APOCALIPSIS 11

1'Ba kika'ena̱ jngu ya chu̱ba̱ xi 'ba kji'i joni yanaxu, 'ba 'bi kik'innaa̱: “T'in 'ba t'echubai ningure Na'enchana ko altare. 'Ba t'exki jó tjin mani xi kio inyatsichjire Na'enchana ngayeje. 2Tunga bi 'bechubai nga'nde xi tijña ngandetsinre ningu, ngat'a kui= nga'ndebiu xi kitsa'ere naxinanda xi bi makjainre ngat'are Na'enchana. Xi yachan jó sa kuinyane naxinanda tsje. 3'Ba an sikasia̱n jó xi sikixiya ngat'ana̱. Xi kuaja najñu kjue 'ba sikja'axtiuya enna̱ nde 'batjinni jngu mi ko jó sientu yachute ko te nixtjin.” 4Ngojó xutabiu, kui ngojó ya olivo 'ba ngojó tsajmi xi s'endusun ndi'i lámpara xi inya ngixkun Na'enre ngasun'ndio. 5'Ba tsa tjin xi mejénre si'onre xutabiu xi jó, ndi'i= k'uetju ts'a xi kuaka xi mastike. 'Ba=tsa'en kjuinik'en tu'yañu xi mejénre si'onre. 6Kui= xi kika'ere kjua'ñu nga k'uechja ngank'aa, tuxi bi nde kua'ani tsi jotjin nixtjin kua'ndayare nga sikja'axtiuya enre Na'enchana. 'Ba=nde kika'ere kjua'ñu nga sa'en nga nando ku̱an jin 'ba nga sikasenre ngasun'ndio ngayéje kuya kjuanima. Ku̱an 'ba sa'en jotjin ndiya mejénre. 7'Ba kionga je ku̱ajngu xare ngojó xi tsikixiya ngat'ana̱, kui tjiuba xi ndibanijin nga'nde ña 'ñu nanga tixa, kui= xi skjanko, sa'enre 'ba sik'en. 8'Ba s'e̱ndu yojore mik'ion ngaya ndiya tere naxinanda jio, ña 'ba nde kis'et'a kru Na'enre. Xi tsure xuta naxinanda “Sodoma” 'ba ko nangi “Egipto” joni kusun. 9'Ba ján nixtjin masen kuekutsejen'a yojore mik'ion ngatsi'i xutare naxinanda xi tjin, ntjere xuta xi tjin, xi nchja kja'e kjuanga en, 'ba ko xutare nangi xi tjin. 'Ba bi sja'nde nga s'eyanijin yojore ngayeje. 10'Ba ngatsi'i xuta xi tse'e ngasun'ndio tsja ku̱anre ngat'are kjuabeyare. S'e̱re kjuatsja 'ba sjakañare kjuatjo xinkjin, ngat'a je jesun nchja chinga profeta xi jó xi kitsjare kjuasti. 11Tunga nga je ja'a ján nixtjin masen, Na'enchana kitsja nga'ñu nganire xutabiu 'ba kitsik'endukun ngani. 'Ba tsisetjen ngani, 'ba ngatsi'i xi tsabe 'ñu kitsakjun. 12'Ba 'batsa'en ngojó xi tsikixiya ngat'are Na'enchana kjint'e jngu jnda xi 'ñu tinchja, xi jendibajenni ngank'aa xi kitsure: “¡Ndibanijiun nga'e!” 'Ba jngu yufi tjenjin nga kinijinko ngank'aa yejerañu xi mastike kiskutsejen'a. 13'Ba ndekuini chubabiu ja'a jngu chon xi 'ñu, 'ba jekjua jngu yá ya xi mateni naxinando. 'Ba yatu mi xuta jesun. 'Ba xuta xi ts'angi 'ñu kitsakjun 'ba kitsikixiya nga tjinre kjuaje Na'enchana xi tijña ngank'aa. 14Je ja'a kjuanima xi majóni, tunga je matiña xi majánni. 15'Ba ankje xi mayatuni kitsikjane tjiore, 'ba kjinu'yare ngank'aa nkjin jnda xi 'ñu kinchja nga kitsu: Ngasun'nde ña yatexuma xuta, je kuán nga'nde ña batexuma Na'enchana ko Cristore, 'ba kuatexuma ka'nda ngantsjai nixtjin. 16'Ba nchja chinga xi kañujun xi tjindusun yaxilere ngixkun Na'enchana kitsikindi nindaku 'nda t'anangiu 'ba kitsichjire Na'enchana 17'ba 'bi kitsu: Teba'e=ri̱ kjuanda, ji Naini̱, Na'en xi tijña 'ba tsik'ejña, xi tse'e ngayéje kjua'ñu xi tjin. Ngat'a je tenichjen kjua'ñuri xi je, 'ba je te'betuts'in_ri nga tebatexumai. 18'Ba je= kuastire naxinanda xi tse'e ngasun'ndio, tunga je= ja'e nixtjin nga kuakui kjuastiri xi je, chu̱ba̱ nga ku̱anre kjua xuta xi je jesun, 'ba kua'eri chjire xi 'bakore xuta xi tsiji, nchja chinga profeta ko xuta tsje xi tsiji 'ba ko ngatsi'i xi bekun ja'enri, ninga xi tjinre kjua'ñu ninga xi ni̱ma̱. 'Ba sikjeni xi inyatsikjetsun ngasun'ndio. 19'Ba 'batsa'en kitju'i ningure Na'enchana xi kjijña ngank'aa, 'ba ngaya ningu kji'yare kaxa xi bakutsejen nga Na'enchana 'endako kjua xuta xi tse'e. 'Ba tsa'na ndi'i cho'on, 'ba kis'e si'a, jane cho'on, kuán jngu chon, 'ba 'ñu tsa'a tsindijo.

will be added

X\