APOCALIPSIS 2

1Ti'indu_ri ankje xi tse'e xuta xi makjainre ngat'ana̱ xi tjindu naxinanda Éfeso: “'Bi tsu xi ya'a yatu niñu ntsja kixi, xi tsu'bajin yatu tsajmi xi oro ni ña s'endusun ndi'i lámpara: 2'Be=ña̱ xi teñe'en, 'ba jótsa'en teningantsja_ri yojori xa xi teñe'en, 'ba jótsa'en tikakori. 'Ba 'be=ña̱ nga bi tikakori xuta xi tsa'en kjuach'o. Je= kichut'ayakue xuta xi apóstol tsure yojore tunga bi kui ni, 'ba je= kji'ye nga ndesu=nini. 3'Ba 'be=ña̱ nga ko kjuatsejnda tichukjuakori kjuanima xi tisakuri ngat'ana̱, 'ba bi tifere takuin. 4Tunga kui=bi xi bi tisasenna̱ ngat'ari: nga bi nde tjinniri kjuanimejen xi kis'eri ngatuts'inre kionga tjun kuakjainri ngat'ana̱. 5Kui kjua tikja'etsjenni jó kji'i kjin je k'int'axin 'ba tik'antjaiyani kjuafa'etsjenri 'ba ndiba ngani ngixkun Na'enchana, 'ba ti'an ngani xi kjiñe'en ngatuts'inre. Tsa bi sik'antjaiyani kjuafa'etsjenri 'ba kjua'e ngani ngixkun Na'enchana, kjua'ekunra̱ 'ba kjua'axin=ña̱ tsajmiri ña s'endusun ndi'i lámpara ña tijña. 6Tunga ngat'are kibi= xi nda nchja ngat'ari: nga mastiche mé= xi tsa'en xuta xi tjenngire xuta xi Nicolaus 'mi. 'Ba=nde ko an mastike=ña̱ mé= xi tsa'en. 7¡Xi tjin ñojon ngatasen ñojon mé= xi titsure Isennixtjintsjere Na'enchana xuta xi makjainre ngat'ana̱! Xi sa'en, kui= xi sja'nde_ra̱ nga skine ture ya xi tsik'endukunre xuta, xi sejña ña paraiso 'mi, nga'nde xi tse'e Na'enchana.” 8'Ba ti'indu_ri ankje xi tse'e xuta xi makjainre ngat'ana̱ xi tjindu naxinanda Esmirna: “'Bi tsu xi Titjun 'ba xi Fet'ani, xi k'en 'ba xi tijñakun ngani: 9'Be=ña̱ kjuanima xi techja'ai 'ba kjuanimari, ninga kjuakixi= nga nyinai. 'Ba 'be=ña̱ jo ch'otsa'en nchja ngat'ari xuta judío xi kitjujin ngat'are Na'enchana tsure yojore tunga bi kui ni. Tusa xuta xi tse'e ni'ya sinagogare chanayiu=nini. 10Bi kun_ri ngat'are kjuanima xi kuitjaxti. Ngu chanayiu skanis'en nduya yak'a xuta xi tu jngujún, tuxi xut'ayakoninú, 'ba kuitjaxtiu kjuana'en te nixtjin. Kixi tisen, ninga tsa tjinnere nga kjuinik'enri, 'ba an sjara̱ kjuabenichun xi bi fet'a joni chji xi kua'ere xuta xi sa'en. 11¡Xi tjin ñojon ngatasen ñojon mé= xi titsure Isennixtjintsjere Na'enchana xuta xi makjainre ngat'ana̱! Xi sa'en, kui xi niñajanni siko kjuabeya xi majóni.” 12'Ba ti'indu_ri ankje xi tse'e xuta xi makjainre ngat'ana̱ xi tjindu naxinanda Pérgamo: “'Bi tsu xi ya'a kicha xi 'ñu yojoxkun kji'i xi yojó ngojó ngatere: 13'Be=ña̱ nga teni nga'nde ña tijña chanayiu nga tibatexuma. Tunga ji janda= kixi tesen ngat'ana̱ 'ba bi kjinicheje kjuamakjainri ngat'ana̱, nisi nixtjin nga kjinik'en xi Antipas 'mi. Xi xuta kixi xi kitsikixiya ngat'ana̱ 'ba xi kjinik'en nanginu, ña tijña chanayiu. 14Tunga tjin= masen tsajmi xi bi tisasenna̱ ngat'ari. Ngat'a teba'e'ndeni nga tjindujin yak'ari xi inya'bejñatjo xi yakuya Balaam. Xi inya'a Balac jotsa'en sa'en nga ku̱an k'uejña kjuana'en ngat'are kjuamakjainre naxinanda Israel nga skine chje xi kitsa'ere na'en xi ntsja xuta kuandani 'ba nga sa'en kjuachajngi ngayeje. 15'Ba nde teba'e'nde nga tjindujin yak'ari xi inya'bejñatjo xi bakuya xi tjenngire xuta xi Nicolaus 'mi. 16'Bamani, tik'antjaiye kjuafa'etsjenri 'ba ndiba ngani ngixkun Na'enchana. Tsa bi 'ba si'en, kjua'ekunxatira̱ 'ba ko kicha xi ti'betjuni ndsu'baa̱ skjankoña̱ xuta xi 'ba inyatsa'en. 17¡Xi tjin ñojon ngatasen ñojon xi titsure Isennixtjintsjere Na'enchana xuta xi makjainre ngat'ana̱! Xi sa'en, kui= xi sja'nde_ra̱ nga skine mana xi kis'ejña'mo, 'ba nde sja_ra̱ jngu ndiojo tiba ña kua'indut'a jngu ja'en xatse xi tu'yá be. Tu kui sani xi xuntsja, kui= xi skue.” 18'Ba nde ti'indu_ri ankje xi tse'e xuta xi makjainre ngat'ana̱ xi tjindu naxinanda Tiatira: “'Bi tsu Ki'ndire Na'enchana, xi 'ba kun tuxkun joni ndi'i 'ba ndsaku joni bronce xi kua'na nga kjinitsje: 19'Be=ña̱ mé= xi tu ñe'en. 'Be=ña̱ ngat'are kjuanimejenri 'ba ngat'are kjuamakjainri ngat'ana̱. 'Be=ña̱ jótsa'en teña'axat'anaa̱ 'ba jótsa'en ko kjuatsejnda tichukjuakori. 'Ba=nde 'bia̱ nga ngisa 'ñu teña'axai nganda'e nga ko mare ngatuts'inre kionga tjun kuakjainri ngat'ana̱. 20Tunga kibi= xi bi tisasenna̱ ngat'ari, nga teba'e'nde_ri chjun xi Jezabel 'mi xi jngu profeta tsure yojore nga ti'bonachare xutana̱ ko xi tibakuya nga sa'en kjuachajngi 'ba nga skine chje xi kitsa'ere na'en xi ntsja xuta kuandani. 21Je= kitsja'nde_ra̱ chjunbiu nga sik'antjaiya kjuafa'etsjenre 'ba kjua'e ngani ngixkun Na'enchana, tunga bi mejénre k'uejña kjuachajngire. 22Kui kjua sikajña'onña̱ chjunbiu, 'ba 'ñu tse kjuana'en xi sja_ra̱ nchja xi tsa'enko kjuachajngi ngayeje, tsa bi sik'antjaiya kjuafa'etsjenre nga k'uendu xi kuánre ngat'are chjunbiu. 23'Ba sik'en=ña̱ xi tjenngire chjunbiu, 'ba 'batsa'en skueni ngatsi'i xuta xi makjainre ngat'ana̱ nga an xi 'bia̱ jó fa tjin kjuafa'etsjenre ko inimare xuta. 'Ba nga jngu jnguu sjanu chjinu jo nga kjiño'on. 24'Ba ngat'anu jun xi tetsubo Tiatira xi bi te'bejñatjo en xi tibakuya chjunbiu 'ba xi bi tjimanu ngat'are xi kjuatji'more chanayiu 'mi, xin_nuu̱ nga bi nde sja ngisani_nuu̱ kja'e ch'a. 25Tunga t'ejñatjo=ñu mé= xi je tjinnu 'nda nga̱ an kjua'e ngañaa̱. 26Xi sa'en 'ba xi janda kuendujuko xa xi mejénna̱ nga sa'en, kui= xi sja_ra̱ kjua'ñu nga kuatexumare naxinanda xi tjin ngasun'ndio. 27Kuatexuma ko jngu yaníse xi kicha kuandakoni. 'Ba 'ñu kuejenre xuta, 'ba 'ba= ku̱anre xuta joni jngu tiji nangi xi maxkua nga bichune kicha. Sja_ra̱ kjua'ñu jotsa'en kitsjana̱ kjua'ñu Na'enna̱. 28'Ba nde sja_ra̱ niñu xi ngisa tí nga je tjis'e isen. 29¡Xi tjin ñojon ngatasen ñojon mé= xi titsure Isennixtjintsjere Na'enchana xuta xi makjainre ngat'ana̱!”

will be added

X\