SAN MATEO 26

1Kionga Jesús je yakuya ngayéje kibiu, 'bi kitsure xutare: 2―Je 'yo nga jó nixtjin chaja ngisa nga k'uetju s'i pascua, 'ba Ki'ndire Xuta xi'iun ku̱angantsja tuxi s'e̱t'ani kru. 3'Ba kui nixtjinbiu na'mi titjun ko nchja chingare naxinando kuañajan ngantja ndaba na'mi titjun Caifás. 4'Ba kio joyare jótsa'en k'uejñure Jesús tuxi ku̱an skaninejeni 'ba sik'en. 5Tunga 'bi kitsure xinkjin: ―Bi ngajin s'iu kjuinduba, tuxi bi si'a sa'enni naxinando. 6'Ba kionga Jesús tijña naxinanda Betania ndaba Simón xi xuta fe'ndujun 'mire, 7kitsitiñat'are jngu chjun xi ya'a jngu lameta xi alabastro nini xi kitse nanda xi ixi jen 'ba xi 'ñu chji. 'Ba yejerañu nga Jesús tijñat'a yamixo, chjunbiu 'estejunre nindaku nandabiu. 8'Ba nga xutare Jesús tsabe kibiu, kuakjanre 'ba kitsu: ―¿Ánñu kitistentonni nandabiu? 9Ngat'a kuáan 'ñu chji kich'ani tsakaiñu tsa kisateña 'ba ku̱an kua'ere xuta ni̱ma̱ tonre. 10Tunga Jesús tsabe mé= xi inyatsu, 'ba kitsure: ―¿Ánñu jun tenistini_ru chjunbi? Nda= tjin xi kitsikona̱. 11Ngat'a xuta ni̱ma̱ tu i= k'uendujinntsjainu, tunga an bi nga'e kuatejñajinntsjai_nuu̱. 12Ngat'a nga 'estejunna̱ nanda xi ixi jen chjunbi, je 'ejñanda yojona̱, tuxi s'e̱yanijinña̱. 13'Ba xinkixi_nuu̱ nga nituña nga'ndere ngasun'ndio ña kjua'axtiuya en ndare Na'enchana, 'ba=nde kjuinukjua mé= xi kitsa'en chjunbi 'ba 'ba=tsa'en kjuinikja'etsjenya. 14'Ba jngu xutare Jesús xi tejó, xi Judas Iscariote 'mi, kikun na'mi titjun 15'ba kitsure: ―¿Mé= xi kua'enuu̱ tsa singantsja_nuu̱ Jesús? 'Ba nchjabiu 'endako xinkjin 'ba kitsjare kate ton xi plata ni. 16'Ba tsaka'anire kui nixtjinbiu nga Judas tsangisjai ndiya jófatsa'en ku̱an singantsjani Jesús. 17Nixtjin nga 'betuts'inre s'i pascua, nga chine niñuxtila xi tsajainre na'yu san, xutare Jesús kitsitiñat'are 'ba kitsure: ―¿Ñá=ñu mejénri nga kuek'endai xi xina s'i pascua? 18'Ba kui kitsure: ―Tangiun ngajin naxinando 'ba tangiun ndaba kui xutabiu 'ba 'bi t'in_ru: “Maestru tsu: Je tjimatiña chubana̱, 'ba ni'yari kjuik'axjia̱ s'i pascua nga ko xutana̱.” 19'Ba xutare kitsa'en xi kitsure, 'ba 'enda xi skine s'i pascua. 20'Ba nga je kuajñu, Jesús tsik'ejñat'ako yamixo ko xutare xi tejó. 21'Ba kionga je inyakjen, 'bi kitsure: ―'Ba fa xinkixi_nuu̱ nga jnguñu jun xi singantsjana̱. 22'Ba xutare 'ñu kuafore 'ba 'etuts'inre nga tsiningiyare nga jngu jngu: ―Na'en, ¿a an ña̱? 23'Ba Jesús kitsingojore: ―Jngu xi ndekui tiba tsika'nyijinni niñuxtilare ko an, kui= xi singantsjana̱. 24Ngat'a 'ba= ku̱anre Ki'ndire Xuta xi'iun jotsa'en kua'indut'a enre Na'enchana ngat'are kui. Tunga, ¡nimaxuni xuta xi singantsja! Tusa ngisa nda kuánre tsa bi kitsin tsakaiñu. 25'Ba Judas xi singantsja, tsiningiyare: ―¿A an= ña̱, maestru? ―Ji xi je 'ba kisji ―kitsure Jesús. 26'Ba nga inyakjen, Jesús kiskjebe niñuxtilo 'ba kionga je kitsjare kjuanda Na'enchana, kitsijoya 'ba kitsjare xutare, 'ba kitsure: ―Chjubio 'ba chino, kui=bi xi yojona̱. 27'Ba kiskjebe=ni jngu chutsin 'ba kionga je kitsjare kjuanda Na'enchana, kitsjare xutare, 'ba kitsu: ―T'iu ngatsi'iu xi inya chutsinbi. 28Ngat'a kui=bi xi jinna̱, xi tse'e kjua xatse xi ti'bendakoni Na'enchana ko xutare. Kui xi tistenntjaire nkjin xuta, tuxi ku̱achat'anire jere. 29'Ba an xin_nuu̱ nga bi nde k'uiña̱ binu, ka'nda nga kjua'e nixtjin nga k'ui ngañaa̱ ko jun binu xatse ña batexuma Na'enna̱. 30'Ba kionga je kise jngu son xi tse'e Na'enchana, kiji tjengi tse'e ya Olivo. 31'Ba Jesús kitsure xutare: ―Kui nistjenbi ngatsi'u sichajañu kjuamakjainnu ngat'a tsa'an. Ngat'a 'bi=tsa'en kua'indut'a enre Na'enchana: “Sik'en=ña̱ xi tsikuenda chutsango, 'ba kui tuchuña= k'uetsumaba.” 32Tunga nga kjua'ayana̱ ngajinre mik'en, kjuititjun_nuu̱ nangi Galilea. 33'Ba Pedro kitsure: ―Nisi ngatsi'i sichaja kjuamakjainre ngat'ari, an niñajanni sichajaa̱. 34'Ba Jesús kitsingojore: ―'Ba fa xinkixira̱ nga ndekuini nistjenbi, kionga kje kji'ndajín chaxicho, ji je ján ndiya kisji nga bi xutana̱ kuáin. 35'Ba Pedro kitsu ngani: ―Bi xia̱n nga bi xutari kuán, nisi tjinnere nga kueyakora̱. 'Ba ngusun kitsu ngatsi'i xutare. 36'Ba Jesús echu ko xutare jngu nga'nde ña Getsemaní 'mi, 'ba kitsure: ―Tetsubo nga'e yejerañu tefikjakuaa̱ Na'enchana kio yo. 37'Ba kiko Pedro ko ngojó ki'ndire Zebedeo, 'ba 'etuts'inre nga 'ñu ba kis'ere 'ba kuafore. 38'Ba kitsure xutare: ―Kjuaba kitsejin inimana̱ joni tsa kui xi je sik'enna̱. Tetsubo nga'e 'ba tetsubachunkonu. 39'Ba 'batsa'en Jesús kiji ngubachire 'ba kio yejen tsindi nkjain 'nda t'anangiu, 'ba kitsu nga jako Na'enchana: ―Na'en, tsa ku̱an k'uejñat'axinnaa̱ kui kjuanimabi, t'ejñat'axinnaa̱. Tunga bi ngatjama xi an mejénna̱, tusa xi ji mejénri. 40'Ba jaskan Jesús jendiba ngani ña tjindu xutare, 'ba kjiyufe nga echu. 'Ba kitsure Pedro: ―¿A nijnguú chu̱ba̱ kichukjuanu nga tsiketsubachunkonu? 41Tetsubachun 'ba chuko Na'enchana, tuxi bi xut'ayakoninú. Inimanu je tijñanda, tunga yojonu inda ngisa. 42'Ba Jesús kiji ngani xi majóni ndiya, 'ba 'bitsa'en jako Na'enchana: ―Na'en, tsa bi ku̱an stukja'axinna̱ nga kjua'axtia̱ kjuanimabi, ngatjama jotsa'en ji mejénri. 43'Ba nga ja'e ngani ña tjindu xutare, nde kiyufe=ngani, ngat'a nijño inya'bechja tuxkun. 44'Ba kui kitsik'endu 'ba kikjako ngani Na'enchana xi majánni ndiya, 'ba ndekuini en kinchja ngani. 45'Ba 'batsa'en jendiba ngani ña tjindu xutare, 'ba kitsure: ―¿A tojo tetsjujñafe=ñu 'ba tenikja'aya=ñu? Je ja'e chu̱ba̱ nga Ki'ndire Xuta xi'iun ku̱angantsja ngaya ntsja xuta je. 46Tisetjion, tangian nde. Chutsijon, je ndiba tiña xi titsingantsjana̱. 47'Ba nde sa'e= tinchja=ni Jesús kionga ja'e Judas, jngu xutare xi tejó. 'Ba tjenko nkjin xuta xi ya'a kicha ko ya. Xi kitsikasen na'mi titjun ko nchja chingare naxinando. 48'Ba Judas inya'atitjun nchjabiu 'ba kitsure: ―Xi k'uendsu'aa̱ nga site'nda_ra̱, kui=biu 'ba ndubo. 49'Ba ta'a kitsitiñat'are Jesús 'ba kitsure: ―'Nda na'en, maestru. 'Ba 'endsu'a. 50'Ba Jesús kitsingojore: ―Amigu, tijngui xa xi ja'eni. 'Ba kio nchja xi yak'a kitsitiñat'are Jesús 'ba kitsuba. 51Tunga jngu xuta xi tjenko Jesús ts'axje kichare, 'ba tsatet'a ñojon chu'ndare na'mi titjun. 52'Ba Jesús kitsure: ―Ch'atjai kichari nga'ndere. Ngat'a ngatsi'i xi kicha kjanni, 'ba=nde kicha kueyani. 53¿A bi 'ye nga ku̱an skui'a_ra̱ Na'enna̱ nkjin mi ankje, 'ba kui sikasenfani nganda'e? 54Tunga tsa 'ba sa'aa̱n, ¿jótsa'en k'uetjusunni xi kua'indut'a enre Na'enchana? Ngat'a 'ba=tsa'en kua'indut'a nga tjinnere nga 'ba ku̱an. 55'Ba Jesús tsiningiyare nchjabiu: ―¿Ánñu ko kicha ko ya kich'añu nga ja'echja'anuu̱, joni tsa jngu chacheje kuán? Nyujun, nyujun tsakatejñajinntsjai_nuu̱ nga yakuya ndetsinre ningu, 'ba bi kjindubanuu̱. 56Tunga ngayéje kibi tjima, tuxi k'uetjusunni enre Na'enchana xi kitsi'indu nchja chinga profeta. 'Ba 'batsa'en tsanga ngatsi'i xutare Jesús 'ba kitsik'ejña tajngu. 57'Ba nchja xi kitsuba Jesús ndaba Caifás kiko xi na'mi titjun. Ña je kuañajan chjine tse'e kjuatexuma ko nchja chingare naxinando. 58'Ba Pedro kjin kitjenngi Jesús ka'nda nga echu ngandetsin ndaba na'mi titjun. Ja'as'en 'ba kio tsik'ejñajinre nchja xi kio tsikuenda, tuxi skueni mé= xi ku̱an. 59'Ba na'mi titjun ko ngatsi'i xutaxa tsangisjai jngu xuta xi kuinchja en ndesu ngat'are mé= xi kitsa'en Jesús, tuxi ku̱an si'annire kjua 'ba kjuinik'en. 60Tunga bi kuasjaire, ninga ja'e nkjin xuta xi kinchja en ndesu ngat'are kui. Tunga tuchan ja'e jó 61xi 'bi kitsu: ―Kui xutabi kitsu: “An ku̱an=na̱ sikixuyaa̱ ningure Na'enchana 'ba ján nixtjin skjenitjen ngañaa̱.” 62'Ba 'batsa'en na'mi titjun tsisetjen 'ba tsiningiyare Jesús: ―¿A tumé singuaje ngat'are mé= xi inyabanejeri? 63Tunga Jesús xiu tsik'ejña. 'Ba na'mi titjun kitsure: ―Ngat'are Na'enchana xi tijñakun te'benera̱ nga sji xi kjuakixi. 'Ba t'innii̱ tsa ji xi Cristo xi Ki'ndire Na'enchana. 64'Ba Jesús kitsure: ―Ji xi je 'ba kisji. 'Ba an xin_nuu̱ nga 'ndani nganda'e xiañu Ki'ndire Xuta xi'iun nga k'uejña ngate kixire Na'enchana xi tjinre kjua'ñu 'ba nga yufi kjuendejinni ngank'aa. 65'Ba kio na'mi titjun 'ejnda najñu xi yaja tuxi kji'yanire nga 'ñu ch'o kis'ere inimare, 'ba kitsu: ―¡Je ch'o kitsure Na'enchana xutabi! ¿Jótsa'en ku̱achjen ngisana xi skaninejere? Jun je kjinu'yo nga ch'o kitsu ngat'a tse'e Na'enchana nga 'ba kitsu. 66¿Jó mixun jun? 'Ba nchjabiu kitsingojo: ―Tjin=re je 'ba kjuabeya machjenre. 67'Ba 'batsa'en 'etiajun nkjain Jesús 'ba ye'ere, 'ba tjin xi tso'ojin nkjain. 68'Ba nga inyatsure: ―Ji xi Cristo, tsa profeta kuáin, 'ba t'inni̱ 'yá= xi ye'eri. 69'Ba yejerañu nga Pedro tijña ngandetsin ndaba na'mi titjun, kio kitsitiñat'are jngu chjun chu'ndare 'ba kitsure: ―Ko tsé ji tsutjakuai Jesús xi tse'e Galilea. 70Tunga Pedro 'e'mota'en yojore ngixkun ngatsi'i xi kio tjindu 'ba kitsu: ―Bi 'bia̱ mé= xi te'mi_ri. 71'Ba kiji ngani ña tijña xuntja ngandetsian, ña kja'e chjun chu'nda tsabe ngani 'ba ye'ere nijmi xi yak'a: ―Ko xutabiu tsak'ajmeko Jesús tse'e Nazaret. 72'Ba nde 'e'mota'en ngani yojore Pedro, ka'nda kitsik'axki= ngat'are Na'enchana nga kitsu: ―¡Bi 'bexkua̱n xutabiu! 73'Ba sangutjun, xuta xi kio tjindu kitsitiñat'are Pedro 'ba kitsure: ―Kjuakixi jngu=ni xi kui nchjabiu. Ngat'a jotsa'en nukjuai kui baku nga kui= ni. 74'Ba 'batsa'en Pedro 'etuts'inre nga ch'o kitsu nga kitsik'axki ngat'are Na'enchana 'ba kitsu: ―¡Bi 'bexkua̱n xuta xi te'mi_ru! 'Ba ndekuini chubabiu kiski'nda chaxicho. 75'Ba kio Pedro ja'etsjenre mé= xi Jesús kitsure: “Kionga kje kji'ndajín chaxicho, ji je ján ndiya kisji nga bi xutana̱ kuáin.” 'Ba kui 'etju nga'ndebiu, 'ba 'ñu kiski'nda.

will be added

X\