1 Abeet GODAU, ta woosaa siya; ta waasoi neekko gakko. 2 Ta waayiyaa gallassi ne som77uwaa taappe genttoppa. Ne haittaa taakko yegga; taani neeyyo waassiyo wode, taayyo eesuwan alla. 3 Aissi giikko, ta laittai cuwaadan xayees; ta asatettaikka tamaa bonqquwaadan eexxees. 4 Taani shoci yeggido mela maataadan hanaas; qumaikka taayyo meetettenna. 5 Taani ta qaalaa xoqqu oottada oolais; ta gogai meqettaara ohettiis. 6 Taani bazzon de7iya ankko mala, woikko qoqqofettida keettan de7iya gutto mala. 7 Taani zin77in, xiskkoi yeenna; taani keettaa huuphiyan barkka uttida kafo mala. 8 Ta morkketi gallassa ubban tana cayoosona; tana qilliicciyaageeti ta sunttan qanggoosona. 9 Ne hanqquwaanne ne yiilluwaa gishshau, taani bidinttaa qumadan mais; qassi ta afuttaa ta ushshaara walakkais. Neeni tana pude denttada, wora oladasa. 11 Ta de7o laittai omarssa kuwaa mala; taani maataadan melais. 12 SHin abeet GODAU, neeni kawotaa araatan merinaayyo uttadasa; ne sunttaikka yeletaappe yeletaa gakkanaassi hassayettana. 13 Neeni denddada, Xiyoonessi qarettana; aissi giikko, neeni a maariyo wodee gakkiis; hagee neeni doorido wodiyaa. 14 I qolettidaagaa gidikkokka, ne ashkkarati a siiqoosona. I moorettidaagaa gidikkokka, eti ayyo qarettoosona. 15 Kawotettati GODAA sunttaayyo yayyana; sa7aa kawoti ubbai a anggaayyo dagammana. 16 Aissi giikko, GODAI Xiyoone zaaretti keexxidi, i ba gitatettaa bessana. 17 I hiyyeesatu woosaa siyana; eta watiwatuwaa karenna. 18 Biron yelettana asati GODAA galatana mala, hagee yiya yeletaayyo xaafetto. 19 GODAI xoqqan de7iya ba geeshsha sohuwaappe duge xeelliis; i saluwaappe duge sa7aa dereqqiis. 20 Hegeenne, qashettida asatu ooliyaa siyanaassanne haiquwaassi pirddettida asata birshshanaassa. 21 Hegaa gishshau, GODAA sunttai Xiyoonen odettananne a galatai Yerusalaamen awaajettana. 22 Deretettainne kawotettai issippe shiiqidi, GODAAYYO he wode goinnana. 23 I taani yelagatettan de7ishin, ta wolqqaa ixissiis; ta bariyaa qanttiis. 24 Yaatin, taani, "Abeet ta Xoossau, taani de7uwaa biron giddottishin, tana ekkoppa" yaagais. Abeet GODAU, neeni yeletaappe yeletaa gakkanaassi de7aasa. 25 Neeni beni sa7aa medhdhadasa; saloikka ne kushe ooso. 26 Hegeeti ubbai xayana; shin neeni de7ana; eti ubbaikka afaladan wurana. Neeni eta curqqa afaladan laammana; etikka aadhdhana. 27 SHin neeni nenakka; ne laittai mule wurenna. 28 Nuuni ne ashkkarata; nu naati sarotettan de7ana. Eta zerettaikka ne sinttan minnidi eqqana.
