ROMANOS 3

1'Bamani, ¿mé= chji xi tjin ngisare nga ma judío asa nga ma circuncidar? 2Ne nkjin kuya chji xi tjin ngisare. Kui=bi xi titjun nga Na'enchana kitsingatsjare xuta judío enre. 3Tsa tjin xi bi kuakjainre ngat'are enre, ¿a tu kui kjuañu Na'enchana bi sik'etjusunnire en xi kitsure? 4¡Ngu niñajanni 'ba ku̱an! Ninga tsa ndesu ngatsi'i xuta, tunga Na'enchana tojo 'ba=tsa'en ko kjuakixi. Ngu enre 'ba=tsa'en kua'indut'a: S'e̱jñatsejen nga ji xi kixi kionga sji mé= enñu, 'ba si'anni ji kionga ku̱anri kjua. 5Tunga tsa kjuach'okunna 'bejñatsejen nga Na'enchana xi kixi, ¿jó kuixan? ¿A kuixun=ña nga Na'enchana bi tjinre kjuakixi kionga tsikasenna kjuastire? (Kionga 'ba texia̱n, tenchjaa̱=ña̱ jotsa'en nchja xuta.) 6Tunga, ¡niñajanni 'ba ku̱an! Ngat'a tsa Na'enchana bi tjinre kjuakixi, ¿jótsa'en ku̱an sa'enire kjua xuta ngasun'ndio? 7Tunga tsa en ndesu xi tenchjaa̱ tsa kui= xi 'batsa'en k'uejñatsejen kjuakixire Na'enchana 'ba kui sa̱ku=ngisare kjuaje, ¿ánñu tojo tjiña'an ngisanina̱ kjua joni tsa an xi xuta je kuáa̱n? 8¿A bi tusa nda tjin nga si'an mé= xi bi nda tjin, tuxi kjua'eni kjuanda? Jo tsu yak'a xuta xi ch'otsa'en inyatsik'axkina̱ nga 'bixu tsu en xi tebakuyaa̱. Tunga xi 'ba inyatsu machjen nga kjua'a kjuanima. 9Ngu, ¿a ngisa nda ngisai̱ ji̱n xi judío kuái̱n nga ko mare xutare naxinanda xi yak'a? ¡Junjun! Ngat'a je= 'yakua̱n nga ngatsi'i, a xi judío asa xi bi judío tjindu ngajin kjua'ñure je. 10Jotsa'en kua'indut'a enre Na'enchana: Tsajain xuta xi kixi, nijngujín tjin. 11Tsajain xuta xi mankjinre. Tsajain xuta xi mangisjai ndiya xi tse'e Na'enchana. 12Kja'e ndiya xi bi nda kiji ngatsi'i, nimé nde chjinire kjua xi tsa'en. Tsajain xuta xi tsa'en xi nda, nijngukjinjín tjin. 13Naxujndare joni jngu tsju xi tixa, 'ba tsiteya najenre nga nchja en ndesu, 'ba en xi 'betju ts'a joni xanre tjiuye. 14Kitse nga'a ts'a en xi ch'otsu 'ba ko en xi nchjabojonire xuta. 15'Ba tu tjindundantsjai nga mejénre sik'en. 16Ndiya xi semaya tsinima= 'ba tsi'on=re xuta, 17'ba bi inyabe ndiya ñá tjin kjuaxiu. 18Bi tjijin kakunre nga Na'enchana xi tjinnere nga kjuikuncha. 19'Yaña kibi. Ngayéje mé= xi tsu kjuatexumo, Na'enchana tifako xuta xi kitsa'ere kjuatexumo, tuxi 'batsa'en k'uechjani ts'a ngatsi'i xuta 'ba si'annire kjua ngayéje ngasun'ndio ngixkun kui. 20Ngat'a nijngu xuta ku̱akixi ngixkun Na'enchana tu ngat'are tsa sik'etjusun mé= xi kua'indut'a xujun kjuatexumare Moisés. Tusa kjuatexumo machjen tuxi 'bejñatsejennina nga tjinna je. 21Tunga nganda'e, je 'ejñatsejen Na'enchana jótsa'en makixini xuta ngixkun kui. Bi kjuatexumo xi 'batsa'en, ngu ndekuini kjuatexumo ko xujun xi tse'e profeta tsuyakixi mé= xi tijñatsejen nganda'e. 22Ngat'are kjuamakjainre ngat'a tse'e Jesucristo, 'ba=tsa'en makixini xuta ngixkun Na'enchana. 'Ba makixi ngatsi'i xi makjainre, ngat'a kui bi kabi tsa'en xuta. 23Ngatsi'i xuta tsajngi je 'ba kjin tjindu ngat'are kjuajere Na'enchana. 24Tunga tu ngat'are kjuandare Na'enchana titsja kjuatjo nga makixi xuta, ngat'a Jesucristo 'echjintjai xuta tuxi kuandaini ngat'are jere. 25Na'enchana kitsa'en Jesucristo jngu chje kionga 'estenntjaina jinre, tuxi sa̱kunina kjuanichat'a nga ku̱akjainna ngat'are kui. 'Ba=tsa'en yakutsejen Na'enchana kjuakixire. Ngat'a bi kiskaninejere xuta xi tsajngi je nganda'eñu, 26ngu kui tjinre kjuatsejnda. Tunga tibakutsejen nixtjin nganda'e jótsa'en tsikixina; jotsa'en kixi kui, 'ba 'ba nde kixi tsa'en xi makjainre ngat'are Jesús. 27'Bamani, ¿jótsa'en nk'a kjui'naxjeña yojona? Bi ma. S'ejñat'axin= kibiu. ¿Jótsa'en s'ejñat'axinni? ¿A ngat'are tsa tenik'etjusun=ña mé= xi kua'indut'a kjuatexumo? Bi kui kjuañu. Tu ngat'are nga makjainna. 28Ngat'a mankjinna nga mani nga makixi xuta ngixkun Na'enchana tu ngat'are nga makjainre 'ba bi ngat'are tsa sik'etjusun mé= xi kua'indut'a kjuatexumo. 29¿A tu xuta judío sani xi Na'enre Na'enchana? ¿A bi 'ba nde Na'enre ngatsi'i xuta xi yak'a ngayeje? Jun, kjuakixi= nga 'ba nde Na'enre xi bi judío ngayeje. 30Ngat'a jngututu mani Na'enchana. Kui xi tsa'en nga makixi xuta judío xi kuán circuncidar ngat'a makjainre, 'ba nde tsa'en nga makixi xuta xi yak'a xi bi kuán circuncidar tu ngat'are nga makjainre. 31'Ba meni, tu ngat'are nga makjainna, ¿a tenichajaña chjire kjuatexumo? ¡Junjun! Tusa 'batsa'en teba'e_ra chji xi machjenre kjuatexumo.

will be added

X\