1 I ta cenggurssaanne ta watiwatuwaa siyido gishshau, taani GODAA siiqais. 2 I ba haittaa taakko yeggido gishshau, taani paxa de7ido keenan ubban a xeesana. 3 Haiqoi piredan tana oiqqanau haniis; moogettana hirggai tana iissiis. Tana gashee toliis. 4 He wode taani, "Abeet GODAU, hadara! Tana ashsha" yaagada GODAA sunttaa xeesaas. 5 GODAI kehanne maariyaagaa; nu Xoossai qarettiyaagaa. 6 GODAI maaddiyaabi bainnaageeta naagees; taani metootido wode, i tana ashshiis. 7 Tanooshsho, simmi woppu ga; aissi giikko, GODAI neeyyo kehiis. 8 GODAI tana haiquwaappe, ta aifiyaa afuttaappe, ta tohuwaakka xubiyaappe ashshiis. 9 Hegaa gishshau, taani paxa de7iyaageetu giddon, GODAA sinttan hemettais. 10 Taani, "Tana gashee toliis" giyo wodekka, ta ammanuwaa aggabeikke. 11 Taani dagammada, "Asi ubbi worddo" yaagaas. 12 I taassi kehido kehatettaa gishshaa taani GODAASSI ai qanxxanau danddayiyaanaa? 13 Taani wancca kumetta woiniyaa eessaa galataassi shiishshaidda, GODAA sunttaa xeegana. 14 A asaa ubbaa sinttan taani shiiquwaa GODAAYYO gattana. 15 Geeshshatu haiqoi GODAA sinttan keehi daroppe bonchchettidaagaa. 16 Abeet GODAU, taani ne ashkkaraa; ee, taani ne ashkkaraa, ne ashkkaree na7aa. Tana qashuwaappe neeni birshshadasa. 17 Abeet GODAU, taani galataa yarshshuwaa neeyyo yarshshana; yarshshada ne suntta xeegana. 18 Asaa ubbaa sinttan taani shiiquwaa GODAAYYO gattana. 19 Hegaakka taani gattanaagee, Yerusalaamen de7iya GODAA keettaa dabaabaana. GODAA galatite!
