APOCALIPSIS 4

1Jaskan nga je tsa'bia̱ kibiu, kiskutsejia̱n 'ba tsa'bia̱ jngu xuntja xi kichjux'a ngank'aa. 'Ba jnda xi tjun kjint'e_ra̱, xi 'batsa'en nu'yare joni nga fane tjio 'bi kitsuna̱: “Tijñe nga'e 'ba kuakutsejenra̱ mé= xi tjinnere ku̱an jaskanñu.” 2'Ba ndekuini chubabiu ja'e ngajinna̱ Isennixtjintsjere Na'enchana, 'ba tsa'bia̱ nga sejña ngank'aa jngu yaxile je joni xi 'bendusun rey, 'ba tjin= xi tijñasun yaxilebiu. 3'Ba isenre xi tijñasun yaxilebiu 'ba=tsa'en matsejen joni ndiojo xi tsjakun xi jaspe ko cornalina 'mi. 'Ba ngandaire yaxilebiu s'ejñandai jngu cha'ya xi matsejen joni ndiojo xi esmeralda 'mi. 4'Ba ngandaire yaxilebiu tsa'be ngisaa̱ kañujun yaxile ña tjindusun kañujun nchja chinga xi yaja najñu tiba, 'ba ngasun nindaku titsusunre corona xi oro ni. 5'Ba ña sejña yaxile jebiu 'betju ndi'i cho'on, si'a 'ba ko si'are cho'on. 'Ba ngankjain yaxilebiu inyati yatu ndi'i xi ya s'eku, xi isennixtjinre Na'enchana xi yatu mani. 6'Ba 'ba nde ngankjain yaxilebiu kjijña jngu tsajmi xi 'batsa'en matsejen joni jngu ndachikun xi chutsin nini xi 'ñu matsejenya. 'Ba ngandaire yaxile jebiu tjindu ñujun xi tjindukun jngu nga jngu jngu ngatere xi kitsejunre tuxkun ngankjain ko ngastun. 7Xi titjun, 'batsa'en matsejen joni tjiuxa. Xi majóni, 'batsa'en matsejen joni tjiundija chi. 'Ba xi majánni, 'batsa'en chutsejen'a joni nkjain xuta. 'Ba xi mañujunni, 'batsa'en matsejen joni tjiuja xi titutjen. 8'Ba nga ñujun xi tjindukun, nga jngu jngu jon jnga ya'a. 'Ba kitsejunre xkun ngi'ndere 'ba ngasunnk'are. 'Ba nga nixtjin nga nistjen bi tsikjejnda nga tsu: Na'enchana= xi tsje, Na'enchana= xi tsje, Na'enchana= xi tsje. Kui= tse'e ngayéje kjua'ñu xi tjin. Kui xi tsik'ejña, xi tijña 'ba xi kjua'e. 9Nga ñujun xi tjindukun, kui xi be'e nijmi nga tjinre kjuaje xi tijñasun yaxilebiu, xi tijñakun ka'nda ngantsjai nixtjin. 'Ba bekun 'ba tsjare kjuanda. 'Ba nga 'ba tsa'en xi ñujun, 10nchja chinga xi kañujun mani minyakunch'int'are nga tsichjire xi tijñasun yaxile, xi tijñakun ka'nda ngantsjai nixtjin. 'Ba 'bendu corona xi titsusunre ngixkun yaxilebiu nga 'bi tsu: 11Ji Na'en xi Na'enni̱, ji xi bakinri nga cha̱kunri, nga sa̱kuri kjuaje 'ba nga kjuinichjire ngat'are kjua'ñuri. Ngat'a ji kjiñe'en ngayéje xi tjin, 'ba ngat'a ji 'batsa'en kuamejénri kui= kjua tjinni 'ba kuandani.

will be added

X\