SAN MATEO 24

1Nga Jesús 'etju ningu, 'ba kionga je tifi, xutare kitsitiñat'are 'ba yakure xjore ningu. 2'Ba Jesús kitsure: ―¿A te'yañu ngayéje kibi? Ngu 'ba xinkixi_nuu̱ nga nijnguú ndiojo s'e̱jñasunre ngijngu ndiojo. Kuixuya yeje. 3'Ba kionga Jesús tijña tjenngi ya Olivo, xutare kitsitiñat'are tuxi skuiningiya t'axinnire 'ba kitsure: ―'Ba t'innii̱ kjia'añu nga 'ba ku̱an 'ba mé= chuba xi s'e̱ nga kjua'e=, 'ba nga kjue ngasun'ndio. 4'Ba Jesús kitsure: ―Chutsejen_ru yojonu nga tu'yá ngat'ejñunu. 5Ngat'a ne nkjin xi ya'a ja'enna̱ kjua'e 'ba kuetsu: “An= ña̱ xi Cristo”, 'ba ne nkjin xuta k'uejñure. 6'Ba kjuinu'yañu en nga i nga jaan tjin kjuachan 'ba nga xuta kue'e nijmi ngat'are kjuachan xi tjima, tunga bi kun. Ngu tjinne=re nga 'ba ku̱an, tunga kje kjuejin ngasun'ndio ya'a. 7Ngat'a naxinanda skjanko kja'e naxinanda, 'ba chikun skjanko kja'e chikun. 'Ba tuchuña= nga'nde s'e̱ kjindia ko chon. 8Tunga ngayéje kibi tu kui= xi sa'e 'betuts'inre kjuanima xi s'e̱. 9'Ba ku̱angantsjañu tuxi si'onninu 'ba sik'ennu, 'ba tu kjuanna̱= nini nga ngatsi'i xuta ngasun'ndio ku̱astikenu. 10'Ba kui nixtjinbiu ne nkjin xi sichaja kjuamakjainre, 'ba singantsja 'ba ku̱astike xinkjin ngayeje. 11'Ba nde s'e̱ nkjin profeta ndesu xi k'uejñure nkjin xuta. 12'Ba nkjin xuta bi nde simejénni xinkjin, ngat'a ngisa= 'ñu s'e xi kjuach'o. 13Tunga xi xukjuakore ka'nda nga̱ kjuet'a, kui= xi k'uangi. 14'Ba en ndare Na'enchana kjua'axtiuya ngayéje ngasun'ndio, meni ngatsi'i naxinanda xi tjin skueni nga Na'enchana xi batexuma, 'ba kio kjue ngasun'ndio ya'a. 15'Bamani kionga xio nga sasen nga'nde tsjere Na'enchana tsajmi xi ch'otjin 'ba xi sikjekjua jo kitsu xuta chinga profeta Daniel (xi ti'bexkiya enbi, ngatamankjinre), 16ngu kui nixtjinbiu, ngatsi'i xi tjindu nangi Judea ngatanga ña tjin nindu. 17'Ba xi tjindu ngatsja ndaba, bi ngat'etukajen tuxi kjua'ek'axjeni tsajmire. 18'Ba xi ngijña titsa'exa, bi nde ngatjendibani ndaba tuxi kjua'ekja'ani najñure. 19'Ba ¡nimaxuni yanchjin xi titsuya'more ki'ndi asa xi tjinre ki'ndi xi sa'e baki kui nixtjinbiu! 20Chja'a_ru Na'enchana jun nga bi nixtjinre nch'an ninga bi nixtjin nga nikja'aya nga 'ba ngatjama. 21Ngat'a 'ñu tsé kjuanima s'e̱ kui nixtjinbiu joni xi kje nisa jngu ndiyajín s'e ka'nda nga Na'enchana kitsinda ngasun'ndio ka'nda nganda'e, 'ba xi niñaja nde s'e̱ni. 22'Ba tsa Na'enchana bi sichuba kui nixtjinbiu, tu'yá k'uangi. Tunga je kitsichuba tu kjunda tse'e xuta xi je kiskja'ajin. 23'Ba tsa tjin xi kuetsunu kui nixtjinbiu: “Chutsijon, nga'e tijña Cristo”, asa kuetsunu: “Ngajaan tijña”, bi ngatamakjainnu. 24Ngat'a nkjin= kjua'e xi cristo 'ba xi profeta kuetsure yojore tunga bi kui ni. 'Ba sa'en nkjin kuya chu̱ba̱ ko kjuakun tuxi k'uejñunire xuta, 'ba ka'nda xuta xi Na'enchana je ja'ajin tsa ku̱an. 25Jun je 'ba texintitjun_nuu̱ mé= xi ku̱an. 26Ngu, tsa 'bi k'uinu: “Ngajaan tijña Cristo nga'nde t'axin”, bi mangiun. 'Ba tsa k'uinu: “Nga'e tijña ngaya ni'yo”, bi ngatamakjainnu. 27Ngat'a jo ma nga ba'na 'nda ngituts'ian 'ba matsejen ka'nda ña ntjai tsu'biu, 'ba= ku̱an nga kjua'e Ki'ndire Xuta xi'iun. 28Ña kjijña mik'en, kio= mañajan tjiunike. 29Tunga ta'a kionga je kjua'a nixtjin tse'e kjuanima, tsu'biu s'e̱jñu, 'ba so bi nde sjani ndi'ire, 'ba niñu kuixungi ngank'aa, 'ba nga'ñu xi tjin ngank'aa kjuatse. 30'Ba meni ku̱atsejen ngank'aa mé= xi kuakutsejen nga je tjindiba Ki'ndire Xuta xi'iun, 'ba kio= ski'ndayakun ngatsi'i xuta xi tjin ngasun'ndio, 'ba skue Ki'ndire Xuta xi'iun nga tjindibajin yufi ko 'ñu tsé kjua'ñu ko kjuaje. 31'Ba sikasen ankjelere kionga 'ñu kjuane tjio, tuxi sikinyakuni xuta xi je kiskja'ajin xi tjindu nitu ñañu, ka'nda nga'nyukjinre ngasun'ndebi 'ba ka'nda nga'nyukjinre ngank'aa. 32Ngatjamanu kjuakusun ngat'a tse'e ya higo. Kionga je 'betju nganire nts'en tjiare yo 'ba kja'e xka 'betju nganire, je 'yo nga nixtjinre chundaba matiña. 33'Ba nde 'ba tsa'enni kionga je xio nga 'ba tjima, ngatja'yo nga Ki'ndire Xuta xi'iun je sejñaxtiu xuntja ni'ya. 34'Ba xinkixi_nuu̱ nga 'ba= ku̱an ngayéje xi texia̱n kionga kje fesunjín xuta xi tjin nganda'e. 35Ngank'aa 'ba ko t'anangiu kjuet'a, tunga enna̱ bi kjuet'a. 36Tunga mé= nixtjin 'ba mé= chuba nga 'ba ku̱an, tu'yá be, ninga ankjele xi tjindu ngank'aa 'ba ninga Ki'ndire Na'enchana. Tu Na'enchana sani xi be. 37Jó kuán nixtjin nga tsik'ejña Noé, 'ba= ku̱an nga kjua'e ngani Ki'ndire Xuta xi'iun. 38Ngat'a kui nixtjinbiu, kionga kje ba'ajín tsi'ñu xi kitsikjesun xuta, tu inyakjen 'ba inya'bi 'ba inyabixan 'ba inyatsikixan ki'ndire xuta, ka'nda nga Noé ja'as'en barku. 39Bi tsabe xuta mé= xi ku̱an ka'nda nga tsa'a tsi'ñu 'ba kio kitsikje ngatsi'i. 'Ba 'ba=nde ku̱an kionga kjua'e Ki'ndire Xuta xi'iun. 40'Ba kui nixtjinbiu jó xuta xi inyatsa'exa ngijña, jngu stjube 'ba jngu s'e̱jña. 41'Ba jó yanchjin xi tu jngu natsi inya'bo, jngu stjube 'ba jngu s'e̱jña. 42Tetsubachun tsu'ba, ngat'a bi 'yo kjia'añu kjua'e Na'ennu. 43Ngatja'yo kibi: Tsa jngu xuta be jófa chun nga jñu kjua'e chacheje ndaba, k'uejñakun 'ba bi sja'nde tsa chacheje kuakjangi ndaba. 44'Ba kui kjuañu, tetsubando jun ngayeje, ngat'a Ki'ndire Xuta xi'iun kjua'e kionga jun bi techuya_ru. 45¿'Yá= chu'nda xi kixi fiko xare 'ba xi nkjikakun, kui= xi naire kitsike'nda nga kui xi sjare xichine chu'nda xi yak'a nga chubare fa? 46¡Ndaxure chu'nda xi 'ba titsa'en kionga kjua'e xi naire! 47'Ba xinkixi_nuu̱ nga naire sik'enda ngayéje xi tjinre. 48Tunga tsa chu'nda ch'okun, 'ba tsikja'etsjen nga naire k'uandaya ngisare nga kjua'e, 49'ba sa'e kuajare chu'nda xi yak'a, 'ba skine 'ba k'uiko xuta ch'i; 50'ba nixtjin nga bi skuyare 'ba chu̱ba̱ xi bi be, kjua'e naire chu'ndabiu. 51'Ba naire 'ñu sikja'a kjuanima 'ba ngusun siko joni xuta jó nkjain. 'Ba kio ski'nda 'ba kuajnga nde'ñu.

will be added

X\