SAN MATEO 25

1'Ba kui nixtjinbiu nga kuatexuma Na'enchana nde 'ba= ku̱anni joni yanchjin xungu xi te xi kiskjebe ndi'ire xi machjenre aseti nga kikuyare xi'in xi kuixan. 2Ón xi chikun, 'ba ón xi nkjikakun. 3Xi chikun nga kiskjebe ndi'ire, bi tsaka'a ngisa aseti. 4Tunga xi nkjikakun, tsaka'a ngisa aseti nga kiskjebe ndi'ire, tuxi kuinya ngisanire ndi'ire. 5'Ba ngat'a xi xi'iun tji'bandayare, kui kjua ngatsi'i kuanijñanire 'ba tsakjayufe. 6'Ba jeru mején masen nistjen, tjin xi kiski'ndaya nga kitsu: “¡Je ndiba xi xi'iun! ¡T'etju nga xjubetjo!” 7'Ba 'batsa'en tsisetjen yanchjin xungubiu 'ba 'endunda ndi'ire. 8'Ba xi chikun kitsure xi nkjikakun: “Ta'echinii̱ asetinu, ngat'a je tji'bo ndi'ini̱.” 9Tunga xi nkjikakun kitsure: “Janjain, ngat'a tsa chjen, bi ku̱annini̱ ninga jun ngayeje. Tusa tanginkinda_ru yojonu ña sateña.” 10'Ba kionga xi chikun inyafikatse aseti, tukjia'a ja'e sani xi xi'iun. 'Ba xi tjindunda ja'as'enko ña tjima s'i tse'e kjuabixan, 'ba kis'echja xuntja ni'yo. 11'Ba jaskan ja'e yanchjin xungu xi ngi ón, 'ba kitsu: “¡Na'en, Na'en, chju'inii̱ xuntjo!” 12Tunga xi xi'iun kitsure: “Kjuakixi= xi xin_nuu̱ nga bi 'bexkun_nuu̱.” 13'Bamani tetsubachun tsu'ba, ngat'a bi 'yo mé= nixtjin 'ba mé= chuba nga kjua'e Ki'ndire Xuta xi'iun. 14'Ba 'ba nde ku̱an nga kuatexuma Na'enchana, jo=ni jngu xuta xi je mejen kuaje kja'e nangi, 'ba kinchjare chu'ndare 'ba kitsike'nda ton xi tjinre kui. 15Jngu xi kitsingantsja ón mi ton, 'ba jngu kitsingantsja jó mi, 'ba jngu kitsingantsja jngu mi. Kitsingantsja nga jngu jngu jotsa'en nga ku̱anre sa'exako tonre. 'Ba 'batsa'en kui kjin kiji. 16Chu'nda xi kjiningantsja ón mi ton kitsa'exako tonbiu 'ba ngijngu ka'a 'bakji'i kejensunre. 17'Ba xi jó mi kjiningantsja 'ba nde jó mi kitsa'ensun ngisa. 18Tunga xi jngu mi kjiningantsja kiskju'ngi nangiu 'ba 'eyanijin tonre naire. 19'Ba kionga je ja'a nkjin nixtjin, ja'e ngani naire chu'ndabiu 'ba kitsa'enko kuenda. 20Xi ón mi ton kjiningantsja kui tjun ja'e, 'ba ngi ón kitsjasun ngisare naire 'ba kitsure: “Na'en, ón mi ton kjinike'ndanaa̱, 'ba nga'e tijña ngi'ón xi kitsa'ensun ngisaa̱.” 21'Ba meni naire kitsure: “Nda tjin, jngu=ni chu'nda xi nda 'ba xi kixi fiko xare. Kixi= k'iku̱e xachi xi kitsjare, kui kjuañu nganda'e ngisa= tse sike'ndara̱. Tjas'en 'ba titsjai joni nairi.” 22'Ba 'ba nde jaskan ja'e xi kjiningantsja jó mi ton 'ba kitsu: “Na'en, jó mi ton kjinike'ndanaa̱, 'ba nga'e tijña ngijó xi kitsa'ensun ngisaa̱.” 23'Ba naire kitsure: “Nda tjin, jnguni chu'nda xi nda 'ba xi kixi fiko xare. Kixi= k'iku̱e xachi xi kitsjare, kui kjuañu nganda'e ngisa= tse sike'ndara̱. Tjas'en 'ba titsjai joni nairi.” 24Tunga 'ba nde ja'e xi jngu mi ton kjiningantsja 'ba kitsu: “Na'en, 'beña̱ nga jnguni xi 'ñu mejenre xuta, 'ba nga ji michja'e chan xi bi ji kik'entje 'ba 'bekui ña bi ji kichjujndi. 25Kui kjuañu kitsakjunña̱ 'ba kik'eyanijia̱n tonri ngajin nangiu. Tunga nga'e tijña xi tsiji.” 26'Ba naire kitsure: “Jngu= ni chu'nda ch'okun 'ba xi tse'é. Tsa 'ye nga fikja'aa̱ chan xi bi an 'bentjia̱ 'ba nga 'bekua̱ ña bi an kjejndia̱, 27tsa tusa k'ikori tonna̱ nchja xi tse'e banco. Meni kionga ja'aa̱, kixuntsjaa̱ tonna̱ 'ba ko ki'ndire tsakaiñu.” 28'Ba meni kitsure xutabiu nchja xi kio inya: “Chja'á_ru tonre xi jngu mi, 'ba ta'e_ru xi te mi mani tse'e. 29Ngat'a xi tjinre ngisa= tse kua'e ngisare 'ba ngisa tse s'e̱re. Tunga xi tsajainre, tusa stjukja'are ka'nda xi ichi tjinre. 30'Ba chu'ndabi xi tumé chjire, chanikjo'o ngandetsian ña jñu chun, ña ski'nda xuta 'ba ña kuajnga nde'ñu.” 31'Ba kionga Ki'ndire Xuta xi'iun kjua'e, kjua'e ko kjuajere ko ngatsi'i ankjelere 'ba kio k'uejñasun nga'nde ña kuakutsejen kjuajere. 32'Ba ngatsi'i xuta xi tjin ngasun'ndio ku̱añajan ngixkun kui, 'ba sikinyat'axinre xinkjin jotsa'en xi tsikuenda chutsanga nga tsikinyat'axinre natendsu. 33'Ba ngate kixire sikinya chutsango 'ba ngate skjunre sikinya natendsu. 34'Ba rey kuetsure xi inya ngate kixire: “Jabiu jun, xi je kitsichikunta'ennu Na'enchana. Ngataxuntsjo nga'nde ña kui batexuma, nga'nde xi kis'endanu 'ndani nga ngasun'ndio kitsa'en. 35Ngat'a nga kuabojona̱, kitsa'enuu̱ xi chine. Nga kuaxindana̱, kitsa'enuu̱ nanda. Nga tsu'basaa̱n nanginu, kichjubetjonuu̱ ni'yanu. 36'Ba nga tsajainna̱ najñu, kitsa'enuu̱ najñu xi tsakajaa̱. Nga tebeyaa̱, ja'eketsuba'ndanuu̱. 'Ba nga kis'eyaa̱ nduya, tsangichutsejennuu̱.” 37'Ba kio xuta kixi kuetsu: “Na'en, ¿kjia'áñu kji'yari̱ nga kuabojori 'ba kitsa'eri̱ xi chine, asa nga kuaxindari 'ba kitsa'eri̱ nanda? 38'Ba ¿kjia'áñu kji'yari̱ nga nangin tsutjasin 'ba kichjubetjori̱ ni'yani̱, asa nga tsajainri najñu 'ba kitsa'eri̱ najñu xi xeje? 39'Ba ¿kjia'áñu kji'yari̱ nga tebeye asa nga kis'eye nduya 'ba tsangichutsejenri̱?” 40'Ba rey singojore: “Kjuakixi= xi xin_nuu̱. Jotsa'en nda kjiniko tu'ya nts'ia̱ xi tjindu nga'e, an xi 'ba kjinikonuu̱.” 41'Ba 'batsa'en rey kuetsu nganire xi tjindu ngate skjunre: “Tinyat'axinnuu̱, xi 'bakore kjuach'o xi tsikasennu Na'enchana. Tangiun nga'nde ña bi 'boya ndi'i ña kis'endare chanayiu ko ankjelere. 42Ngat'a nga kuabojona̱, bi kitsa'enuu̱ xi chine. 'Ba nga kuaxindana̱, bi kitsa'enuu̱ nanda. 43Nga tsu'basaa̱n nanginu, bi kichjubetjonuu̱ ni'yanu. 'Ba nga tsajainna̱ najñu, bi kitsa'enuu̱ najñu xi kuajaa̱. 'Ba nga tebeyaa̱ 'ba nga kis'eyaa̱ nduya, bi tsangichutsejennuu̱.” 44'Ba 'batsa'en kui 'ba nde kuetsure: “Na'en, ¿kjia'áñu kji'yari̱ nga kuabojori, nga kuaxindari, nga tsutjasin nangini̱, nga tsajainri najñu, nga tebeye, asa nga kis'eye nduya, 'ba bi tsikisekori̱?” 45'Ba 'batsa'en rey singojo nganire: “Kjuakixi= xi xin_nuu̱. Jotsa'en bi nda kjiniko tu'yañu ngajinre xutabi, ninga aán 'ba kjinikonuu̱.” 46'Ba kui xutabiu kuaje ña kjua'antsjai kjuanima xuta, tunga xuta kixi sakure kjuabenichun xi bi fet'a.

will be added

X\