APOCALIPSIS 22

1'Ba jaskan ankje yakuna̱ jngu ndaje xi tjinre nanda xi tsjare kjuabenichun xuta. Xi 'na 'ba matsejenya joni chutsin. 'Ba kio ti'betjuni ña sejña yaxile ña tibatexuma Na'enchana ko Ki'ndi borrego. 2'Ba ngamasenre ndiya tere naxinando xi ngisa bitjajmeya 'ba nga jngu jngu ngatere ndajio inya yatuntje xi tsjare kjuabenichun xuta. Xi bajare tejó ka'a tu nga jngu nu. Jngu jngu ndiya bajare tu xki sa. 'Ba xkare yabiu nichjen= tuxi sindani ngatsi'i xuta xi tjin ngasun'ndio. 3Tume nde s'e̱ni xi ch'o kik'inre ngat'are Na'enchana. 'Ba ngajinre naxinando sasen yaxile ña batexuma Na'enchana ko Ki'ndi borrego, 'ba xuta xi tse'e sichjire. 4'Ba skuekjin fa nkjain 'ba stjen ku̱a'indut'a ja'enre. 5'Ba kio bi nde s'e̱ni nistjen 'ba bi nde ku̱achjennire ndi'i lámpara ninga ndi'ire tsu'biu, ngat'a Na'enchana sitsejenre xuta xi kio k'uendu. 'Ba xutabiu kuatexuma ka'nda ngantsjai nixtjin. 6'Ba jaskan ankje kitsuna̱: “Kui enbi xi kjuakixi 'ba ma chun_ra. Na'enchana, Na'en xi tsikinchja nchja chinga profeta, kui xi je kitsikasen ankjere, tuxi kuakutsejennire xutare mé= xi tjinnere ku̱an xati.” 7“Chutsijon. ¡Je mején kjua'aa̱! ¡Ndaxure xi kixi 'bejñatjo en xi kua'indut'a xujunbi, xi titsuyatitjun xi tjinnere ku̱an!” 8An, Juan, kjint'e=ña̱ 'ba tsa'be=ña̱ kibi. 'Ba jaskan nga je kjint'ia̱ 'ba tsa'bia̱, tsakasenkunch'int'a_ra̱ ankje xi yakuna̱ kibiu nga sichji_ra̱ tsakaiñu. 9Tunga 'bi kitsuna̱: “Bi 'ba ñe'en. An= xi 'ba nde tetsa'exang_ra̱ Na'enchana joni ji ko nts'é xi profeta 'ba joni ngatsi'i xi kixi 'bejñatjo en xi kua'indut'a xujunbi. Na'enchana xi tjinnere nga sichji_ri.” 10'Ba nde kitsuna̱: “Bi 'bejña'mai en xi kua'indut'a xujunbi, xi titsuyatitjun mé= xi tjinnere ku̱an, ngat'a je tifechu tiña nixtjin nga k'uetjusun kibiu. 11Xi ch'okun, janda ngatatsa'en xi ch'o tjin. Xi jndi, janda ngatatsa'en xi jndi tjin. Xi nda, janda ngatatsa'en xi nda tjin. 'Ba xi tsje, ngisa ngatjamatsje ngisa.” 12“Chutsijon, je kjuixatia̱. 'Ba kjua'eko=ña̱ chji xi sja_ra̱ nga jngu jngu xuta jo nga kitsa'en. 13An= ña̱ xi alfa ko omega, xi titjun 'ba xi jaskanni, xi tuts'in 'ba xi fet'ani.” 14¡Ndaxure xuta xi tibane najñure, tuxi kua'e'ndenire nga kjua'as'en xuntjare naxinando 'ba skine ture ya xi tsjare kjuabenichun xuta! 15Tunga ngandetsian xinyandu xuta ch'okun, xi tsa'en kjuacha, xi tsa'en kjuachajngi, xi tsik'en xuta, xi bekun na'en xi ntsja xuta kuandani, ko ngatsi'i xi matsjare tsu en ndesu nga nchja. 16“An, Jesús, je kitsikasia̱n ankjena̱, tuxi kuetsuyakixinire kibi xuta xi makjainre ngat'ana̱. An= ña̱ ntjere David, nts'en xi ndibanire jamare kui, 'ba an= ña̱ niñu xi ngisa 'ñu tsitsejen nga je tjis'e isen.” 17“¡Jabi!”, titsu Isennixtjintsjere Na'enchana ko chjunre Ki'ndi borrego. 'Ba xi tibasen ñojon ngatatsu: “¡Jabi!” 'Ba xi xindare ngatjendiba, 'ba tu'yañu xi mejénre ngat'ikjuatjo nanda xi tsjare kjuabenichun xuta. 18An xinyakixi titjun_ra̱ ngatsi'i xuta xi inyabasen ñojonre en xi kua'indut'a xujunbi, xi titsuya mé= xi tjinnere ku̱an: Tu'yañu xi k'uesunre en xi kua'indut'a nga'e, Na'enchana k'uesunre kjuana'en xi kjinukjua ngat'are xujunbi. 19'Ba tu'yañu xi skja'axinre en xi kua'indut'a xujunbi, xi titsuya mé= xi tjinnere ku̱an, Na'enchana skja'axinre tu xi kua'ere tsakaiñu, xi bajare yatuntje xi tsjare kjuabenichun xuta. 'Ba Na'enchana skja'axinre nga'nde xi kua'ere tsakaiñu ngajin naxinanda tsjere xi kjinukjua ngat'are xujunbi. 20Xi titsuyakixi kibi, kui= xi titsu: “Jun, je kjua'exatia̱.” ¡'Ba ngatjama! ¡Jabi, Na'en Jesús! 21Ngatjas'enu ngatsi'u kjuandare Na'enna Jesucristo. 'Ba ngatjama.

will be added

X\