APOCALIPSIS 6

1'Ba tsa'bia̱ nga kitsijoya Ki'ndi borrego sello xi titjun, 'ba kjint'ia̱ nga kinchja jngu xi ñujun tjindukun. 'Ba jndare, 'batsa'en nu'yare joni nga fane cho'on. 'Ba kitsu: “¡Jabi!” 2'Ba 'batsa'en kiskutsijia̱n 'ba tsa'bia̱ jngu chakabayu tiba. 'Ba xi tijñakjare tjiubabiu ya'a jngu arco. Kika'ere jngu corona 'ba 'etju nga titsa'en 'ba tuxi sa'en ngisani. 3'Ba kionga kitsijoya ngani Ki'ndi borrego sello xi majóni, kjint'ia̱ nga kinchja xi majóni xi tjindukun 'ba kitsu: “¡Jabi!” 4'Ba 'batsa'en 'etju ngani kja'e chakabayu, jngu xi ini kji'i. 'Ba xi tijñakjare tjiubabiu, kika'ere jngu espada je. 'Ba nde kika'ere kjua'ñu nga kjua'axin kjuaxiu xi tjin ngasun'ndio, tuxi sik'enkañani xinkjin xuta. 5'Ba kionga kitsijoya ngani Ki'ndi borrego sello xi majánni, kjint'e ngañaa̱ nga kinchja ngani xi majánni xi tjindukun 'ba kitsu: “¡Jabi!” 'Ba 'batsa'en kiskutsijia̱n 'ba tsa'bia̱ jngu chakabayu jma. 'Ba xi tijñakjare tjiubabiu ya'a jngu nisu chu̱ba̱. 6'Ba ngajinre nga ñujun xi tjindukun kjint'ia̱ jngu jnda xi kitsu: “Jngu kilo trigo asa ján kilo tu cebada 'batjin chjire jotjin jenre xuta nga jngu nixtjin tsa'exa. Tunga bi nikjetsin tsujmi ntje uva ninga olivo.” 7'Ba kionga kitsijoya Ki'ndi borrego sello xi mañujunni, kjint'ia̱ jndare xi mañujunni xi tjindukun nga kitsu: “¡Jabi!” 8'Ba 'batsa'en kiskutsijia̱n 'ba tsa'bia̱ jngu chakabayu xi sinenda kji'i. 'Ba xi tijñakjare tjiubabiu, kui xi Kjuabeya 'mi, 'ba ngastun tjen xi Nga'ndere mik'en 'mi. 'Ba kika'ere kjua'ñu nga kuatexumare jngu yá xi ñujun ya ka'a xuta xi tjin ngasun'ndio, tuxi sikjesunni ko kjuachan, kjindia, chi'in 'ba ko tjiuba ts'en xi tjin ngasun'ndio. 9'Ba kionga kitsijoya Ki'ndi borrego sello xi ma'ónni, tsa'bia̱ ngi'ndere altar isennixtjinre xuta xi kjinikjesun ngat'are nga kitsikja'axtiuya enre Na'enchana 'ba ngat'are nga kitsuyakixi ngat'are kui. 10'Ba ko jngu jnda xi 'ñu kinchja nga kitsu: “Ji Na'en xi tsje 'ba xi kjuakixi=, ¿kjia'a=ñu 'nda si'an_ri kjua xuta xi tjin ngasun'ndio 'ba singojo_ri kjuabeyani̱?” 11'Ba sa'e 'batsa'en nga jngu jngu kika'ere najñu tiba. 'Ba kik'inre nga tu chuba nixtjin sikja'aya ngisa, ka'nda nga kjuechu xkire xuta xi nts'e mani, xi 'ba nde tsa'exat'are Cristo 'ba xi 'ba nde 'batsa'en tjinnere nga kjuinik'en joni kui. 12'Ba kionga kitsijoya Ki'ndi borrego sello xi majonni, kiskutsijia̱n 'ba kuán jngu chon xi 'ñukjin. Kuajma tsu'biu joni najñu xi jma nistjen nistjen. 'Ba kua'ini na'enso joni jin. 13'Ba sa'e niñu xi tjin ngank'aa tsixungi t'anangiu jo ma nga bixungi tu chi'ndere ya higuera kionga tsiteya jngu ntjo xi 'ñu. 14'Ba ngank'aa kichaja joni jngu xujun xi s'ekuya. 'Ba ngayéje nindu ko isla kiteya nga'ndere nga kitjuxin ña tjindu tsakaiñu. 15'Ba sa'e rey xi tjin ngasun'ndio ko xuta titjun, xi ngakure chasoldadu, xuta nyina, nchja xi tjinre kjua'ñu 'ba ko ngatsi'i xuta ninga chu'nda xi tsindaa̱ ninga xi bi chu'nda kik'endu'mo kioña tixa ngi ngijo 'ba ngajin naxire nindu. 16'Ba 'bi kitsure nindu ko naxiu: “Tixuneni 'ba tik'endu'monii̱, tuxi bi skuenini̱ xi tijñasun yaxilio 'ba tuxi bi xianii̱ kjuastire Ki'ndi borrego. 17Ngat'a je= ja'e nixtjin nga kuakutsejen kjuastire xi niki 'ñu=, ¿'ba 'yá= xi ku̱an xukjuakore?”

will be added

X\