APOCALIPSIS 21

1'Ba jaskan tsa'bia̱ jngu ngank'a xatse ko jngu t'anangi xatse, ngat'a je kichajakjin ngank'a xi tjun ko t'anangi xi tjun. 'Ba bi nde kis'eni ndachikun. 2'Ba tsa'bia̱ naxinanda tsjere Na'enchana, xi Jerusalén xatse, nga tjindibajenni ngank'aa. Xi kjinikasen ngat'are Na'enchana 'ba xi 'batsa'en kis'enda joni jngu chjun xi tibixan xi kjinikaja jngu xutji xi tsja=kji'i nga tikuyare xi xi'iun. 3'Ba kjint'e_ra̱ jngu jnda xi 'ñu kinchja, xi jendibani ña sejña yaxilio nga 'bi kitsu: “Na'enchana je tijña ngajinre xuta nganda'e. Kui k'uejñajinre xuta, 'ba xutabiu naxinandare ku̱an. Na'enchana suba k'uejñajinre 'ba ku̱an Na'enre. 4Kui sixijun yeje ndaxkun, 'ba bi nde kueyani ninga bi nde sibani. Bi nde ski'ndani ninga bi nde kjua'ani kjuanima, ngat'a ngasun'nde xi tjun je bi nde tjinni.” 5'Ba xi tijñasun yaxilio 'bi kitsu: “An tetsixatse=ña̱ ngayéje xi tjin.” 'Ba nde kitsu ngayeje: “Ti'indi kibi, ngat'a kjuakixi= enbi 'ba ma chun_ra.” 6'Ba nde kitsu ngisana̱: “Je kuajngu. An= ña̱ xi alfa ko omega, xi titjun 'ba xi fet'ani. Xi xindare an sjakjuatjo_ra̱ nga'nde ña tju nanda xi tsjare kjuabenichun xuta. 7Xi sa'en, kui xi sa̱kure kjuandabiu. 'Ba an ku̱aa̱n Na'enre 'ba kui ku̱an ki'ndina̱. 8Tunga kui xi tsakjun, xi bi makjainre, xi tsa'en kjuanayi, xi tsik'en xuta, xi tsa'en kjuachajngi, xi tsa'en kjuacha, xi bekun na'en xi ntsja xuta tsindani, ko ngatsi'i xi tsu en ndesu, kui xi 'ba tjinni nga kjuinikja'a kjuanima nga xanikja'ajin nga'nde xi kitse ndi'i xi ko asufre titíkoni. Kui xi kjuabeya xi majóni.” 9'Ba kitsitiñat'ana̱ jngu ankje xi s'ejñajinre ankje xi yatu, ankje xi ya'a jngu nisu xi yatu tsakaiñu xi inya kjuana'en xi yatu xi fet'ani. 'Ba kitsuna̱: “Jabi. Kuakura̱ chjun xi kuixan xi ku̱an chjunre Ki'ndi borrego.” 10'Ba meni ja'e ngajinna̱ Isennixtjintsjere Na'enchana 'ba ankje kikona̱ jngu nindu je xi 'ñu nk'a. 'Ba kio yakuna̱ naxinanda tsjere Na'enchana, xi naxinanda Jerusalén, nga tjindibajenni ngank'aa. Xi kjinikasen ngat'are Na'enchana. 11'Ba ndi'ire kjuajere Na'enchana titsika'na naxinando joni ndiojo xi tsja kji'i xi 'ñu chji. Jo=ni ndiojo xi jaspe 'mi, xi 'na 'ba matsejenya joni chutsin. 12'Ba naxinando tjinch'andaire jngu xjo je 'ba nk'akoni, xi tejó mani xuntjare. 'Ba nga jngu jngu xuntjo jngu ankje inyaxtiu. 'Ba xuntjabiu kua'indut'a ja'enre ntjere Israel xi tejó ka'a mani. 13'Ba ján mani xuntja xi tixa ña tjenni ngituts'ian 'ba ján ña ntjai tsu'biu 'ba ján ngate skjun 'ba ján ngakixi. 14'Ba tejó mani tuts'in xjore naxinando. Nga jngu jngu kua'indut'a ja'enre apóstore Ki'ndi borrego. 15'Ba ankje xi tifakona̱ ya'a jngu ya chu̱ba̱ xi oro ni tuxi k'uechu̱ba̱koni naxinando, xuntjare ko xjore. 16'Ba naxinando ngusun= tsa'en teya. Nga nduju 'ba nga teya tu jngu= chuba. 'Ba ankje 'echubakoni yachubare naxinando, 'ba jó mi ko jó sientu kilómetro tjinre. Nga nduju 'ba nga teya 'ba nga nk'a tu jngu chuba. 17'Ba jaskan 'echu̱ba̱ xjo xi tjinch'andaire ngayeje. 'Ba yachute ko tjio'on metro tjinre. Chu̱ba̱ xi tsichjen xuta, ndekui xi kitsichjenni ankje. 18'Ba xjo xi tjinch'andaire kuánni ndiojo xi tsjakun xi jaspe 'mi, 'ba naxinando kuandakoni suba oro xi 'na 'ba matsejenya joni chutsin. 19'Ba tuts'in xjore naxinando yajunre ngayéje kuya ndiojo xi tsja kun xi chji. Xi titjun, jaspe. Xi majóni, zafiro. Xi majánni, ágata. Xi mañujunni, esmeralda. 20Xi ma'ónni, ónice. Xi majonni, cornalina. Xi mayatuni, crisólito. Xi majinni, berilo. Xi mañajanni, topacio. Xi mateni, crisoprasa. Xi matejnguni, jacinto. 'Ba xi matejóni, amatista. 21'Ba xuntja xi tejó, kui xi tejó ndiojo xi tsakjun xi perla 'mi. Nga jngu jngu xuntjo tu jngu perla kuandakoni. 'Ba ndiya te xi ngisa bitjajmeya, kui xi kuánkoni suba oro xi 'na 'ba matsejenya joni chutsin. 22'Ba nijnguú ningu tsa'bia̱ ngajinre naxinando. Ngat'a ningure naxinando, kui xi Ki'ndi borrego ko Na'enchana, Na'en xi tjin yeje kjua'ñu xi tjin. 23'Ba naxinando bi machjenre nga tsu'biu asa na'enso sitsejenre, ngat'a ndi'ire kjuajere Na'enchana tsitsejenre, 'ba Ki'ndi borrego kui xi ndi'ire naxinando. 24'Ba ngatsi'i xuta xi tjin ngasun'ndio k'uetsumajin ndi'i xi ndibani naxinando, 'ba kio kjua'eko kjuanyinare rey xi tjin ngasun'ndio. 25Bi s'e̱chja xuntjare naxinando nga nixtjin 'ba bi ku̱ajñu kio. 26'Ba ngatsi'i xuta xi tjin ngasun'ndio kio kjua'eko kjuanyinare ko tsajmire xi tsjakun. 27Nimé xi jndi tjin ngixkun Na'enchana ku̱an kjua'as'en kio, ninga xuta xi tsa'en kjuanayi, ninga xi tsu en ndesu. Tu kui sani kjua'as'en kio xi kua'indut'a ja'enre xujunre Ki'ndi borrego ña tsu 'yá xi s'e̱re kjuabenichun xi bi fet'a.

will be added

X\