SAN MATEO 3

1'Ba kui nixtjinbiu, Juan Bautista ja'etsikja'axtiuya enre Na'enchana nga'nde t'axin xi tjin Judea. 2'Ba kitsu: ―Tik'antjaiyo kjuafa'etsjennu 'ba ndiba ngañu ngixkun Na'enchana, ngat'a je tjimatiña nixtjin kionga kui kuatexuma. 3Ngat'are Juan kinchja xuta chinga profeta Isaías nga 'bitsa'en kitsi'indu: Tjinu'yare jndare jngu xuta xi 'ñu nchja nga'nde t'axin: “T'enda_ru 'ba kixi chju'i_ru ndiyare Na'enchana.” 4'Ba Juan yaja najñu xi kuandakoni ntsjare chakameyu 'ba ko jngu tjiuxinjnde tikjakonire. 'Ba naxkajndi ko ntsjenre tjiuchusera xi tjin ngijña kjine. 5'Ba 'etju xutare naxinanda Jerusalén ko ngatsi'i xuta xi tjin nangi Judea 'ba ko ngatsi'i xuta xi tjin ngandai ndaje Jordán nga ja'ekasen ñojonre Juan. 6'Ba kisatenda ngajin ndaje Jordán, kionga je ye'e nijmi je xi tjinre. 7Tunga kionga Juan tsabe nga ne nkjin xuta fariseo ko nchja saduceo inyafa'e nga mejénre nga satenda, kitsure: ―Jun ntjere tjiuye, ¿'yá= xi 'ba kitsunu nga kuiyu ngat'are kjuastire Na'enchana xi je tijña tiña? 8Tusa ngat'are xi si'on takutsijion nga je kjinik'antjaiyo kjuafa'etsjennu 'ba nga je ja'e ngañu ngixkun Na'enchana. 9Bi yojonu 'bejñujin_ru nga kuixiun: “Ña= xi ntjere Abraham.” Ngat'a 'ba xinkixi_nuu̱ nga ka'nda kui ndiojobi Na'enchana ku̱anre sa'en ntjere Abraham. 10Je tijñanda hachare Na'enchana nga kuate jamare yo. Meni ngayéje ya xi bi nda tu tsja, stisun 'ba xanikja'ajin ndi'u. 11An ko nanda batenda_nuu̱ tuxi xianire nga je kjinik'antjaiyo kjuafa'etsjennu 'ba nga je jendiba ngañu ngixkun Na'enchana. Tunga xi ndiba jaskanre an, kui= xi ngisa tjinre kjua'ñu, ka'nda an bi bakinna̱ kua'atuntsjaa̱ jndere. Kui ko Isennixtjintsjere Na'enchana 'ba ko ndi'i kuatendaninu. 12Kui jo=ni xuta xi tsitsje trigo. Kitjunre ntsja tsajmi xi basen ntjokoni, tuxi k'uejñat'axinni trigo 'ba k'uejñat'axin xtjere. 'Ba 'batsa'en kuinyatjo trigo ni'yare ña minyatjo, 'ba kuaka xtjere ngajin ndi'i xi bi 'boya ―kitsu Juan. 13'Ba 'batsa'en Jesús 'etju nangi Galilea 'ba ja'ekun Juan ndaje Jordán, tuxi kui kuatendani. 14Tunga Juan bi kitsikjain nga titjunre 'ba kitsure: ―An= xi ji kuatendanaa̱ tsakaiñu. ¿Jótsa'en nga an tendibachunnaa̱ nga kuatendara̱? 15'Ba Jesús kitsingojore: ―Tu 'bara ngat'e nganda'e, ngat'a nda= tjin nga sik'etjusan ngayéje xi mejénre Na'enchana. 'Ba 'batsa'en kitsikjain Juan. 16Kionga je kisatenda Jesús, nga 'etjujin nando, kitju'i ngank'a 'ba tsabe Isennixtjintsjere Na'enchana joni jngu nise tiba nga jendibajennere. 17'Ba kjinu'yare jngu jnda ngank'a xi kitsu: ―Kui=bi xi Ki'ndina̱ xi 'ñu tsimijia̱n, xi 'ñu tsja mana̱ ngat'are.

will be added

X\