2 Kings 6

1Hananabaa yootiyaageetu citai Elssaa7a, "Hagaa be7a! Nuuni de7iyo sohoi nuna daroppe un77ees. 2Nuuni ubbatikka mittaa qanxxanau Yorddaanoosa SHaafaa ane boos. Yan nuuyyo de7iyo soho ane keexxoos" yaagidosona. Yaagin Elssaa7i, "Biite" yaagiis. 3Yaagin hananabaa yootiyaageetuppe issoi, "Hayyanaa neenikka ne ashkkaratuura nunaara hinddarkkii?" yaagiis. Yaagin Elssaa7i, "Eeno baana" yaagidi zaariis; 4yaatidi etaara issippe biis. Biidi eti Yorddaanoosa gakkido wode, mittaa qanxxuwaa doommidosona. 5SHin etappe issoi mittaa qanxxishin, beexiyaa aifee kessi ekkidi, haattaa giddon geliis. Gelin he bitanee, "Hai ta godau, taani garxxa ekkidoogaa; shin waanooshsha!" yaagidi waassiis. 6Waassin Xoossaa asi, "Awan gelidee?" yaagidi oichchiis; oichchin bitanee gelido sohuwaa bessiis. Bessin Elssaa7i gatimaa qanxxidi, haattan oliis; olin beexiyaa aifee haattaa bollan toohettiis. 7Hegaappe guyyiyan, Elssaa7i bitaniyaa, "Kessada ekka" yaagiis. Yaagin bitanee ba kushiyaa yeddidi ekkiis. 8Sooriyaa biittaa kawoi Israa7eelatuura olettiiddi de7ees. Yaanidaagee ba ola gadaawatuura zorettiiddi, "Taani hiqqasan, hiqqasan qatuwaa medhdhana" yaagiis. 9Xoossaa asi Elssaa7i Israa7eela kawuwaakko asa kiittidi, "Sooriyaa asati he sohuwaa duge wodhdhiyo gishshau, he sohuwaara kanttoppa" yaagiis. 10Hegaa gishshau, Israa7eela kawoi Xoossaa asi malaatido sohuwaa kiittidi, yan de7iya asai naagettanaadan hassayissiis. Kawoi naagettana mala, Elssaa7i wodiyan wodiyan hassayissiis. 11Ha yohoi Sooriyaa kawuwaa keehippe hanqqetissiis; yaatin i ba ola gadaawata xeesidi, "Nu giddon Israa7eela kawuwaa bagga gididai oonakko ane taayyo yootite" yaagidi oichchiis. 12A ola gadaawatuppe issoi, "Ta godau, kawuwau, nu giddon hegaa oottiyai ooninne baawa. SHin ne siirixan de7aidda neeni haasayiyoobaa ubbaa Israa7eelan de7iya hananabaa yootiya Elssaa7i Israa7eela kawuwaayyo yootees" yaagiis. 13Yaagin kawoi, "Taani asa kiittada a omooddanaadan, biidi awan de7iyaakkonne koyite" yaagiis. Guyyeppe eti, "I Dootaana giyo kataman de7ees" yaagidi yootidosona. 14Yootin kawoi daro olanchchata paratuuranne paraa gaaretuura yaa yeddiis. He yeddidoogeeti qammi yiidi, katamaa dooddidosona. 15Xoossaa asa Elssaa7a ashkkarai wonttetta gallassi guuraara denddidi, kare kiyiyo wode, olanchchati paratuuranne paraa gaaretuura katamaa dooddi wottidosona. He ashkkarai, "Aayye7ana nunoo! Ta godau, nuuni waananee?" yaagidi oichchiis. 16Oichchin i, "Yayyoppa! Nunaara de7iyaageeti etaara de7iyaageetuppe daroosona" yaagidi zaariis. 17Hegaappe guyyiyan Elssaa7i, "Abeet GODAU, i be7anaadan a aifiyaa poga" yaagidi woossiis. Woossin GODAI Elssaa7a ashkkaraa aifiyaa pogin, Elssaa7a yuusho ubban de7iya tamaa paratinne paraa gaaretinne keraa maayidaageeta be7iis. 18Sooreti a bolli woraajjido wode Elssaa7i, "Ha asatu aifiyaa qooqissarkkii" yaagidi GODAA woossiis. Elssaa7i woossidoogaadan GODAI eta aifiyaa qooqissiis. 19Hegaappe guyyiyan, Elssaa7i eta, "Ogee hagaa gidenna; katamaikka hagaa gidenna. Intte koyiyo asa taani inttena bessana; tana kaallite" yaagiis. Yaagidi eta kaalettidi, Samaariyaa katamaa efiis. 20Eti Samaariyaa katamaa gelosaarakka Elssaa7i, "Abeet GODAU, ha asati xeellanaadan eta aifiyaa poga" yaagiis. Yaagin GODAI eta aifiyaa pogin, eti Samaariyaa giddon de7iyoogaa be7idosona. 21Israa7eela kawoi eta be7ido wode Elssaa7a, "Ta aawau, taani eta woroo? Taani eta woroo?" yaagidi oichchiis. 22Oichchin Elssaa7i, "CHii woroppa! Hageeti attin, neeni ne bisuwaaninne ne wonddafiyan omooddidoogeetakka woranau bessenna. Eti miidi uyidi bantta godaakko baanaadan, oittaanne haattaanne eta sintti aatta" yaagiis. 23Hegaa gishshau, Israa7eela kawoi etau gibiraa giigissiis. Giigissin eti miidoogaappenne uyidoogaappenne guyyiyan, i eta yeddin, bantta godaakko simmidosona. He wodeppe doommin, Sooreti Israa7eelatu bollan woraajjiyoogaa aggi bayidosona. 24Hegaappe guyyiyan, Sooriyaa Kawoi Benihadaadi ba olanchchata ubbaa shiishshidi, biidi Samaariyaa katamaa dooddiis. 25Eti dooddido gaasuwan Samaariyaa kataman hanttaara koshai geliis; gelin issi hariyaa huuphee hosppun tammu xaqara biran, naa77u xeetu giraame gidiya haraphphiyaa shiyai ichchashu xaqara biran baizettiis. 26Israa7eela kawoi katamaa dirssaa gimbbiyaa bollaara aadhdhishin, issi maccaasiyaa, "Ta godau, kawuwau, tana maaddarkkii" yaagada waassaasu. 27Waassin kawoi o, "Nena GODAI maaddennan ixxikko, taani neeyyo maaduwaa auppe demmanau danddayiyaanaa? Kattaa qoxxiyo audiyaappeeyye, woiniyaa aifiyaa gum77iyo sohuwaappee?" yaagiis. 28Qassi i o, "Neeni waanadii?" yaagidi oichchiis. Oichchin maccaasiyaa zaarada, "Ha maccaasiyaa tana, 'Hachchi ne na7aa maanau ekkada ya; qassi wontto nuuni ta na7aa maana' yaagaasu. 29Hegaa gishshau, ta na7aa doissidi miida; wonttetta gallassi taani o, 'Nuuni maanau ne na7aa ekkada ya' yaagaas. SHin a ba na7aa qosaasu" yaagaasu. 30Kawoi maccaasiyaa yootidoogaa siyidi, ba maayuwaa pooshshi oliis. Yaatidi i gimbbiyaa bollaara aadhdhishin, garssa baggaara i maayido waaruwaa asai be7iis. 31Hegaappe guyyiyan kawoi, "SHafaaxa na7aa Elssaa7a guuggee a bolli hachchi pe7ikko, Xoossi tana woro!" yaagiis. 32He wode Elssaa7i ba son uttiis; cimatikka aara issippe de7oosona. Kawoi baappe sinttau asa kiittiis; shin he bitanee gakkanaashin, Elssaa7i cimata, "Ha shemppo woriyaagee ta qooriyaa muucissanau asa kiittidoogaa intte be7eetii? He kiitettidaagee yiido wode, kariyaa gorddidi gelissoppite. A godaikka a kaallidi yiiddi de7ees" yaagiis. 33I cimatuura haasayishin, kiitettidaagee akko yiis. Yin kawoikka yiidi, "Ha metoi GODAAPPE yiis. Yaatin taani hagaappe daruwaa GODAA aissi naagiyaanaa?" yaagiis.

will be added

X\