SAN MATEO 17

1Kionga je ja'a jon nixtjin, Jesús kikot'axin Pedro ko Santiago 'ba ko Juan xi nts'e mani Santiago 'ba tsijin jngu nindu nk'a. 2'Ba kio ngixkun nchjabiu, Jesús ts'antjaiya isenre. Nkjain tsa'na joni tsu'biu, 'ba najñure tiba xu xu kuán joni ndi'i. 3'Ba kio nchjabiu tsabe nga Moisés ko Elías inyafako nijmi Jesús. 4'Ba 'batsa'en Pedro kitsure Jesús: ―Na'en, ¡á ndani nga nga'e tetsuba! Tsa mejénri, sindaa̱ ján ni'ya ki'ndi nga'e, jngu xi tsiji ko jngu xi tse'e Moisés 'ba ko jngu xi tse'e Elías. 5'Ba yejerañu tinchja Pedro, jngu yufi xi 'na ja'etsink'ianre nchjabiu, 'ba ngajin yufibiu 'etjujin jngu jnda xi kitsu: ―Kui=bi xi Ki'ndina̱ xi 'ñu tsimijaa̱n 'ba xi tsja tjinna̱ ngat'a tse'e. Tasen ñojon_ru kui. 6'Ba kionga kjint'ere jndabiu xutare, kitsikindi nkjain 'nda t'anangiu 'ba 'ñu kitsakjun. 7'Ba 'batsa'en Jesús kitsitiñat'are 'ba kitsiko, 'ba kitsure: ―Tisetjion 'ba bi kun. 8'Ba kionga kiskjenitjen ngani nkjain nchjabiu, tu'yá nde tsabeni. Tu Jesús tajngu sejña ya'a. 9'Ba kionga je inyandibajen ngani nindu, Jesús 'enere nchjabiu, 'ba kitsure: ―Tu'yá 'be_ru nijmi mé= xi kji'yo, ka'nda nga Ki'ndire Xuta xi'iun kjua'aya nganire ngajinre mik'en. 10'Ba xutare Jesús tsiningiyare: ―¿Ánñu chjine kjuatexuma tsuni nga Elías tjinnere nga tjun kjua'e? 11'Ba Jesús kitsingojore: ―Kjuakixi= nga Elías tjun kjua'e 'ba nga kui k'uenda ngayéje. 12Tunga an xin_nuu̱ nga Elías je ja'e, tunga xuta bi tsabexkun, tusa kitsiko jotsa'en kui kuamejénre. 'Ba 'ba=nde tsa'en Ki'ndire Xuta xi'iun kjua'a kjuanima ngaya ntsja xutabiu. 13'Ba 'batsa'en xutare kuankjinre nga ngat'are Juan Bautista= kinchja nga 'ba kitsu. 14'Ba kionga ja'e ngani ña inya xutankjiun, jngu xuta kitsitiñat'are Jesús 'ba tsakasenkunch'int'are, 'ba kitsure: 15―Na'en, ngatja'animachiri ki'ndina̱, ngat'a tjin= nixtjin nga 'mexkjuen 'ba fatse 'ba ne 'ñu fa'a kjuanima. 'Ba nkjin ndiya kajin ndi'i asa nanda. 16'Ba ja'eko_ra̱ xutari, tunga bi kuánre kjininda. 17'Ba meni Jesús kitsingojo: ―¡Xuta xi tjin nganda'e tsajainre kjuamakjain 'ba xtan koni! ¿Kjia'á= 'nda kuatejñajin_nuu̱? ¿Kjia'á= 'nda xukjuako_nuu̱? Ndekonu ki'ndibiu nga'e. 18'Ba Jesús jatiko isennixtjin xi bi ndo, 'ba 'etjukajinre ki'ndibiu. 'Ba ndekuini chubabiu kuanda. 19'Ba 'batsa'en xutare Jesús kitsitiñat'are 'ba tsiningiyat'axinre: ―¿Ánñu bi kuán kji'naxjeni̱ ji̱n isennixtjinbiu? 20'Ba Jesús kitsure: ―Ngat'a ne chuba makjainnu, 'ba xinkixi_nuu̱, tsa tjinchinu kjuamakjain ninga tu ichisa joni xujma mostaza, ku̱an k'uin_ru nindubi: “Texin nga'e 'ba kja'e nga'nde t'in”, 'ba nindu kuetukaxin. 'Ba tume na'en ku̱annu tsa 'ba tsa'en ku̱akjainnu. 21Tunga isennixtjin joni kibi bi tu chu̱ba̱ 'betju. Kio=nga chukua Na'enchana 'ba nga betsuba kjindia, kio=nga 'betju. 22'Ba kionga Jesús tsu'bako xutare nangi Galilea, kitsure: ―Ki'ndire Xuta xi'iun ku̱angantsja ngaya ntsja xuta, 23'ba kjuinik'en. Tunga xi majánni nixtjin kjua'aya nganire ngajinre mik'en. 'Ba xutare 'ñu kuabare nga 'ba kitsu Jesús. 24'Ba kionga Jesús ko xutare echu naxinanda Capernaum, xuta xi kjebechjintjai ningu xi kjijña naxinanda Jerusalén kitsitiñat'are Pedro, 'ba tsiningiyare: ―¿A bi 'bechjintjai ningu maestruri? 25'Ba Pedro kitsingojo: ―Jun, 'bechjintjai. 'Ba kionga Pedro ja'as'en ni'ya ña tijña Jesús, Jesús tjun kitsure: ―¿Jó sji ji, Simón? Rey xi tjin ngasun'ndebi, ¿'yá= xi tsik'echjintjai? ¿A xi tujngu naxinandare, asa xuta xi kja'ere? 26'Ba Pedro kitsingojore: ―Xuta xi kja'ere. 'Ba Jesús kitsu ngani: ―Ngu, xi tujngu naxinandare tume 'bechji, tsu'ba. 27Tunga tuxi bi ch'o ku̱anire nchjabiu, tusa t'in ngandai ndachikun 'ba chanikja'ajin tsitin. Tjiuti xi tjun skat'a, chju'i ts'a. 'Ba kio ku̱asjairi jngu ton xi ku̱an k'uechjintjaini jó xuta. Chjube tonbiu 'ba t'ik'echjintjai ngat'ari 'ba ngat'ana̱.

will be added

X\