SAN MATEO 2

1Jesús kitsin Belén, naxinanda chi xi tijña ngajinre nangi Judea, nixtjin nga rey Herodes tjinre xa. 'Ba kui nixtjinbiu ja'e naxinanda Jerusalén nchja chjine xi kut'aya ngat'are niñu xi jendibani ngituts'ian. 2'Ba tsiningiya: ―¿Ñá=ñu tijña reyre xuta judío xi je kitsin? Ngat'a ka'nda nangini̱ ña tju tsu'biu, kji'yee̱ niñure 'ba kjua'enichji_ri̱ ki'ndiu. 3'Ba kionga rey Herodes kjint'e kibi, 'ñu kuafore ko ngatsi'i xuta naxinanda Jerusalén ngayeje. 4'Ba 'batsa'en rey Herodes kinchjare ngatsi'i xi ngakure na'mi ko nchja chjine tse'e kjuatexumo, 'ba tsiningiyare ñá tsin Cristo. 5'Ba nchjabiu kitsure: ―Ngajin Belén, naxinanda chi xi tijña ngajinre nangi Judea. Ngat'a xuta chinga profeta 'ba=tsa'en kitsi'indu enre Na'enchana: 6'Ba ji Belén, naxinanda chi xi tijña ngajinre nangire xuta Judá, bi ichi tetsju ngisai ngajinre naxinanda ya'e xi tse'e xutaxare xuta Judá. Ngat'a ngajinri k'uetjujin jngu xutaxa, xi sikuenda xutana̱ xi tse'e Israel. 7'Ba 'batsa'en Herodes kinchjat'axinre nchja chjinebiu 'ba tsiningiyare mé fa nixtjin kuatsejen niñu. 8'Ba kionga je jako, kitsikasen Belén 'ba kitsure: ―Tangiun 'ba nda tinyisjo ki'ndiu. 'Ba kionga je ku̱asjainu, ndek'enu nijmi, tuxi ko an kuitsichjini_ra̱. 9'Ba kionga nchja chjinebiu je yasen ñojon en xi kitsure rey Herodes, kitsa'en ngani ndiya. 'Ba niñu xi tsabe nangire ña tju tsu'biu, xi janda tjentitjunre ka'nda nga tsakasen'ñu kixire ña kjijña ki'ndiu. 10'Ba kionga nchjabiu tsabe kui niñubiu, 'ñu kuatsjare. 11'Ba 'batsa'en ja'as'en ni'yo 'ba tsabe ki'ndiu ko María xi nare mani. Tsikinyakunch'int'are ki'ndiu nga kitsichjire, 'ba kiskjex'a kaxare nga kitsjare kjuatjo ki'ndiu. Kitsjare oro ko tjingusja xi 'ñu chjire 'ba ko ngijngu tsajmi xi nda jen xi mirra 'mi. 12'Ba ngat'a ngaya nijñare je kik'inyatitjunre nga bi nde kjua'ani ña tijña Herodes, kui kjua kja'e ndiya kiskjebeni nchja chjinebiu nga kiji ngani nangire. 13'Ba kionga je kiji nchja chjinebiu, jngu ankjere Na'enchana kuatsejenre Kuse ngaya nijñare 'ba kitsure: ―Tisetjen 'ba chjube ki'ndiu ko nare 'ba tiyukue nangi Egipto. 'Ba kio teni ka'nda nga an xin nganira̱ nga kjuendibai, ngat'a Herodes kuangisjai ki'ndiu, tuxi sik'enni. 14'Ba 'batsa'en Kuse tsisetjen, kiskjebe ki'ndiu ko nare, 'ba ngajñu 'etjuko nga kiji nangi Egipto. 15'Ba kio tsik'ejña ka'nda nga k'en Herodes. 'Ba kuán tuxi k'uetjusunni enre Na'enchana xi kitsu nga kitsikinchja xuta chinga profeta: “Nangi Egipto kinchjani_ra̱ Ki'ndina̱.” 16Kionga Herodes tsabe nga nchja chjinebiu 'ejñure, 'ñu kuastire 'ba kitsja kjua'ñu nga kjuinik'en ngatsi'i ki'ndi xi'in xi tjin Belén ko xi tjin ngandai naxinando. Kitsik'en ngatsi'i xi tjinre ka'nda jó nu, ngat'a 'exki nixtjin xi kitsu nchja chjinebiu nga tsabe niñu. 17'Ba 'ba=tsa'en 'etjusunni enre Na'enchana xi kitsi'indu xuta chinga profeta Jeremías nga kitsu: 18Kjinu'yare nangi Ramá jndare jngu chjun, xi tikji'ndaya 'ba 'ñu titsine. Raquel= xi tikji'ndat'a ki'ndi nistire, 'ba bi nde mejénnire nga kjuinije kakun, ngat'a je jesun ki'ndi nistire. 19'Ba kionga je k'en Herodes, jngu ankjere Na'enchana kuatsejenre Kuse ngaya nijñare nangi Egipto 'ba kitsure: 20―Tisetjen, chjube ki'ndiu ko nare 'ba t'inko ngani nangire xuta Israel, ngat'a je jesun nchja xi mejénre sik'en ki'ndiu. 21'Ba 'batsa'en Kuse tsisetjen, kiskjebe ki'ndiu ko nare, 'ba jendiba ngani nangire xuta Israel. 22Tunga kionga Kuse kjint'e en nga Arquelao tibatexuma nangi Judea nga'ndere Herodes xi na'enre mani, kitsakjun nga kuaje kio. Tunga kitsa'e chini titjúnre nga kik'inyare nga kuaje nangi Galilea. 23'Ba 'batsa'en kik'ejña naxinanda xi Nazaret 'mi. 'Ba kuán tuxi k'uetjusunni enre Na'enchana xi kinchja nchja chinga profeta, nga Jesús xi k'uin xuta tse'e Nazaret.

will be added

X\