SAN MATEO 18

1'Ba ndekuini nixtjinbiu xutare Jesús kitsitiñat'are 'ba tsiningiyare: ―¿'Yá= xi ngisa chjire ña batexuma Na'enchana? 2'Ba Jesús kinchjare jngu ki'ndi chi 'ba kitsikasen ngamasenre xutabiu, 3'ba kitsure: ―Kjuakixi= xi xin_nuu̱. Tsa bi si'indo inimanu 'ba sik'antjaiyo yojonu joni jngu chi'ndi chi, bi kuitjas'ion ña batexuma Na'enchana. 4Kui kjuañu, tu'yañu xi k'uaxjenima yojore joni chi'ndi chibi, kui= xi ngisa chjire ña batexuma Na'enchana. 5'Ba xi skjebetjo ngat'ana̱ jngu chi'ndi chi joni kibi, kui xi an tikjebetjona̱. 6'Ba tu'yañu xi sikajngi je jngu chi'ndi chi joni kibi xi makjainre ngat'ana̱, tusa ngisa ndani ngat'are tsa s'e̱t'a ngisin jngu ndiojo tse 'ba xanikja'ajin ña nanga ndachikun. 7¡Nimaxuni xuta xi tjin ngasun'ndebi, ngat'a tjin= mé= xi tsikajngi je! Ngat'a s'e̱ntsjai mé= xi sikajngi je xuta. Tunga, ¡nimaxuni xuta xi sikajngi je xuta xi kja'ere! 8'Ba mani, tsa ndsai asa ndsakui tsikajngijeri, tusa tichatjin 'ba chanikja'at'axin. Ngat'a ngisa= ndani ngat'ari tsa kutu ntsja asa kutu ndsaku tetsji nga kuitjas'en ña k'uendukunntsjai xuta, 'ba bi ngojó ndsai asa ngojó ndsakui xanikja'ajinri ngajin ndi'i ña bi 'boya. 9'Ba tsa tuxkuin xi tsikajngijeri, tusa 'na̱xje 'ba chanikja'at'axin. Ngat'a ngisa= ndani ngat'ari tsa tu jngusa tuxkuin kuitjas'en ña k'uendukunntsjai xuta, 'ba bi ngojó tuxkuin xanikja'ajinri ngajin ndi'i ña bi 'boya. 10T'ejin kakún. Bi 'naxjengiu jngu chi'ndi chi joni kibi. Ngu xin_nuu̱ nga ankjelere ki'ndibiu xi tjindu ngank'aa, kui= xi tjinduntsjai ngixkun Na'enna̱ xi tijña ngank'aa. 11Ngat'a Ki'ndire Xuta xi'iun ja'etsik'angi xi je kichaja tsakaiñu. 12¿Jó mixun jun? Tsa jngu xuta tjinre jngu sientu chutsanga, 'ba tsa jngu cha̱jare, ¿a bi sik'endu xi yachute ko yachan ñajan ngajin ngijño 'ba kuekangisjai xi kichajo? 13Kjuakixi= xi xin_nuu̱. Tsa ku̱asjaire xi kichajo, ngisa= tsja ku̱anre ngat'are kui, nga ko mare xi yachute ko yachan ñajan xi bi kichajo. 14'Ba nde tsa'en bi mejénre Na'ennu xi tijña ngank'aa nga nijnguú ki'ndi chi joni kibi xaja. 15'Ba tsa nts'é ch'o tsikori, t'ichin 'ba chuko nijmi tajngui 'ba 'ba t'in_ri nga bi nda tjin mé= xi titsa'en. 'Ba tsa kjuint'e enri, je nda kich'a ngani nts'é. 16Tunga tsa bi kjuint'e enri, t'ikue jngu asa jó xuta xi kja'ere, tuxi 'batsa'en s'e̱ni jó asa ján xi sikixiya mé= xi ku̱an. 17Tunga tsa 'ba nde bi kjuint'e enre xutabiu, t'e_ri nijmi ngatsi'i xi mañajan ningu. 'Ba tsa 'ba nde bi kjuint'e enre xi mañajan ningu, tu ngatja'yani joni xuta xi bi tse'e Israel asa xi kjebechjintjai tsajmi. 18'Ba xinkixi_nuu̱, mé= xi k'uechja'ndio nga'e ngasun'ndebi, 'ba=nde s'e̱chja'nde ngank'aa. 'Ba xi kua'e'ndio nga'e ngasun'ndebi, 'ba=nde kua'e'nde ngank'aa. 19'Ba 'ba nde xin_nuu̱. Tsa jó kuon xi tujngu kjiyuju kakún nga'e ngasun'ndebi ngat'are mé= xi mejénnú 'ba xja'a_ru Na'enna̱ xi tijña ngank'aa, kui= xi sjanu mé= xi xjo'o. 20Ngat'a ña jó asa ján xuta ku̱añajan ngat'are ja'enna̱, kio= tesiaa̱n ngamasenre xutabiu ―kitsu Jesús. 21'Ba 'batsa'en Pedro kitsitiñat'are Jesús 'ba tsiningiyare: ―Na'en, ¿jó tjin ndiya sichat'a_ra̱ nts'ia̱, tsa ch'o sikona̱? ¿A ka'nda yatu ndiya? 22'Ba Jesús kitsingojore: ―Bi texinra̱ tsa yatu ndiya, tusa yachute ko kan ndiya xi yatu. 23'Ba Jesús kitsu: ―'Ba mani, ña batexuma Na'enchana, ningusunkoña joni jngu rey xi kuamejénre kitsa'enko kuenda chu'ndare. 24'Ba kionga je ti'betuts'inre nga titsa'en xki, ja'enikasen ngixkun jngu xi 'ñu tsé tjenre tse'e. 25Tunga xutabiu tsajainre ton xi k'uechjini xi tjenre. 'Ba 'batsa'en xi naire 'exa nga sateña xutabiu, chjunre, ko ki'ndire, 'ba ko ngayéje xi tjinre, tuxi 'batsa'en ku̱achjini xi tjenre. 26'Ba 'batsa'en chu'ndabiu tsakasenkunch'in ngixkun naire 'ba 'ets'are: “Na'en, ngatjas'echiri kjuaje kakun ngat'ana. K'uechji yejera̱ tonri”, kitsure. 27'Ba rey ja'animare chu'ndare 'ba kitsure: “Je bi nde tjenniri tsa'an.” 'Ba kitsik'ejñandai. 28Tunga kionga 'etju chu'ndabiu nga'ndebiu, kio kisatejin kja'e chu'nda xi tu jngu chu'nda ma xi tjenchire tse'e. Xi yastisin 'ba kiskanijndusin 'ba kitsure: “¡T'echji tonna̱ xi tjenri!” 29'Ba 'batsa'en tsakasenkunch'int'are chu'nda xi tu jngu chu'nda ma, 'ba 'ets'are: “Ngatjas'echiri kjuaje kakun ngat'ana̱. K'uechjiyejera̱ tonri”, kitsure. 30Tunga xi ngijngu bi kuakjainre. Tusa nduya 'ete ka'nda nga k'uechji ngayéje xi tjenre. 31'Ba kionga chu'nda xi yak'a tsabe kibi, 'ñu on kuán kakun 'ba ye'ere nijmi naire mé xi kuán. 32'Ba 'batsa'en kinchja nganire naire chu'ndabiu 'ba 'bi kitsure: “Chu'nda ch'okun, an nimé kiskjebechjira̱ ton xi tjenri tsa'an, tu ngat'are nga kik'ets'anaa̱. 33Ngu, ¿a bi 'ba nde tjinnere nga ja'animari tsakaiñu chu'nda xi tu jngu chu'nda mo, jotsa'en ja'animara̱ ji?” 34'Ba 'ñu sti kuánre naire. 'Ba kitsingantsja chu'ndabiu ngaya ntsja nchja xi tsikuenda nduya, ka'nda nga̱ k'uechji ngayéje ton xi tjenre. 35'Ba Jesús kitsu ngisa: ―'Ba=nde sikonu Na'enna̱ xi tijña ngank'aa, tsa bi ko ngayéje inimanu sichat'a_ru nts'io nga ch'o sikonu.

will be added

X\