ROMANOS 9

1Kjuakixi= xi texia̱n. Bi te'bonachaa̱ ngat'a makjainna̱ ngat'are Cristo 'ba jngu= makuaa̱. Isennixtjintsjere Na'enchana titsja ndiyare kjuankjin kakunna̱ nga titsuyakixina̱ nga tjin= ndiyare xi tenchjaa̱. 2Ne ba tjimana̱ 'ba niki tjimakjine inimana̱ 3ngat'are nts'ia xi xuta naxinandana̱ mani nga'e ngasun'ndio. Ka'nda mejénna̱ tsakaiñu tsa Na'enchana skaninejena̱ 'ba tsa k'uejñat'axinna̱ Cristo, tsa 'batsa'en ku̱an sik'angia̱ xingia̱. 4Xi naxinandana̱ xutare Israel. Na'enchana kitsa'en ki'ndire. Tsek'ejñajinre 'ba yakutsejenre kjuajere. 'Endako kjua 'ba kitsjare kjuatexumare 'ba yakutsejenre jótsa'en tjinnere nga sichjire 'ba kitsjare ts'a mé= xi sjare. 5Xutare Israel ntje chinga xi kiskja'ajin Na'enchana jendibanire. Xi 'ba nde kio jendibanire Cristo kionga tsaka'a yojore joni xuta ngasun'ndio. 'Ba Cristo, Naina xi batexumare ngayéje mé= xi tjin. Ngatjanichjintsjaire ngantsjai nixtjin. 'Ba ngatjama. 6Tunga bi tsa tsu kjua nga en xi kitsja ts'a Na'enchana bi 'etjusun. Tunga kui= xi ma, bi ngatsi'i xuta xi ndibani xuta chingana xi Israel 'mi, kui fa xi xutare Israel. 7'Ba bi ngatsi'i ntje xi ndibanire Abraham, tsa kui fa xi ki'ndire mani. Ngat'a Na'enchana 'bi kitsure: “Ntje xi s'e̱ri, kui= xi kjuendibanire ntjere Isaac.” 8Kui xi tsunire nga bi ki'ndire fa Na'enchana xi kis'ere Abraham jotsa'en nga'e ngasun'ndio. Tusa ki'ndi xi kis'ere jotsa'en kitsja ts'a Na'enchana, kui= xi 'bexki joni ntjere Abraham. 9Ngat'a kui enbi xi kitsjare ts'a Na'enchana Abraham: “Nu xi ndiba tunga ndekuini nixtjinbi kjua'ekun nganira̱, 'ba Sara s'e̱re jngu ki'ndi xi'in.” 10'Ba bi tsa tu kibi. 'Ba=nde kuata'en Rebeca xi kuán chjunre xuta chingana Isaac, kionga kis'eya'more ki'ndi 'ñu. 11Na'enchana kitsjare ts'a ngat'are ki'ndire kionga kje tsinjín 'ba kje tsa'enjín mé= xi nda ninga mé= xi ch'o, tuxi ku̱ajnguni mé= xi 'endatitjun Na'enchana nga kiskja'ajin ki'ndi xi kuamejénre. Kibi bakutsejen nga Na'enchana kja'ajin xuta xi kui mejénre 'ba bi ngat'are mé= xi nda tsa'en xuta. 12Kui kjuañu 'ba kitsunire Rebeca: “Ki'ndi xi tjun tsin, kui= xi sa'exangire xi tjenngi ngañu.” 13Jotsa'en kua'indut'a enre Na'enchana: “Kitsimején=ña̱ Jacob 'ba tsa'beton=ña̱ Esau.” 14'Bamani, ¿jó kuixan? ¿A kabi tsa'en Na'enchana? ¡Niñajanni 'batsa'en! 15Ngat'a Na'enchana 'bi kitsure Moisés: “Kjua'anima=na̱ ngat'are xi mejénna̱ nga kjua'animana̱, 'ba kjua'anima kakun=na̱ ngat'are xi mejénna̱ kjua'anima kakuna̱.” 16'Bamani bi ngat'are mé= xi mejénna ninga mé= xi nda ña'an tsa Na'enchana tsichikunta'en xuta, tu ngat'are nga fa'animare=. 17Ngat'a 'batsa'en kua'indut'a ña Na'enchana 'bi kitsure Faraón: “Kui= kjua kitsja xanira̱, tuxi kuakutsejenña̱ kjua'ñuna̱ ngat'ari 'ba tuxi s'eyanijmini ngat'ana̱ jo kji'i ngasun'ndio.” 18'Bamani Na'enchana fa'anima=re xi mejénre nga kjua'animare, 'ba tsitaja= inimare xi mejénre nga sitaja= inimare. 19Ngu tsa k'uinnaa̱: “¿Ánñu Na'enchana kaninejenire xuta ya'a? Ngat'a xuta tu tsa'ensani mé= xi Na'enchana tsu kakun nga sa'en.” 20Tunga, ji xi tu xuta ngasun'nde kuánsai, ¿'yá= ni ji tsa kuatekjo'akue Na'enchana? Jngu tiji nangi bi ma tsure xi kitsinda: “¿Ánñu 'bitsa'en kjinindaninaa̱?” 21¿A bi tjinre ndiyare xuta xi tsinda tijiu nga siko nangibiu jotsa'en nga kui mejénre? Ku̱an ndekui ni nangibiu sindakoni jngu tiji xi tu xakji'i ku̱achjennire jngu nixtjinre s'i 'ba ko ngijngu xi sichjenntsjai. 22Nde 'ba= tsa'ennire ngat'are Na'enchana. Kui tjinre ndiyare nga kuakutsejen kjuastire 'ba nga k'uejñatsejen kjua'ñure. Tunga 'ba= nde tjinre ndiyare nga xjukjuakore 'ba nga sitsejnda yojore ngat'are xuta xi joni tiji, xi machjen nga kjuendibanere kjuastire 'ba xi tjindunda nga kjuekjua. 23'Ba=nde Na'enchana tjinre ndiyare nga 'bejñatsejen jótsa'en je kjuajere ngat'are xuta xi jo=ni tiji xi tifa'animare, xi je 'endunda titjun nga sa̱kure kjuajere. 24Ña= ña kui xutabi. Na'enchana xakji'i kinchja=nina bi tsa tu ngajinre xuta judío, 'ba=nde ngajinre xuta naxinanda xi yak'a ngayeje. 25Jotsa'en xuta chinga profeta Oseas kitsi'indu enre Na'enchana: Xi bi naxinandana̱ tsakaiñu, nganda'e naxinandana̱ xin_ra̱. 'Ba xi bi kitsimijáa̱n, kui= xi simijáa̱n. 26'Ba ndekuini nga'nde ña 'ba kik'inre xuta: “Jun bi naxinandana̱ kuon”, kio 'ba k'uin nganire nga kui= xi ki'ndire Na'enchana xi tijñakun. 27'Ba 'ba kitsu xuta chinga profeta Isaías nga kinchja ngat'are xutare Israel: “Ninga tsa 'batsa'en nkjin mani xutare Israel joni tsumi xi tjin ndai ndachikun, tunga tu chuba ma sani xi k'uangi. 28Ngat'a je sik'etjusun xati kjuakixire Na'enchana ngat'are xi kitsu nga ku̱an jo kji'i ngasun'ndio.” 29'Ba ndekuini Isaías kitsutitjun: “Tsa bi 'ejña ngisana ntje Na'enchana xi tjinre ngayéje kjua'ñu, jeru 'ba nde kuata'an joni xutare Sodoma 'ba kuáan joni xutare Gomorra tsakaiñu.” 30'Bamani, ¿jó kuixan ngat'are kibi? Xuta xi bi judío, xi bi tsangisjai nga ku̱akixi ngixkun Na'enchana, kui= xi kisakure kjuakixi. Kuakixi= ngat'a kuakjainre ngat'a tse'e Na'enchana. 31Tunga ngat'are xutare Israel, tsangisjai nga sik'etjusun kjuatexumo tuxi ku̱akixini ngixkun Na'enchana, tunga bi echutjenngi. 32¿Ánñu nde? Ngat'a bi tsangisjai kjuakixi xi sakure xuta xi makjainre ngat'a tse'e Na'enchana. Tusa kuamejénre nga sik'etjusun mé= xi kua'indut'a kjuatexumo, tuxi 'batsa'en ku̱akixini. Ngu, kisatengi ndiojo xi satengi xuta, 33jotsa'en kua'indut'a enre Na'enchana: “An k'uejñaa̱ nangi Sión jngu ndiojo xi satengi xuta, jngu naxi xi ko'otsakjan xuta. Tunga ngat'are xi ku̱akjainre ngat'are kui, bi sa̱kure kjuasuba.”

will be added

X\