeyyo waassais. 8Abeet Godau, xoossatu giddon ne mali baawa; ne oosuwaa mala oosoikka baawa. 9Abeet Godau, neeni medhdhido kawotettaa asai ubbai yiidi, ne sinttan gulbbatana; eti ne sunttaa bonchchana. 10Aissi giikko, neeni gita; neeni maalaalissiyaabaa oottaasa. Ne xalaalai Xoossaa. 11Abeet GODAU, taani ne tuman hemettana mala, tana ne ogiyaa tamaarissa. Taani ne sunttaayyo yayyana mala, taayyo issi wozanaa imma. 12Abeet Godau ta Xoossau, taani nena ta kumetta wozanaappe galatana. Ne sunttaa merinau bonchchana. 13Aissi giikko, aggenna ne siiqoi taayyo daro; neeni tana duufuwan geliyoosaappe ashshadasa. 14Abeet Xoossau, otoranchcha asati ta bolli denddidosona; daganttiya asatu citai tana woranau koyees. Eti nena wudokkona. 15SHin abeet Godau, neeni qarettiyanne maariya Xoossaa; hanqqettanau gam77iyaagaa; aggenna siiqoinne ammanettiyoobai dariyoogaa. 16Taakko simmada taayyo qaretta. Ne ashkkaraayyo wolqqaa imma; ne ashkkaree na7aa tana ashsha. 17Abeet GODAU, ne kehatettaa malaataa tana bessa. Neeni tana maaddidoogaanne minttettidoogaa be7iyo wode, tana ixxiyaageeti hegan yeellatana.

will be added

X\