2 Kings 4

1Hananabaa yootiyaageetuppe issuwaa maccaasiyaa Elssaa7ekko baada, "Ne ashkkarai ta azinai haiqqiis. I GODAASSI yayyiya asa gidiyoogaa neeni eraasa. SHin ha77i a acuwaawai ta naata naa77aa bau aille kessanau yiis" yaagada ayyo waassaasu. 2Waassin Elssaa7i iyyo, "Yaatin taani neeyyo ai oottoo? Ne son aibi de7ii? Ane taayyo yoota" yaagiis. Yaagin maccaasiyaa, "Taayyo ne ashkkareeyyo issi xaaron zaitee de7iyoorippe attin, harabi aibinne baawa" yaagaasu. 3Yaagin Elssaa7i o, "Ba; baada ne shoorotu ubbaappe mela otota garxxa. Garxxaidda guuttaa garxxoppa. 4Hegaappe guyyiyan, soo gelada, ne bollinne ne naatu bolli kariyaa gordda. Gorddada ototu ubban zaitiyaa tiga; zaitee kumido otuwaa otuwaa issi baggi zaara" yaagiis. 5Yaagin maccaasiyaa baada, kariyaa ba bollinne ba naatu bolli gorddaasu. Eti iyyo otota shiishshin, a zaitiyaa tigettaa oiqqa gaasu. 6Oto ubbai kumido wode, maccaasiyaa ba na7aa, "Ane tau hara otuwaa ekkada ya" yaagaasu. SHin na7ai zaaridi, "Hari issi otoinne attibeenna" yaagiis. Hegaappe guyyiyan, zaitee goggiyoogaa aggi bayiis. 7Maccaasiyaa simmada baada, Elssaa7essi odaasu. Odin i "Ba; baada zaitiyaa baizzada, ne acuwaa qanxxa. Attidaagan neeninne ne naatinne go7ettidi de7anau danddayeeta" yaagiis. 8Issi gallassi Elssaa7i issi dure maccaasiyaa de7iyo SHuneema giyo katamaa biis. Bin maccaasiyaa a shoobbada, qumaa mizaasu. He gallassappe doommidi, i hegaara kanttiyo wode ubban, qumaa maanau i soo gelees. 9A ba keettaawaa, "Ha ubba wode nu mataara kanttiya bitanee Xoossaa asa gidiyoogaa taani erais. 10Hegaa gishshau, ane issi guutta kifile bolla pooqiyan assi keexxoos; keexxidi a giddon arssaa, araataa, xaraphpheezaanne xomppiyaa wottoos. Hegaappe guyyiyan, i nuukko yiido wode ubban, hegan gelana danddayees" yaagaasu. 11Issi gallassi Elssaa7i SHuneema katamaa yiidi, ba kifiliyaa pude kiyidi, yan shemppiis. 12Hegaappe guyyiyan, ba ashkkaraa Gehaaza, "Ba; baada he maccaasiyo xeesa" yaagiis; yaagin Gehaazi xeesin, a yaada Elssaa7a sinttan eqqaasu. 13Elssaa7i Gehaaza, "Ha maccaaseeyyo 'Neeni nu gishshau, hagaa ubbaa metootadasa. Yaatin nuuni neeyyo ai oottinoo? Neeyyo nuuni biidi, kawuwaa woikko ola gadaawaa haasayissiyoobi de7ii?' yaagada o oichcha" yaagiis. Yaagin maccaasiyaa, "Taani hagan ta asaa giddon de7ishin, tana metiyaabi baawa" yaagaasu. 14Hegaappe guyyiyan, Elssaa7i Gehaaza, "Yaatin nuuni iyyo ai oottanee?" yaagidi oichchiis. Oichchin Gehaazi, "Iyyo na7i baawa; i azinaikka cimiis" yaagiis. 15Yaagin Elssaa7i, "Maccaasiyo qassikka xeesa" yaagiis. Yaagin o xeesiis; xeesin a yaada, penggen eqqaasu. 16Elssaa7i maccaasiyo, "Laitti hannoode neeni attuma na7aa idimmana" yaagiis. Yaagin maccaasiyaa, "CHii ta godau, neeni Xoossaa asa gidikkii, taayyo worddotoppa!" yaagaasu. 17SHin maccaasiyaa shahaaraasu; Elssaa7i iyyo yootidoogaadan laitti he wode attuma na7aa yelaasu. 18He na7ai dicciis; diccidi issi gallassi kattaa cakkiya asatuura de7iya ba aawaakko biis. 19Biidi ba aawaayyo, "Woo ta huuphiyau! Woo ta huuphiyau!" yaagiis. Yaagin a aawai issi ashkkarau, "Tookkada a aayeekko efa" yaagidi yootiis. 20Yaagin ashkkarai na7aa ekkidi, aayeekko efiis. Efin gallassa seetai gakkanaashin, na7ai ba aayee kiyuwan uttiis; hegaappe guyyiyan, na7ai haiqqi aggiis. 21Maccaasiyaa na7aa pude efaada, Xoossaa asa arssan zin77issaasu. Yaatada a bolli kariyaa gorddada baasu. 22Hegaappe guyyiyan, ba azinaa xeesada, "Taani Xoossaa asakko eesuwan baada yaana mala, ashkkaratuppe issuwaanne haretuppe issuwaanne taayyo yedda" yaagaasu. 23Yaagin i, "Hachchi agina xeero gallassa woikko Sambbata gidennabaa, aibee nena akko efiyai?" yaagiis. Yaagin a, "Aibinne baawa" yaagaasu. 24Hegaappe guyyiyan, hariyaa koorada, ba ashkkaraayyo, "Hariyaa laagga! Taani neeyyo yootana gakkanaashin, leddan laaggoppa" yaagaasu. 25Maccaasiyaa hegaappe denddada, Qarmmeloosa Deriyan de7iya Xoossaa asakko baasu. Elssaa7i maccaasiyaa yiyaaro haahuwan be7idi, ba ashkkaraa Gehaazayyo, "Be7a, SHuneema kataman de7iya maccaasiyaa yausu. 26O mokkanau woxxa baada, 'Neeni saroo? Ne azinai saroo? Ne na7ai saroo?' yaagada oichcha" yaagiis. Yaagin maccaasiyaa, "Nuuni ubbaikka saro" yaagaasu. 27Maccaasiyaa deriyaa bollan de7iya Xoossaa asakko gakkido wode, hokkada a tohuwaa oiqqaasu. Oiqqin Gehaazi maccaasiyo digganau shiiqiis; shin Xoossaa asi a, "Agga! A gita metuwan de7ausu; shin GODAI taappe hegaa genttiis. I metuwaa taayyo yootibeenna" yaagiis. 28Hegaappe guyyiyan maccaasiyaa, "Ta godau, neeni tau na7a immanaadan taani nena oichchidanaa? Taani nena, 'Tana coo mela qaaqqayoppa' yaagabeikkinaa?" yaagaasu. 29Yaagin Elssaa7i Gehaaza, "Ne adussa maayuwaa ne qabattuwan sirqqa; yaatada ta gatimaa ekkada eesota. Ogiyan oonaaranne gaittikko, sarotoppa; ooninne nena sarotikko, zaarada sarotoppa. Ta gatimaa na7aa som77uwan wotta" yaagiis. 30SHin na7aa aayyiyaa, "GODAI ero! Ne shemppoi ero! Taani nena yeggada biikke" yaagaasu. Yaagin Elssaa7i denddidi, o kaalliis. 31Gehaazi etappe sinttatidi biis. Biidi gatimaa na7aa som77uwan wottiis; shin cenggurssi woikko shemppoi baawa. Yaatin Gehaazi Elssaa7eera gaittanau simmidi yiidi, "Na7ai beegottibeenna" yaagidi yootiis. 32Elssaa7i soo gelidi, he na7aa ahai a arssan zin77idaagaa be7iis. 33Be7idi ba bollinne na7aa bollinne kariyaa gorddidi, GODAA woossiis. 34Hegaappe guyyiyan, na7aa ahaa bolli kiyidi, ba doonaa a doonan, ba aifiyaa a aifiyan, ba kushetakka a kushetun gatti wottidi zin77iis. Zin77aanne na7aa bollai ho77iis. 35Ho77in Elssaa7i denddidi, so giddon yaanne haanne simerettiis. Naa77anttuwaakka simmidi, na7aa bolli cogochchidi zin77iis. Yaatin na7ai laapputoo hedhdhishidoogaappe guyyiyan xeelliis. 36Yaatin Elssaa7i Gehaaza xeesidi, "Ane ha SHuneemiyo xeesa" yaagiis. Yaagin Gehaazi o xeesiis. Xeesin a yiido wode, Elssaa7i o, "Ne na7aa ekka" yaagiis. 37Hegaappe guyyiyan, maccaasiyaa Elssaa7a tohuwan wullada, biittan gufannaasu. Yaatada ba na7aa ekkada kare kiyaasu. 38Elssaa7i Gelggala simmidi yiido wode, biittai namisetti uttiis. Hananabaa yootiyaageetu citai a sinttan uttidaashin, i ba ashkkaraa, "Wogga keriyaa taman wottada, ha asatuyyo woxiyaa katta" yaagiis. 39Etappe issoi santta milatiya bonccota maxidi ehaanau gade biis. Biidi mokkida gosiyaa turaa demmiis; demmidi tookkanau danddayiyoogaa keena daro gosiyaa ekkidi yiis. I aibakko erennan anccidi, keriyan yeggiis. 40Asati maana mala, woxiyaa tigidosona. Eti woxiyaa tushkki a mi be7ido wode, "Xoossaa asoo, ha keriyan woriyaabai de7ees!" yaagidi waassidosona. Asati maanau danddayibookkona. 41Yaatin Elssaa7i, "Yaatikko tau xiilliyaa ekkidi yiite" yaagiis. He xiilliyaa keriyan qolidi, "Asai maanaadan woxiyaa tigite" yaagiis. Hegaappe simmin, keriyan iitabi beettibeenna. 42Koiro gakkida kattaappe uuhettida laatamu, banggaa komppuwaa, tiya kattaara issippe ba ogoruwan yeggi ekkidi, Xoossaa asassi ehiya issi bitanee Ba7aali-SHaliisha giyoosaappe yiis. Yin Elssaa7i ba ashkkaraa, "Maanaayyo asau aatta" yaagiis. 43Yaagin a ashkkarai, "Taani xeetu asaa sintti hagaa waata aattoo?" yaagidi oichchiis. SHin Elssaa7i, "Maanaayyo asau aato aatta; aissi giikko, GODAI 'Eti maana; min xarzzaikka attana' yaagees" yaagiis. 44Hegaa gishshau, ashkkarai eta sintti aattin, eti miidosona. Min GODAI giidoogaadan, xarzzai attiis.

will be added

X\