SAN MATEO 22

1'Ba 'batsa'en kinchja ngani Jesús nga 'ejñare kjuakusun xuta, 'ba kitsure: 2―Ña batexuma Na'enchana nde 'ba=nire joni jngu rey xi ts'axje jngu s'i kionga tsixan ki'ndire. 3'Ba 'batsa'en kitsikasen chu'ndare nga kuekinchjare xuta xi kitsikjint'e. Tunga xutabiu bi kuakjainre jendiba. 4'Ba nde kja'e chu'ndare kitsikasen ngani, 'ba kitsure: “'Ba t'in_ru xuta xi je kitsikjint'ia̱, nga je tijñandana̱ xi chine 'ba nga je kafesun tjiundija ya'ena̱ 'ba ko ki'ndi ndijana̱ xi je nda kun. Je tijñanda yeje. 'Ba t'in_ru nga ngatjendiba s'iu.” 5Tunga xi kjinikjint'e bi kuenda kitsa'en. Jngu xi tu ngijña= kiji, 'ba xi ngijngu tu tsajmi= kikatseya, 6'ba tjin xi tu chu'ndare rey kitsuba 'ba kitsi'onre 'ba kitsik'en. 7Kionga kjint'e rey mé xi kuán, 'ñu kuastire 'ba 'exare chasoldadure nga kitsik'en xuta xi 'ba kitsa'en 'ba yaka naxinandare. 8'Ba 'batsa'en kitsure rey chu'ndare: “Je tijñanda s'i tse'e kjuabixan, tunga xi kitsikjint'ia̱ bi 'bakore nga kjua'e. 9'Bamani tsu'ba, tangiun ña bakjanki ndiyo 'ba tu'ya xi skajiun 'ba t'in_ru ngatjendiba s'iu.” 10'Ba 'batsa'en kiji chu'ndabiu ña bakjanki ndiyo. 'Ba kikotsi'i xi kisatejin, xi nda ninga xi bi nda. 'Ba 'batsa'en kitsitse xuta nga'nde ña tji'betju s'i kjuabixon. 11'Ba kionga ja'as'en rey tuxi skueni xuta xi kjinikjint'e, kio tsabe jngu xuta xi bi yaja najñu tse'e kjuabixan. 12'Ba kitsure: “Ji na'en, ¿jó tsa'en tsitjas'enni nga'e tsa bi kicheje najñu tse'e kjuabixan?” Tunga kui tu xiu= tsik'ejña. 13'Ba 'batsa'en rey kitsure nchja xi inyabatesin yamixo: “T'e'ñu ndsaku ko ntsja xutabiu 'ba chanikjo'o ngandetsian ña jñu chun, nga'nde ña ski'nda xuta 'ba ña kuajnga nde'ñu.” 14Ngat'a nkjin= mani xi nikjint'e, tunga tu chuba mani xi tukja'ajin. 15'Ba 'batsa'en xuta fariseo kik'endako xinkjin, tuxi sa'enni nga kuinchja Jesús jngu en xi ku̱an kuangi. 16'Ba kitsikasen xuta xi tse'e nchjabiu ko yak'a xutare Herodes xi 'bi ja'etsure: ―Maestru, 'ya=ni nga kjuakixi= xi sji 'ba nga ko kjuakixi bakuye ndiyare Na'enchana 'ba nga bi kuenda ñe'en mé= xi tsu xuta, ngat'a bi tu isenre xuta 'mini_ri. 17Kui kjua 'ba t'inni̱, ¿jó sji? ¿A tixa'nde nga k'uechjintjai_ra xuta ngaku romano asa bi tixa'nde? 18Tunga Jesús je be mé= kjuafa'etsjen ch'o xi ya'a nchjabiu, 'ba kitsure: ―Xuta jó nkjain, ¿ánñu an techut'ayakoninu? 19Takunu jngu ton xi machjintjaini tsajmi. 'Ba 'batsa'en ja'ekore nchjabiu jngu ton denario. 20'Ba Jesús tsiningiyare: ―¿'Yá= tse'e isen xi kjit'a nga'e 'ba 'yá= tse'e ja'en xi kua'indut'a? 21'Ba nchjabiu kitsure: ―Tse'e xuta ngaku romano. 'Ba 'batsa'en Jesús kitsure: ―Ngu, ta'e_ru xuta ngaku romano xi kui tse'e, 'ba ta'e_ru Na'enchana xi tse'e kui. 22'Ba kionga nchjabiu kjint'e kibi, tu kuakunre 'ba kiji. 23'Ba ndekuini nixtjinbiu, yak'a xuta saduceo ja'ekun Jesús. Kui= nchjabiu tsu nga mik'en bi nde fa'ayanire. 'Ba 'bitsa'en tsiningiyare: 24―Ji na'en, Moisés 'bi kitsu nixtjin kuatse jan: “Tsa tjin xi kueya 'ba bi s'e̱kore ki'ndi chjunre, nts'e= tjinnere nga k'uejñako ngani chjun k'anbiu, tuxi sjanire ki'ndi nts'e xi k'ion.” 25Ngu kis'e nga'e ngajinni̱ yatu nchja xi nts'e mani. Xi titjun tsixan 'ba k'en. Ngat'a bi kis'ere ki'ndi, chjun k'anre tsik'ejñako ngani nts'e. 26Tunga nde k'en ngani nts'e xi majóni, xi majánni ngayeje, ka'nda xi mayatuni. 27'Ba jaskan k'en chjunbiu ngayeje. 28Ngu, nixtjin nga kjua'aya nganire xuta ngajinre mik'en, ¿ñáre nga yatu nchjabiu ku̱an xi'inre chjunbiu? Ngat'a ngatsi'i tsik'enduko. 29'Ba Jesús kitsingojore: ―Tjijñunu, ngat'a bi 'yo mé= xi kua'indut'a enre Na'enchana ninga kjua'ñure kui. 30Ngat'a kionga kjua'aya nganire xuta ngajinre mik'en, bi nde kuixanni ninga bi nde sikixanni ki'ndire ngayeje. Ngu joni ankjele xi tjindu ngank'aa ku̱an. 31Tunga ngat'are nga kjua'aya nganire xuta ngajinre mik'en, ¿a kje 'bexkiyajíun mé= xi tsu enre Na'enchana? Nga kitsu: 32“An= ña̱ Na'enre Abraham, Na'enre Isaac 'ba Na'enre Jacob.” 'Ba Na'enchana bi Na'enre mik'en kuán, tu tse'e sani xi tjindukun. 33'Ba kionga xutankjiun kjint'e kibi, tu kuakunre jotsa'en yakuya Jesús. 34'Ba 'batsa'en kuañajanko xinkjin xuta fariseo nga kjint'e nga tu xiu= kitsik'endu nchja saduceo Jesús. 35'Ba jngu xi ndekuini nchjabiu, xi 'ñu be kjuatexuma, tsiningiyare Jesús tuxi skut'ayakoni, 'ba 'bitsa'en tsiningiyare: 36―Maestru, ¿ñáre kjuatexuma xi ngisa tjun tijña ngajinre ngayéje kjuatexuma? 37'Ba Jesús kitsingojore: ―“Timején Na'enchana xi Na'enri ko ngayéje inimari, ko ngayéje yojori, 'ba ko ngayéje kjuafa'etsjenri.” 38Kui= kjuatexumabi xi ngisa tjun tijña. 39'Ba xi majóni nde 'ba=tsa'en tjun tijñani, xi tsu: “Timején xingi jotsa'en nimején yojori.” 40Ngojó kjuatexumabi, kio= ndibanire ngayéje xi tsu kjuatexumo ko xi kitsi'indu nchja chinga profeta. 41'Ba kionga nchja fariseo inya ngisa, 42Jesús tsiningiyare: ―¿Jó mixun jun ngat'are Cristo? ¿'Yá= ntje ndibanire? 'Ba nchjabiu kitsingojo: ―Ntjere David. 43'Ba 'batsa'en Jesús kitsure: ―Ngu, ¿ánñu David kitsuni nga Cristo xi Na'enre mani, nga kitsikinchja Isennixtjintsjere Na'enchana? Ngat'a David kitsu: 44Na'enchana kitsure Na'enna̱: “Teni ngate kixina̱, ka'nda nga xi bi nda ya'ari ngi ndsakui sik'endaa̱.” 45Ngu, ¿jótsa'en ntjere David kjuendibani Cristo nga ndekui David Na'enna̱ tsure? 46'Ba ni'yá kuán kitsingojore Jesús. 'Ba tsaka'anire kui nixtjinbiu ni'yá nde kuánni kakun nga tsiningiya ngisare Jesús.

will be added

X\