SAN MATEO 6

1Chutsejen_ru yojonu jo teño'on ngixkun Na'enchana. Bi tu ngixkun xuta nda ño'on, tsa tuxi skueninu. Ngat'a tsa 'ba si'on, tume chji sjanu Na'ennu xi tijña ngank'aa. 2'Ba mani, kionga kuisekue xuta xi na'en chunre, bi nijmi 'be ngat'are kibiu jotsa'en tsa'en xuta jó nkjain xi tjun tsikjane tjio ngaya ni'ya sinagoga 'ba ngaya ndiyo, tuxi nda skueni xuta. Kjuakixi= xi xin_nuu̱ nga kui je kisakure chjire. 3Tunga ji, kionga temisekue xuta xi na'en chunre, bi ngatjabe ndsai skjun mé= xi titsa'en ndsai kixi. 4Tusa tiseko'mai. 'Ba Na'enri xi be ngayéje xi teña'an'mai, kui sjangojo nganiri chjiri. 5'Ba kionga xuko Na'enchana, bi 'ba ño'on joni xuta jó nkjain xi matsjare minya nduju ngaya ni'ya sinagoga 'ba ko ña bakjanki ndiyo kionga fako Na'enchana, tuxi skueni xuta. Kjuakixi= xi xin_nuu̱ nga kui je kisakure chjire. 6Tunga ji, kionga xukuai Na'enchana, tjas'en ña 'mo chun 'ba t'echje xuntjari, 'ba chuko'mai Na'enri. 'Ba Na'enri xi be mé= xi teña'an'mai, kui sjangojo nganiri chjiri. 7'Ba kionga xukuai Na'enchana, bi nichjen ndekui nde mani en xi tsajain ndiyare jotsa'en xuta xi bi judío xi tsikja'etsjen nga 'batsa'en ngisa nda kjuint'e naire tu ngat'are nga 'ñu tsé nchja. 8Ngu bi 'ba ño'on jun jotsa'en xutabiu. Ngat'a Na'ennu je kui tjun be mé= xi machjennu kionga kje chja'ajín_ru. 9'Ba mani, 'bitsa'en chuko Na'enchana: Na'enni xi teni ngank'aa, ngatja'yakun ja'enri. 10Ngatjama nga'e jngu nga'nde xi batexumai. Ngatjama ngasun t'anangiu jotsa'en ji mejénri, jo tjima ngank'aa. 11Ta'enii̱ niñu xi machjenni̱ kui nixtjinbi. 12Tichat'anii̱ je xi teñe'ee̱n, jotsa'en ji̱n nichat'a_ri̱ xi ch'o tsikoni̱. 13Bi ba'e'nde nga xut'ayakoni̱. Tusa t'ejñat'axinnii̱ xi ch'o. Ngat'a ji xi batexumai, 'ba ji xi tjinri kjua'ñu, 'ba ji xi tjinri kjuaje xi bi kjuet'a. 'Ba ngatjama. 14Ngat'a tsa sichat'a_ru xuta xi ch'o tsikonu, 'ba=nde tsa'en sichat'anu Na'ennu xi tijña ngank'aa. 15Tunga tsa bi sichat'a_ru xuta xi ch'o tsikonu, 'ba=nde bi sichat'anu jenu Na'ennu. 16'Ba kionga kuetsuba kjindio, bi si 'bio nkjon jotsa'en xuta jó nkjain. Ngat'a kui= xi ch'o be'e nkjain, tuxi skueni xuta nga tjindu kjindia. Kjuakixi= xi xin_nuu̱ nga je kisakure chjire. 17Tunga ji, kionga kueni kjindie, tusa tsja tsa'en t'ejen 'ba nda chunkjain, 18tuxi bi skueni xuta nga teni kjindie. Tu Na'enri sani skue, xi tijña ña 'ma. 'Ba Na'enri xi be mé= xi teña'an'mai, kui sjangojo nganiri chjiri. 19Bi 'bejñatjo tsajmi xi sinyinanu nga'e t'anangiu, ña tsikjetsun tjiuxabi 'ba ña tjuxa tsajmi 'ba ña chacheje bakjanngi ni'ya 'ba fikocheje. 20Tusa ngank'aa t'ejñatjo xi sinyinanu, kioña bi tsikjetsun tjiuxabi 'ba bi tjuxa tsajmi 'ba ña chacheje bi bakjanngi ni'ya 'ba fikocheje. 21Ngat'a ña tijña kjuanyinari, 'ba=nde kio tijña inimari. 22'Ba tuxkuin jo=ni jngu ndi'i xi tsitsejenre yojori. 'Ba mani, tsa tuxkuin nda, ngayéje yojori matsejenre. 23Tunga tsa tuxkuin bi nda, ngayéje yojori tijña jñu. Ngu tsa ndi'i xi tjin ngajinri jñu, ¡ne 'ñu jñu ña teni! 24Nijnguú chu'nda ma tsa'exat'are jó nai. Ngat'a jngu xi ku̱astike 'ba xi ngijngu simején, asa jngu xi kixi sa'exat'are 'ba xi ngijngu siton. Kui kjuañu bi ku̱an si'axat'ani_ru Na'enchana ko kjuanyino. 25Kui kjuañu 'ba xin_nuu̱ nga bi nikjo ngat'are mé= xi machjennu nga kuetsubakun nga'e ngasun'ndebi, mé= xi xino asa mé= xi s'iu. 'Ba nde bi nikjo ngat'are mé= xi machjenre yojonu, mé= najñu xi xojo. Ngat'a kjuabenichunnu, kui= xi ngisa chjire nga ko mare xichine. 'Ba yojonu, kui= xi ngisa chjire nga ko mare najñu. 26Chutsejen'o tjiunise xi tutjen ngank'aa. Kui bi 'bentje, ninga bi 'beku ntje, ninga bi minyaku ntje ngaya ni'yare. Tunga Na'ennu xi tijña ngank'aa tsikjén. 'Ba jun, ¿a bi ngisa chji_ru nga ko mare tjiunisio? 27Ninga 'ñu sikjo ngat'anu, bi ku̱annu k'uetjun_ru ngijngu hora ngisa kjuabenichunnu. 28'Ba ¿ánñu mafoninu ngat'are najñunu? Chutsejen'o jótsa'en mank'a naxu ngi ngijño. Bi tsa'exa 'ba bi tsinda nachjun. 29Tunga an xin_nuu̱ nga ninga rey Salomón xi 'ñu nyina kuán nixtjin kuatse jan, bi 'ba kun najñu tsakaja joni naxu. 30Tsa Na'enchana tsja tsikun ngijña xi tjin nganda'e 'ba xi nyujunni kuiti, ¿a bi ngisa sjanu najñu xi xojo jun xi ngisa 'ñu chji_ru nga ko mare naxu? ¡Jun xi chuba makjainnu! 31'Ba mani, bi nikjo tsa kuixun: “¿Mé= xi xina?”, “¿mé= xi s'ia?” asa “¿mé= najñu xi xaja nganda'e?” 32Ngat'a ngayéje kibi, kui= xi mangisjai xuta xi bi judío, 'ba Na'ennu xi tijña ngank'aa je be nga machjennu ngayéje tsajmibi. 33Tunga titjun tinyisjo nga si'on jotsa'en mejénre Na'enchana ña batexuma 'ba xi kixi tjin ngixkun, 'ba sakunu ngayéje tsajmibi ya'a. 34'Ba 'batsa'en, bi nikjo_ru yojonu mé= xi ku̱an nyujunni, ngat'a nyujunni saku'nde nganinu nga sikjo. Ngayéje nixtjin tjinre kjuastire.

will be added

X\