FILEMÓN 1

1An, Pablo, tetsikasia̱n xujunbi, xi tekjiyaa̱ nduya tu kjuare nga tetsikja'axtiuyaa̱ en ndare Jesucristo, 'ba ko nts'ia Timoteo xi tijñakona̱ nga'e. Tetsikasenra̱ xujunbi Filemón, ji xi nimejénri̱ xi ndekui xa teña'anni joni ji̱n, 2ko Apia xi ndichja mani, ko Arquipo xi 'ba nde tikjanntjai enre Na'enchana joni ña, 'ba ko xi makjainre ngat'are Jesús xi mañajan ni'yari. 3Ngatas'enu kjuanda ko kjuaxiu xi tsjana Na'enchana ko Na'enna Jesucristo. 4Nga fakua̱ Na'enchana, ji tenijinntsjai kjuafa'etsjenna̱ 'ba tsja_ra̱ kjuanda kui ngat'a tsiji. 5Ngat'a tji'be=na̱ nijmi jótsa'en makjainri ngat'are Na'enna Jesús 'ba jótsa'en nimején kui 'ba ko ngatsi'i xuta tsjere Na'enchana. 6'Ba mi'a_ra̱ Na'enchana nga kjuamakjainna xi tujngu ngatabasekori nga ngisa nda ku̱ankjinri ngayéje xi nda xi Na'enchana je kitsjana ngat'are Cristo Jesús. 7Ne tsja tjinna̱ 'ba tisaku=na̱ kjua'ñukakun ngat'are kjuanimejen xi tijñajinri. Ngat'a ngat'ari ji, nts'ia̱, xuta xi makjainre ngat'are Na'enna Jesús kisaku nga'ñure inimare. 8'Bamani, ninga tjinna̱ kjua'ñu ngixkun Cristo nga ku̱an k'uenera̱ mé= xi tjinnere nga si'en, 9tunga tusa te'bets'ara̱ jngu kjuanda ngat'a nimején=ña xingia. An Pablo xi je kuachingaa̱ 'ba kjiyaa̱ nduya tu ngat'are Cristo Jesús, 10temi'ara̱ jngu kjuanda ngat'are Onésimo. Kui xi je joni tsa ki'ndina̱ fa kuán nga'e ngaya nduyo ngat'a kuakjainre enre Na'enna nga jakuaa̱. 11Kui xi nixtjin kuatse jan kuán ngat'ari joni xuta xi tumé chjire, tunga nganda'e je chjire ngat'ari 'ba ngat'ana̱. 12'Ba tetsikasen nganira̱. Chjubetjai jo fani tsa an. 13An mejénna̱ nga k'uejñako ngisana̱ tsakaiñu, tuxi kui kuasekonina̱ xa xi ji mejénri si'en ngat'ana̱ nganda'e nga tejñaa̱ nduya tu ngat'are nga tetsikja'axtiuyaa̱ en ndare Na'enna. 14Tunga bi mejénna̱ tu chu̱ba̱ tsa'aa̱n, tsa bi tjijngu takuin, tuxi ngajin inimari kjuendibani kjuanda xi si'en 'ba bi an k'uenera̱. 15Ngu tsa kui= kjua chuba nixtjin tsakasent'axinniri Onésimo, tuxi ngat'ari k'uejñantsjaini nganda'e. 16Tunga nganda'e bi nde tsa joni jngu chu'nda xi tsindai. Tusa joni jngu xuta xi ngisa 'ñu chji ngisare nga ko mare jngu chu'nda. Ngat'a je kuán jngu nts'ia xi nimijáan. An 'ñu tsimijaa̱n, tunga ngisa 'ñu timején ngisai ji. Ngat'a xingia mani nga'e ngasun'ndio 'ba nts'ia mani ngat'are Cristo. 17'Bamani, tsa mara̱ ji joni jngu xuta xi ñatjen ña'axai, chjubetjai Onésimo jofatsa'en chjubetjonaa̱ an. 18Tsa tjin me=ñu xi ch'o kitsa'en asa tjin tsajmi xi tjenre tsiji, an tik'echjina tsajmibiu. 19An Pablo ko ndsaa̱ tetsi'induña̱ xujunbi. An k'uechjaa̱ xi Onésimo tjenre tsiji, ninga bi sikja'etsjenyara̱ nga 'ba nde tjenri tsa'an ka'nda inimari. 20Jun nts'ia̱, ti'en kjuandabi ngat'are Na'enna. Ta'e nga'ñuri inimana̱ ngat'are Cristo. 21'Ba=tsa'en tetsi'indaa̱, ngat'a bere takuaa̱n nga kjuinu'ye enna̱ 'ba ngisa= nda si'an ngisai nga ku̱anre xi temi'ara̱. 22'Ba kja'e tsajmi temi'a ngisara̱. 'Ba nde t'endai jngu nga'nde ni'yari ña ku̱an kuatejñaa̱, ngat'a bere takuaa̱n nga Na'enchana sjanu mé= xi techjo'o, nga ku̱an kjuikun_nuu̱. 23Tetsikasenra̱ kjuate'ndare Epafras, xi 'ba nde tijñakona̱ nduya nga'e ngat'are en ndare Cristo Jesús. 24'Ba nde tetsikasenra̱ kjuate'ndare Marcos ko Aristarco ko Demas 'ba ko Lucas, nchja xi ndekui xa inyatsa'enni joni an. 25Nga Na'enna Jesucristo ngatatsichikunta'ennu.

will be added

X\