SAN MATEO 19

1Kionga je 'ba kitsu Jesús, 'etju nangi Galilea 'ba kiji nga'nde xi tjin nangi Judea, 'ba echu xingunda ndaje Jordán. 2'Ba 'ñu nkjin xuta kitjenngi, 'ba kio kitsinda xi inyafesun. 3'Ba yak'a xuta fariseo kitsitiñat'are Jesús, 'ba tsiningiyare tuxi skut'ayakoni, 'ba kitsure: ―¿A ma jngu xuta tsik'ejña chjunre tume kjuañu? 4'Ba Jesús kitsure: ―¿A kje 'bexkiyajíun enre Na'enchana ña kua'indut'a jotsa'en Na'enchana kitsinda xuta ka'nda nga tuts'inre? 'Bi tsa'en kua'indut'a: “Xi'in ko chjun kitsinda.” 5'Ba nde kua'indut'a ña kitsu: “Kui= kjuañu jngu xuta k'uejñani na'enre ko nare 'ba k'uejñako chjunre. 'Ba ngojó tu jngu sani ku̱an.” 6'Ba bi nde jó mani ya'a, tu jngu sani. 'Bamani, xi Na'enchana je 'e'ñu, bi xuta ngasun'ndebi ngatakjejnda. 7'Ba xutabiu tsiningiya ngani: ―Tunga tsa 'batsa'en tijña, ¿ánñu Moisés kitsja'ndeni nga jngu xuta ku̱an skjenitjenni jngu xujun xi tsu nga kitsikjet'a kjuabixanre, 'ba 'batsa'en ku̱an sik'ejña chjunre? 8'Ba Jesús kitsure: ―Ngat'a taja= inimanu, kui= kjuañu Moisés kitsijo'oni nga ku̱an sik'ejño chjunnu. Tunga bi 'ba tsa'en kis'enda ka'nda nga tuts'inre. 9Ngu an xin_nuu̱. Tsa jngu xuta sik'ejña chjunre 'ba tsa chjunre bi chajngi kitsa'ent'are, 'ba kja'e chjun k'uejñako ngani, kui= xi kjuachajngi titsa'ent'are chjunre. 'Ba tsa kja'e xuta kuixanko ngani chjun xi kitsik'ejña xi'inre, kui xutabiu xi 'ba nde kjuachajngi titsa'en. 10'Ba xutare kitsure: ―Tsa 'batjin ngat'are xuta xi tjinre chjun, tusa nda tjin tsa bi kuixanko. 11'Ba Jesús kitsure: ―Bi ngatsi'i xuta mankjinre kibi, tu kui sani xi Na'enchana je kitsjare nga ku̱ankjinre. 12Ngat'a tjin= xuta xi je 'batsa'en kitsin nga bi ku̱an kuixan. 'Ba tjin= xi xuta 'ba kitsiko. 'Ba tjin= xi 'bechja'ndere yojore tu ngat'are ña batexuma Na'enchana. Xi ku̱an ku̱ankjinre kibi, ngatamankjinre. 13'Ba 'batsa'en ja'eko ki'ndire xuta, tuxi Jesús kuanenire ntsja 'ba kjuako Na'enchana ngat'are kui, tunga xutare Jesús jatiko xuta xi inyafa'eko ki'ndire. 14'Ba 'batsa'en Jesús kitsu: ―Ta'e'nde_ru nisti ki'ndiu nga ngatjendekunna̱, 'ba bi 'bechja'nde_ru. Ngat'a xuta xi 'ba kun joni ki'ndi nisti, kui= xi tse'e ña batexuma Na'enchana. 15'Ba kionga Jesús je yanere ntsja ki'ndi nistiu, 'etju nga'ndebiu. 16'Ba 'batsa'en jngu chana'en kitsitiñat'are Jesús, 'ba kitsure: ―Maestru, ¿mé= xi tjinnere nga nda sa'aa̱n, tuxi ku̱an s'e̱nina̱ kjuabenichun xi bi fet'a? 17'Ba Jesús kitsingojore: ―¿Ánñu an techjaningiyaninaa̱ ngat'are xi nda? Xi nda tu jngu ma sani. Tunga tsa mejénri s'e̱ri kjuabenichun xi bi fet'a, tik'etjusin xi kua'indut'a kjuatexumo. 18―¿Ñáre ñu? ―kitsu chana'enbiu. 'Ba Jesús kitsure: ―Bi nik'en. Bi ñe'en kjuachajngi. Bi cheje ñe'en. Bi nukjuai en ndesu ngat'are xuta xi kja'ere. 19Chakuin na'enri ko nari. 'Ba timején xingi jofatsa'en nimején yojori. 20―Ngayéjebiu je kitsik'etjusaa̱n ―kitsu chana'enbiu―. ¿Mé= xi chaja ngisana̱? 21'Ba Jesús kitsingojore: ―Tsa mejénri ku̱ain jotsa'en mejénre Na'enchana, t'in 'ba tateñe ngayéje xi tjinri 'ba ta'e_ri xuta ni̱ma̱, 'ba 'batsa'en s'e̱ri kjuanyina ngank'aa. 'Ba sa'e ndetjenngina. 22Tunga kionga chana'enbiu kjint'e enbiu, tu ndusin kis'ere nga kiji, ngat'a ne nyina. 23'Ba 'batsa'en Jesús kitsure xutare: ―Kjuakixi= xi xin_nuu̱. Ne na'en tjinre tsa jngu xuta nyina kjua'as'en ña batexuma Na'enchana. 24'Ba xin ngani_nuu̱ nga tusa bi na'en tjinre nga jngu chakameyu kjua'as'en nts'anre nindu, nga jngu xuta nyina kjua'as'en ña batexuma Na'enchana. 25'Ba kionga xutare kjint'e kibiu, niki 'ñu= kuakunre, 'ba kitsu: ―Tsa 'batjin, ¿'yá= xi ku̱anre kjuinik'angi tsu'ba? 26'Ba Jesús kiskutsejen'a xutabiu, 'ba kitsure: ―Xuta niñajanni ku̱anre 'ba sa'en, tunga Na'enchana tumeñu mare ña'an. 27'Ba 'batsa'en Pedro kitsure: ―Ji̱n je kik'ejña yejee̱ xi tjinni̱ 'ba tjenngiri nganda'e. Ngu, ¿mé= xi sakuni̱? 28'Ba Jesús kitsingojore: ―Kjuakixi= xi xin_nuu̱. Tu'yañu xi tjenkona̱ nganda'e, kionga kjua'e nixtjin nga ku̱axatse ngayéje xi tjin 'ba nga kuakutsejen Ki'ndire Xuta xi'iun kjuajere nga k'uejña nga'nde ña sa'enre kjua xuta, 'ba nde kui nixtjinbiu kuetsubo nga'nde xi tejó mani nga si'an_ru kjua ntjere xuta tse'e Israel xi tejó ka'a mani. 29'Ba tu'yañu xi tu ngat'ana̱ 'ejña a ndaba= a nts'e= a ndichja= a na'enre= a nare= a ki'ndire asa nangi xi tjinre, kui xutabiu ngijngu sientu ka'a ngisa xi 'ejña kua'ere, 'ba 'ba nde sakure kjuabenichun xi bi fet'a. 30Tunga nkjin= xuta xi tjun ma nganda'e, kui= xi fet'ani ku̱an. 'Ba nkjin= xuta xi fet'ani nganda'e, kui= xi tjun ku̱an.

will be added

X\