SAN MATEO 9

1'Ba 'batsa'en Jesús ja'as'en jngu barku nga ja'axtiu ndachikun, 'ba echu ngani naxinandare. 2'Ba kio ja'ekun Jesús nchja xi ya'ank'angi jngu xuta xi bi ma fi, xi kjiyare kuxta. 'Ba kionga Jesús tsabe kjuamakjainre nchjabiu, kitsure xi tji'mio: ―Titsja_ri takuin, ki'ndina̱. Je kuachat'ari jeri. 3'Ba yak'a chjine kjuatexuma 'bitsa'en kitsikja'etsjen: “¿Jótsa'en ma kakun xutabi nga bi bekun Na'enchana nga 'bitsa'en tinchja?” 4Tunga Jesús be= mé= xi inyatsikja'etsjen nchjabiu 'ba kitsure: ―¿Ánñu 'bi ch'o tsa'en tenikja'etsjenñu? 5¿Ñáre xi ngojó enbi bi na'en tjinre nga xia̱n? ¿A kio=nga xia̱n: “Je kuachat'ari jeri”? ¿Asa kio=nga xia̱n: “Tisetjen 'ba titjajme”? 6Tunga mejénna̱ nga xio nga Ki'ndire Xuta xi'iun tjinre kjua'ñu nga'e ngasun'ndebi, nga ku̱an sichat'are jere xuta. 'Ba 'batsa'en kitsure xuta xi bi ma fi: ―Tisetjen, chjube kuxtari 'ba t'in ngani ni'yari. 7'Ba 'batsa'en xi tji'mio tsisetjen 'ba kiji ngani ndaba. 8'Ba kionga xutankjiun tsabe kibiu, kitsakjun 'ba kitsichjire Na'enchana, ngat'a kitsikasen ngajinre xuta jngu xi tjinre kjua'ñu xi 'batsa'en je. 9'Ba kionga Jesús je 'etjuni kio, tsabe jngu xuta xi Mateo 'mi, xi tijña nga'nde ña tjubechjintjai tsajmi, 'ba kitsure: ―Ndetjenngina. 'Ba 'batsa'en Mateo tsisetjen 'ba kitjenngi Jesús. 10'Ba 'bi kuán kionga Jesús tikjen ndaba, nkjin nchja xi kjebechjintjai tsajmi ko xuta je ja'e. Kui xi ñatjen tsik'endut'ako Jesús ko xutare t'a yamixo. 11'Ba kionga xuta fariseo tsabe kibi, kitsure xutare Jesús: ―¿Ánñu maestrunu kjenkoni nchja xi kjebechjintjai tsajmi ko xuta je? 12Tunga kionga Jesús kjint'e kibi, kitsure: ―Xuta xi nda bi chjineki machjenre, tu kui sani xi sefesun. 13Tanginchut'ayo 'ba ngatjamanu jó tsunire enre Na'enchana xi 'bitsa'en kua'indut'a: “Kjuanima kakun xi mejénna̱, bi chje.” Ngat'a bi ja'ekinchja_ra̱ xuta xi kixi, tu xuta je sani. 14'Ba 'batsa'en xutare Juan ja'ekun Jesús 'ba tsiningiyare: ―¿Ánñu ji̱n ko xuta fariseo ne kjit'a betsuba kjindiani̱ 'ba xutari bi 'bendu kjindia? 15'Ba Jesús kitsingojore: ―¿A ma ba s'ere xuta xi tjindu ngajin kjuabixan kionga tijñajin ngisare xi xi'iun? Tunga kjua'e nixtjin nga xja'axinre xi xi'iun, 'ba kio=nga k'uendu kjindia. 16'Ba ni'yá 'bextiuyakoni jngu najñu chingá ko ichi najñu xatse xi kje fa'ekujín. Ngat'a najñu xatsio fa'eku 'ba 'betijnda najñu chingó, 'ba 'ba=tsa'en ngisa tse tijnda. 17'Ba nde ni'yá minya binu xatse ngaya jngu chitsa tjiuxin chinga. Ngat'a tsa 'ba sa'en, stijnda= chitsa tjiuxinbiu 'ba tisten binu 'ba kjuekjuakjin chitsa tjiuxinbiu. Kui kjuañu chitsa tjiuxin xatse xinyani binu xatse, 'ba 'batsa'en nda xinyatjo ngojó tsajmibiu. 18Yejerañu 'ba titsu Jesús, tukjia'a ja'e jngu xutaxa xi tsakasenkunch'int'are 'ba kitsure: ―Ki'ndi chjunna̱ sa'e fa k'en. Tunga tsa k'uikjane_ri ndsai, k'uejñakun ngani. 19'Ba 'batsa'en Jesús tsisetjen 'ba kiko xutare nga kitjenngi xutabiu. 20'Ba kio= kitsitiña ngastun Jesús jngu chjun xi kuatejó nu tjinre nga 'bakjanre jin 'ba kitsiko ndai najñu xi yaja. 21Ngat'a ja'ba je 'bitsa'en kitsikja'etsjen ngajinre: “Tsa tu ichifani ndai najñure sikua̱, ku̱anda=ngaña̱.” 22Tunga Jesús kitsiku'be 'ba kiskutsejen'a chjunbiu 'ba kitsure: ―Tsja t'e_ri takuin, ki'ndina̱. Kjuamakjainri je kitsindari. 'Ba ndekuini chubabiu kuanda chjunbiu. 23'Ba kionga Jesús echu ndaba xutaxabiu, tsabe nchja xi inyatsikjane tjio ko xutankjiun xi si'a inyatsa'en nga inyakji'nda. 24'Ba Jesús kitsure: ―Tinyat'axiun. Ngat'a bi kijñak'en ki'ndi chjunbi. Tu tikijñafe sani. 'Ba xuta xi kuañajan kio tu tsejnuke=. 25'Ba kionga je kji'naxje xuta, Jesús ja'as'en ña kjijña ki'ndi chjunbiu. Kiskjebe ntsja 'ba ki'ndi chjunbiu tsisetjen ngani. 26'Ba ngatsi'i xuta xi tjin nangibiu kjint'e en ngat'are xi kuán. 27Kionga Jesús ti'betju kio, kitsjenngire jó xuta ka xi kiskji'ndaya tjenngi 'ba kitsure: ―Ji ntjere David, chanima kakunni̱. 28'Ba kionga Jesús ja'as'en ndaba, kio ja'ekun xuta kabiu. 'Ba Jesús tsiningiyare: ―¿A makjainnu nga ku̱anna̱ sa'aa̱n mé= xi mejénnú? 'Ba nchjabiu kitsu: ―Jun, na'en. 29'Ba 'batsa'en Jesús kitsiko tuxkun nchjabiu 'ba kitsure: ―Ngatjama tsu'ba jotsa'en jun makjainnu. 30'Ba nchjabiu kuatsejen nganire. 'Ba 'batsa'en Jesús 'ñu 'enere nga kitsure: ―Tu'yá 'be_ru nijmi kibi. 31Tunga kionga nchjabiu 'etju, ye'e tsi'ire nijmi xuta xi tjin nangibiu ngat'are Jesús. 32Kionga inya'betju nga'ndebiu xuta xi ka tsakaiñu, ja'e xuta xi ja'ekanire Jesús jngu xuta xi bi ma nchja ngat'a tijñajinre isennixtjin xi bi nda. 33'Ba kionga Jesús ts'axje isennixtjin xi bi nda, kinchja ngani xuta nimo. 'Ba xutankjiun kuakunre 'ba kitsure xinkjin: ―Nisañajanni 'yare ngajinre xuta Israel jngu tsajmi xi 'ba kji'i. 34Tunga xuta fariseo kitsu: ―Kui xutabi ma 'baxje isennixtjin xi bi nda ngat'a xi ngakure isennixtjin xi bi nda kitsjare kjua'ñu. 35'Ba Jesús tsak'ajme ngayéje naxinanda ya'e ko naxinanda chi xi kio tjin 'ba yakuya ngaya ni'ya sinagogare. 'Ba kitsikja'axtiuya en nda xi tsuyana nga Na'enchana xi batexuma, 'ba kitsinda ngayéje kuya chi'in xi kunre xuta ko ña kjinere. 36'Ba kionga Jesús tsabe xutankjiun, ja'animare, ngat'a kjimafore 'ba kjinikumare joni chutsanga xi tsajainre xi tsikuenda. 37'Ba kio kitsure xutare: ―Xuta xi tjin, jo=ni jngu tsujmi ntje xi 'ñu tse, tunga chuba mani chu'nda. 38'Ba 'batsa'en tsu'ba chja'a_ru xi tse'e tsujmintjio, nga ngatatsikasen ngisa chu'nda tuxi k'ueñajanni.

will be added

X\