SAN MATEO 21

1'Ba kionga je inyatsitiñat'are naxinanda Jerusalén 'ba echu Betfagé, nga'nde xi tjindut'are tjenngi ya Olivo, 'ba kio Jesús kitsikasen jó xutare, 2'ba kitsure: ―Tangiun naxinanda chi xi tijña nguba kio. Kio xio jngu naburra xi kjit'a'ñu ko ki'ndi burrure. Chjundo 'ba ndekonu nga'e. 3'Ba tsa 'yá= xi jo kuetsunu, 'bi t'in_ru: “Na'ennaxu sichjen, 'ba ta'a sja ngani.” 4'Ba kuán tuxi 'etjusunni enre Na'enchana ña xuta profeta 'bi kitsu: 5'Ba t'in_ru naxinanda Sión: “Chutsijon, je ndibakunnu Reynu, xi inda kjiya inimare 'ba tijñakjare jngu chaburru, jngu ki'ndi burru, ki'ndire tjiunaxin xi ba'anijin ch'a.” 6'Ba 'batsa'en ngojó xutare kiji 'ba kitsa'en mé= xi kitsure Jesús. 7'Ba 'batsa'en ja'eko naburra ko ki'ndi burrure, 'ba yanere najñure 'ba tsik'ejñakjare Jesús. 8'Ba nkjin xuta inyabayujuya ndiyo najñure, 'ba tjin xi tsate tjiare ya 'ba yayuju ngaya ndiyo. 9'Ba ngatsi'i xuta xi tjen titjun ko xi tjenngi, kiski'ndaya: ―¡Ngatjas'ere kjuaje ntjere David! ¡Ngatatsichikunta'en Na'enchana xi ndibani ngat'are ja'enre! ¡Ngatjas'e kjuaje ngank'aa! 10'Ba kionga Jesús ja'as'en naxinanda Jerusalén, kuakunre ngatsi'i naxinando, 'ba kitsu: ―¿'Yá= tsé kibi? 11'Ba xutankjin xi tjenko Jesús kitsu: ―Xuta chinga profeta Jesús, xuta xi tse'e Nazaret. 12'Ba Jesús ja'as'en ndetsinre ningu 'ba ts'axje ngatsi'i xi kio inyabateña ko xi inyabatse, 'ba tso'otsakjan yamixare nchja xi inyatsik'antjaiya ton ko yaxilere xi inyabateña paloma. 13'Ba kitsure: ―'Bitsa'en kua'indut'a enre Na'enchana: “Ni'yana̱, kui= xi ku̱an ni'ya ña xuta ma fakona̱.” Tunga jun, ngijore chacheje kjiño'on. 14'Ba kitsitiñat'are Jesús ndetsinre ningu xuta ka ko xi bi ma fi, 'ba kui kitsinda. 15Tunga xi ngakure na'miu ko nchja chjine kjuatexuma kuastire nga tsabe kjuakun xi kitsa'en Jesús 'ba nga kjint'e jndare nisti ki'ndi xi inyakji'ndaya ndetsinre ningu nga inyatsu: “¡Ngatjas'ere kjuaje ntjere David!” 16'Ba nchjabiu kitsure Jesús: ―¿A tenu'ya=ni mé= xi inyatsuri nisti ki'ndiu? 'Ba Jesús kitsingojore: ―Jun, tent'eña̱. 'Ba ¿a kje 'bexkiyajíun enre Na'enchana ña kua'indut'a kibi? 'Bi tsa'en kua'indut'a: Son xi 'betju ts'a nisti ki'ndi ko ki'ndixu, kui son xi 'endare Na'enchana tuxi sichjinire. 17'Ba 'batsa'en Jesús tsakasent'axinre 'ba 'etjujin naxinando 'ba kiji Betania ña ja'are nistjen. 18'Ba nga tajñu kionga Jesús tifi ngani ngajin naxinando, kuabojore. 19'Ba nga tsabe jngu ya higuera xi sejña ndai ndiyo, kiji ña sejña, tumé tu kuasjai'are, tu suba xka= yajare. 'Ba 'batsa'en kitsure ya higuerabiu: ―¡Niñajan nde ngatjas'eniri tu! 'Ba ta'a kixi yabiu. 20'Ba kionga xutare tsabe mé xi kuán, tu kuakunre, 'ba tsiningiyare Jesús: ―¿Jó kuánnire nga ta'a kixi ya higuerabiu? 21'Ba Jesús kitsingojore: ―Kjuakixi= xi xin_nuu̱. Tsa makjainnu 'ba bi jó ján kjuo kakún, bi tu kibi xi kitsikuaa̱ ya higuera ku̱annu si'aa̱n, ka'nda kui nindubi ku̱an k'uin_ru: “Texin kio 'ba chanikja'ajin yojori ndachikun”, 'ba 'ba= ku̱an ya'a. 22Tsa makjainnu, sakunu tumeñu xi xja'a_ru Na'enchana kionga xuko. 23'Ba Jesús ja'as'en ngani ndetsinre ningu, 'ba kionga tibakuya kio, kitsitiñat'are xi ngakure na'miu ko nchja chingare naxinando, 'ba kitsure: ―¿Mé= kjua'ñu xi tjinri nga ma 'ba teñe'en? 'Ba ¿'yá= xi kitsjari kjua'ñubiu? 24'Ba Jesús kitsingojore: ―'Ba nde an skuiningiya_nuu̱ jngu tsajmi, 'ba tsa singojonu, 'ba nde an xin_nuu̱ 'yá xi kitsjana̱ kjua'ñu nga 'bi tsa'aa̱n. 25¿'Yá= xi kitsikasen Juan Bautista nga ja'ekatenda xuta? ¿A Na'enchana, asa xuta ngasun'nde? 'Ba 'batsa'en joyare nchjabiu kibiu, 'ba kitsure xinkjin: ―Tsa kuixan nga Na'enchana kitsikasen, ngu kui kuetsu=na: “¿'Ba ánñu bi kuakjainninu xi kitsu Juan?” 26'Ba tsa kuixan nga xuta kitsikasen, ngu kjuendene tsi'ina naxinando, ngat'a ngatsi'i tsu= nga Juan jngu profeta. 27'Ba 'bitsa'en kitsingojore Jesús: ―Bi 'yee̱. 'Ba nde Jesús kitsingojore: ―Ninga an bi 'ba xin_nuu̱ 'yá= xi kitsjana̱ kjua'ñu nga 'bi tsa'aa̱n. 28'Ba Jesús tsiningiya ngisare: ―¿Jó mixun jun ngat'are kibi? Jngu xuta kis'ere jó ki'ndi xi'in. 'Ba kitsitiñat'are xi titjun, 'ba kitsure: “Na'enna̱, t'iña'axai ña tjintjena uva nganda'e.” 29'Ba ki'ndire kitsingojore: “Bi mejénna̱ kjuia̱.” Tunga jaskan kitsik'antjaiya kjuafa'etsjenre 'ba kiji. 30'Ba kitsitiñat'a nganire ki'ndire xi ngijngu 'ba nde 'ba= kitsu nganire jo kitsure xi titjun. Tunga kui kitsu: “Jo'o na'en, sa'e kjuia̱.” Tunga bi kijini. 31'Bamani, ¿ñáre ngojó kitsa'en xi mejénre na'enre? 'Ba nchjabiu kitsu: ―Xi tjun. 'Ba Jesús kitsure: ―Kjuakixi= xi xin_nuu̱ nga nchja xi kjebechjintjai tsajmi ngat'are Roma ko yanchjin ska, kui tjun kjua'as'en ña batexuma Na'enchana nga ko mare jun. 32Ngat'a Juan Bautista ja'ekakuyanu mé= xi kixi tjin, 'ba jun bi kuakjainnu. Tunga nchja xi kjebechjintjai tsajmi ko yanchjin sko, tusa kui kuakjainre. 'Ba jun, ninga kji'yo ngayéje kibiu, bi kjinik'antjaiyo kjuafa'etsjennu 'ba kuakjainnu. 33'Ba Jesús kitsu: ―Tasen ñojon ngijngu kjuakusun: Jngu xuta nyina 'entje uva, 'ba 'ench'are, 'ba kiskju'ngi jngu nga'nde ña sits'iungi uva, 'ba kiskjenitjen jngu torre, tuxi ku̱an sikuenda yejeni nga'ndebiu. 'Ba sa'e kitsikeyare nga'ndio nchja xi mare tsa'exako uva 'ba kui kjin kiji. 34'Ba kionga je echu chanre, xutabiu kitsikasen chu'ndare, tuxi skui'anire nchja xi tsa'exako uvare chan xi 'bakore. 35Tunga nchjabiu kitsuba nchja chu'ndare xutabiu. Jngu xi ye'ere, 'ba jngu kitsik'en, 'ba jngu ye'ere ndiojo. 36'Ba ngisa nkjin chu'ndare xutabiu kitsikasen ngani nga ko mare nga tuts'inre, tunga nde 'ba= kitsiko ngani nchjabiu. 37Ngu xi kuánñu kitsikasen ki'ndire xutabiu, 'ba 'bitsa'en kitsikja'etsjen: “Skuekun nchjabiu ki'ndina̱.” 38Tunga kionga nchjabiu tsabe nga titsitiñat'are ki'ndire xutabiu, 'bi kitsure xinkjin: “Kui=bi xi xuntsja yeje xi tjinre na'enre. Tusa sik'ian, tuxi tsajan ku̱anni xi xuntsja.” 39'Ba 'batsa'en kitsuba nchjabiu ki'ndire xutabiu 'ba kikot'axin nga'nde ña tintje uva 'ba kitsik'en. 40'Ba mani, kionga kjua'e xi naire ña tjintje uva, ¿mé= xi siko xuta xi tsa'exako uva? ―kitsu Jesús. 41'Ba kui kitsingojore: ―Bi kjua'animare nga sik'en nchja ch'okunbiu. 'Ba kja'e xuta sikeya nganire nga'nde ña tintjere uva, xi sjare chan xi 'bakore kionga kjuechu chanre. 42'Ba Jesús kitsure: ―¿A kje 'bexkiyajíun enbi xi kua'indut'a enre Na'enchana? Ngu 'bi tsu: Ndiojo xi nchja chjinexjo ts'axjengi, kui= xi je kuán ndiojo titjun. Na'enchana xi 'ba kitsa'en, 'ba tu makun=na nga 'yaña. 43Kui= kjuañu 'ba texinni_nuu̱. Xja'anu ña batexuma Na'enchana, 'ba kua'e=re nga'ndebiu xuta xi kja'ere xi sja tu. 44'Ba ngat'are ndiojo xi nchja enre Na'enchana, tsa tjin xi skasun ndiojobiu, niki ku̱axkua. 'Ba xi kuejenere ndiojobiu, niki ku̱axi ―kitsu Jesús. 45'Ba kionga xi ngakure na'miu ko xuta fariseo kjint'e kjuakusun xi kitsu Jesús, kuankjinre nga ngat'are kui tinchja. 46'Ba kuamejénre kitsuba tsakaiñu, tunga kitsakjunke xutankjiun, ngat'a xutankjiun tsu nga Jesús jngu profeta.

will be added

X\