APOCALIPSIS 3

1'Ba ti'indu_ri ankje xi tse'e xuta xi makjainre ngat'ana̱ xi tjindu naxinanda Sardis: “'Bi tsu xi tjinre isennixtjin xi yatu xi tse'e Na'enchana ko niñu xi yatu mani: 'Be=ña̱ xi teñe'en. 'Bi inyatsu xuta nga tenichunni, tunga ngat'ana̱ je= tseye. 2Tikja'a_ri 'ba ta'e nga'ñuri yojori nga kje beyajín, ngu te'beña̱ nga bi kixi te'mikue xari ngixkun Na'enchana. 3'Bamani tsuba, tikja'etsjenya_ri yojori 'ba t'ejñatjai xi kika'eri ko xi kjinu'ye, 'ba tik'antjaiye kjuafa'etsjenri 'ba ndetjenngi ngani Na'enchana. Tsa bi sikja'a_ri yojori, kjua'ekunra̱ joni jngu chacheje 'ba bi xie mé= chuba kjua'ekunra̱. 4Tunga ngajin naxinanda Sardis tjindujin yak'ari xuta xi bi inyatsijndi najñure. Kui xi k'uetsumakona̱ nga kuaja najñu tiba, ngat'a bakin=re̱. 5Xi sa'en, kui xi kjuinikaja najñu tiba 'ba bi sichajaa̱n ja'enre xujun ña kua'indut'a ja'enre xuta xi k'uendukun. Tusa xia̱n nga xutana̱ kuán ngixkun Na'enna̱ 'ba ngixkun ankjelere. 6¡Xi tjin ñojon ngatasen ñojon mé= xi titsure Isennixtjintsjere Na'enchana xuta xi makjainre ngat'ana̱!” 7'Ba ti'indu_ri ankje xi tse'e xuta xi makjainre ngat'ana̱ xi tjindu naxinanda Filadelfia: “'Bi titsu xi tsje 'ba xi kjuakixi, xi ya'a llavere rey David, xi kje'i xuntja, 'ba tu'yá mare 'bechjaa̱; 'ba xi 'bechja xuntja, 'ba ni'yá mare chju'i: 8'Be=ña̱ xi teñe'en 'ba 'be=ña̱ nga tsajainri nga'ñuú. Tunga tenik'etjusun=ni enna̱ 'ba bi tesji nga bi xutana̱ kuáin. Chutsejen. Ngixkuin kiskjex'aa̱ jngu xuntja xi tu'yá mare 'bechjaa̱. 9Chutsejen jó sikua̱ xuta xi tse'e ni'ya sinagogare chanayiu, xuta judío xi Na'enchana kiskja'ajin tsure yojore tunga tu en ndesu=nini. An=ña̱ xi 'ba sa'aa̱n nga kjua'ekinyakunch'int'a ngi ndsakui, tuxi 'batsa'en skueni nga an tsimejénra̱. 10Kjinik'etjusun=ni enna̱ nga kiskakori ko kjuatsejnda. Kui kjua k'uejñat'axinnira̱ ngat'are kjuanima xi kjua'e nixtjin nga xut'ayako ngatsi'i xuta xi tjin ngasun'ndio, kjuanima xi kjua'ene jo kji'i ngasun'ndio. 11Kjua'exati=ña̱. Nda t'ejñatjai xi tjinri, tuxi tu'yá skja'aniri chji xi kua'eri xi tsunire nga kjiñe'en. 12Xi sa'en, kui xi sa'aa̱n joni xjo xi sasengire ningure Na'enna̱, 'ba bi nde stjuxinni nga'ndebiu. 'Ba k'uet'a_ra̱ ja'enre Na'enna̱ ko ja'enre naxinandare Na'enna̱, xi Jerusalén xatse 'mi xi Na'enna̱ sikasenjenni ngank'aa. 'Ba 'ba nde k'uet'a_ra̱ ja'en xatsena̱ ngayeje. 13¡Xi tjin ñojon ngatasen ñojon xi titsure Isennixtjintsjere Na'enchana xuta xi makjainre ngat'ana̱!” 14'Ba ti'indu_ri ankje xi tse'e xuta xi makjainre ngat'ana̱ xi tjindu naxinanda Laodicea: “'Bi titsu xi kjuakixikjin, xi kixi tsikixiya ngat'are kjuakixire Na'enchana, 'ba ngat'are kui Na'enchana kitsa'en yeje xi tjin: 15'Be=ña̱ xi teñe'en. Ji jo=ni nanda xi bi nch'an 'ba ninga bi sje. ¡Tsa tu nch'anri asa sjeri tsakaiñu! 16Tunga tu isunt'ai=ni. Bi nch'en ninga bi sje. Kui kjua sikjesunnira̱. 17Ngu ji sjini: Nyina=ña̱, tjin yeje=na̱ xi mejénna̱ 'ba tumé chajana̱. Tunga bi 'yani nga tsajainri kjuatsja, nga tumé chji=ri, nga nimai, nga kai 'ba nga tetsjusti. 18'Bamani an tsjara̱ jngu en nga tindai xi tjinna̱. Tindai oro xi niki nda=kjin ngat'a sa'e fa kuatsje nga kjinaxjejin ndi'i, tuxi ku̱anyinani ngixkun Na'enchana. 'Ba nde tindai najñu tiba xi ku̱an xeje ngayeje, tuxi kue'moni yojo kjistiri xi titsjari kjuasuba. 'Ba 'ba nde tindai ndaki xi kuinyangi tuxkuin ngayeje, tuxi nda ku̱atsejenniri. 19An xi fatikua̱ 'ba tsja ndiya_ra̱ ngatsi'i xi tsimijaa̱n. 'Bamani tsu'ba, ta'e nga'ñuri yojori 'ba tik'antjaiye kjuafa'etsjenri 'ba ndiba ngani ngixkun Na'enchana. 20Chutsejen, an tesenxtiu=ña̱ xuntjo nga tetsikjania̱. Tsa tjin xi kjuint'e jndana̱ 'ba skje'i xuntjo, kjua'as'enjin_ra̱ 'ba skineko=ña̱ niñu, 'ba kui skineko=na̱ ngayeje. 21Xi sa'en, kui xi sja'nde_ra̱ nga k'uejñat'ana̱ yaxile ña kuatexumaa̱, jotsa'en je kitsa'aa̱n an ngayeje 'ba tejñat'a_ra̱ yaxilere Na'enna̱. 22¡Xi tjin ñojon ngatasen ñojon mé= xi titsure Isennixtjintsjere Na'enchana xuta xi makjainre ngat'ana̱!”

will be added

X\