APOCALIPSIS 19

1Nga je kuán kibiu, kjint'e_ra̱ xi 'batsa'en kjinu'yare joni jndare 'ñu nkjin xuta xi 'ñu kinchja ngank'aa nga 'bi kitsu: “¡Ngatjanichjire Na'enchana! Kui= xi tsik'angina 'ba xi tu kui tajngu tse̱'e̱ yeje kjuaje ko kjua'ñu. 2Ngat'a kixi= tsa'en kjua nga ko fani kjuakixi, 'ba kitsa'enre kjua chjun masen xi nda 'yare, xi kitsijndi xuta xi tse'e ngasun'ndio ko kjuachajngire. 'Ba Na'enchana je= kitsingojore jinre xutare.” 3'Ba nde 'ba= kitsu ngani: “¡Ngatjanichjire Na'enchana! Ni̱'ndi xi ti'betukajin naxinando, kuijinntsjai ka'nda ngantsjai nixtjin.” 4'Ba jaskan kitsikindi yojore 'nda t'anangiu nchja chinga xi kañujun ko nga ñujun xi tjindukun nga kitsichjire Na'enchana xi tijñasun yaxile ña tibatexuma. 'Ba 'bi kitsu: “¡'Ba ngatjama! ¡Ngatjanichjire Na'enchana!” 5'Ba kjinu'yare jngu jnda xi jendibani ña sejña yaxilio xi 'bi kitsu: “Tichji_ru Na'enchana ngatsi'u xi ña'axat'a_ru kui 'ba 'yakun, ninga xi ni̱ma̱ 'ba ninga xi tjinre kjua'ñu.” 6'Ba jaskan kjint'e ngañaa̱ xi 'batsa'en kjinu'yare joni jndare 'ñu nkjin xuta. Kjinu'yare jotsa'en fane ña ntjai nanda 'ba joni nga 'ñu fane cho'on. Xi kitsu: “¡Ngatjanichjire Na'enchana! Ngat'a je tibatexuma Na'enchana, Na'en xi tjin yejere kjua'ñu xi tjin. 7Sitsja_ra yojona 'ba 'ñu ngatjas'ena kjuatsja 'ba sikixiya nga kui tjinre kjuaje, ngat'a je ja'e chu̱ba̱re kjuabixanre Ki'ndi borrego, 'ba chjunre je tijñandare yojore. 8Je kitsa'e'ndere nga kuaja najñu tiba xi chji, xi tsje, 'ba xi tiba'na, xi tsunire mé= xi kitsa'en xuta tsjere Na'enchana nga kixi fiko yojore.” 9'Ba ankje kitsuna̱: “Ti'indi kibi: ¡Ndaxure xi kjinikjint'e s'ire kjuabixanre Ki'ndi borrego!” 'Ba nde kitsu ngisana̱: “Kui=bi xi en kjuakixire Na'enchana.” 10'Ba jaskan tsakasenkunch'int'a_ra̱ ankje nga sichji_ra̱ tsakaiñu, tunga 'bi kitsuna̱: “Bi 'ba ñe'en. An= xi 'ba nde tetsa'exang_ra̱ Na'enchana joni ji ko nts'é xi kixi 'bejñatjo en xi kitsuyakixi Jesús. Na'enchana xi tjinnere nga sichji_ri.” Ngu en xi kitsuyakixi Jesús, enbi xi tsikinchjare nchja chinga profeta. 11'Ba jaskan tsa'bia̱ nga kichjux'a ngank'aa. 'Ba kji'yare jngu chakabayu tiba. 'Ba xi tijñakjare, kui= xi Kixi 'ba Kjuakixi 'mi ngat'a kixi= tsa'en nga tsa'en kjua 'ba nga kjan. 12'Ba 'ba kun tuxkun joni ndi'i, 'ba nkjin corona tjisunre, 'ba tjit'are jngu ja'en xi tu kui tajngu be. 13'Ba yaja jngu najñu xi 'yajunre jin. 'Ba ja'enre, kui xi Enre Na'enchana. 14'Ba tjenngire chasoldadu xi tjin ngank'aa. Tjindukjare chakabayu tiba nga yaja najñu xi chji, xi tiba 'ba xi tsje. 15'Ba nga'a ts'a ti'betjuni jngu kicha xi 'ñu yojoxkun kji'i, tuxi sikja'ani kjuanima nangi xi tjin ngasun'ndio. 'Ba kuatexumakonire yaníse xi kicha kuandani. Sa'enre kjua joni xi basenne uva nga tsits'iungi, 'ba sikasennere kjuasti jere Na'enchana xi tjin yejere kjua'ñu xi tjin. 16Najñu nduju xi yaja ko ngasure kua'indut'a ja'enbi: “Reyre rey 'ba Naire nai.” 17'Ba tsa'bia̱ jngu ankje xi sejñajin ndi'ire tsu'biu. Xi 'ñu kinchja nga 'bi kitsu tsi'ire tjiunike xi inyatutjen ngank'aa: “Jabiu 'ba ngatamaku nga xino xichine xi 'ñu tse xi tsja Na'enchana. 18Ndeninchjo yojore mik'en xi tse'e rey, xi tse'e ngakure chasoldadu, xi tse'e nchja xi 'ñu kakun, xi tse'e chakabayu ko xi 'bendukjare, ko xi tse'e ngatsi'i xuta, ninga xi ndai asa chu'nda xi tsindaa̱, 'ba ninga xi tjinre kjua'ñu asa xi ni̱ma̱.” 19'Ba jaskan tsa'bia̱ tjiubabiu ko rey xi tjin jo kji'i ngasun'ndio nga tjenko chasoldadure. Xi kuañajan, tuxi skjankoni xi tijñakjare chakabayu ko chasoldadure. 20'Ba tjiubabiu kjinduba'ñu ñatjen ko profeta ndesu xi ja'ba je kitsa'en kjuakun ngixkun. Ngat'are kjuakunbiu tsak'onachakonire xuta xi kitsja'nde nga kis'et'are chu̱ba̱re tjiubabiu 'ba xi kitsichjire isenre. Ngu kichanikja'ajin tjikun tjiubabiu ko profeta ndesu ngajin nga'nde xi kitse ndi'i xi titíkoni asufre. 21'Ba ngatsi'i chasoldadure kjinikjesunkoni kicha xi ti'betjuni ts'a xi tijñakjare chakabayu. 'Ba ngatsi'i tjiunike kiskine yojore nchjabiu 'ba 'ñu kitsere.

will be added

X\