SAN MATEO 16

1'Ba xuta fariseo ko xuta saduceo ja'e tuxi skut'ayakoni Jesús. 'Ba tsi'are nga sa'en jngu kjuakun xi kuakutsejen nga Na'enchana kitsikasen. 2Tunga Jesús kitsingojore: ―Kionga mangixun, mixun: “Nda= chun ku̱an, ngat'a chun tsjetsje ngank'aa.” 3'Ba nga tajñu, mixun ngañu: “Ch'o chun ku̱an nganda'e, ngat'a yufi inya ngank'aa.” Mankjinnu mé= xi matsejen ngank'aa, tunga, ¿ánñu bi kjimankjinninu xi tis'ejñatsejen nganda'e? 4Xuta xi tjin nganda'e inyami'a nga mejénre skue jngu kjuakun, ngat'a ch'okun 'ba bi kixi inya ngixkun Na'enchana. Tunga tume kuakure tu kui sani xi kuata'en profeta Jonás nixtjin kuatse jan, kui kjuakunbiu xi s'ejñatsejenre ―kitsu Jesús 'ba tsakasent'axinre xutabiu. 5'Ba kionga xutare ja'axtiu xingunda ndachikun, kichiyajinre nga tsaka'a niñuxtila. 6'Ba Jesús kitsure: ―Chutsijon 'ba tikuendo yojonu ngat'are na'yu sanre xuta fariseo ko xuta saduceo. 7'Ba xutare jonijmiko xinkjin 'ba kitsu: ―Ngat'a kichiyajinna nga kich'a niñuxtila kui= kjua 'ba titsuni. 8'Ba Jesús tsabe mé= xi inyatsure xinkjin 'ba kitsure: ―¿Ánñu te'mini_ru xingiu nga bi kich'o niñuxtila? ¡Á tsa'en chuba makjainninu! 9¿A tojo kje mankjinnu? ¿A bi fa'etsjennu nga ón niñuxtila yakjanyaa̱ ngajinre ón mi xuta 'ba jó tjin nisin kjinitsio xkuare? 10¿'Ba a bi fa'etsjennu nga yatu niñuxtila yakjanyaa̱ ngajinre ñujun mi xuta 'ba jó tjin nisinya kjinitsio xkuare? 11¿Jó tjinnire nga bi mankjinnu nga bi ngat'are niñuxtila nga tenchjaa̱? Tunga chutsejen_ru yojonu na'yu sanre xuta fariseo ko xuta saduceo ―kitsu Jesús. 12'Ba 'batsa'en xutare kuankjinre xi Jesús titsu, nga bi ngat'are na'yu sanre niñuxtila xi tjinnere nga sikuenda yojore, tu kui xi bakuya xuta fariseo ko xuta saduceo. 13'Ba kionga Jesús echu nangi xi tijñandaire Cesarea, ña tjinre xa Filipos, tsiningiyare xutare: ―¿Jó tsu xuta, 'yá= xi Ki'ndire Xuta xi'iun? 14'Ba xutare kitsingojore: ―Tjin xi tsu nga Juan Bautista= 'ba tjin xi tsu nga Elías. 'Ba tjin yak'a xi tsu nga Jeremías asa kja'e ngijngu profeta. 15'Ba Jesús kitsu nganire: ―'Ba jun, ¿jó mixun nga 'yá=niña̱ an? 16'Ba 'batsa'en Simón Pedro kitsingojore: ―Ji= ni xi Cristo, Ki'ndire Na'enchana xi tijñakun. 17'Ba Jesús kitsure: ―¡Ndaxuri, Simón, ki'ndire Jonás! Ngat'a bi xuta ngasun'ndebi 'ejñatsejenri kibiu, tu Na'enna̱ xi tijña ngank'aa. 18'Ba an xinra̱ nga k'uinri Pedro, 'ba ngasun ndiojobiu sindaa̱ ninguna̱; 'ba nga'ñure kjuabeyo bi ku̱an sa'enre xuta xi tsa'an. 19'Ba sjara̱ llavere ña batexuma Na'enchana. 'Ba ngayéje xi k'uechja'nde nga'e ngasun'ndebi, 'ba=nde s'e̱chja'nde ngank'aa. 'Ba ngayéje xi kua'e'nde nga'e ngasun'ndebi, 'ba=nde kua'e'nde ngank'aa. 20'Ba kio Jesús 'ñu 'enere xutare nga tu'yá ngate'ere nijmi nga kui xi Cristo. 21'Ba ka'nda kui nixtjinbiu tsaka'anire Jesús nga ye'ekixire nijmi xutare nga tjinnere nga kuaje Jerusalén, 'ba nga ne tse kjuanima kjua'axtiu ngaya ntsja nchja chingare naxinando ko xi ngakure na'mi 'ba ko chjine kjuatexuma, 'ba nga kjuinik'en, 'ba nga xi majánni nixtjin kjua'aya nganire ngajinre mik'en. 22'Ba kio Pedro kikot'axin Jesús 'ba 'etuts'inre nga jatiko 'ba kitsure: ―¡Na'en, Na'enchana ngat'ejñat'axin ngayéje kibiu! ¡Tumé ku̱anri! 23Tunga Jesús kitsiku'beya 'ba kitsure Pedro: ―¡Tisent'axinnaa̱, Satanás! Ji xi te'bejñanaa̱ kjuana'en. Ngat'a bi nikja'etsjen mé= xi tse'e Na'enchana, tusa mé= xi tse'e xuta ngasun'ndebi. 24'Ba 'batsa'en kitsure xutare: ―Tsa tjin xi mejénre sjenngina̱, ngatatsichiyajin yojore ko mé= xi mejénre 'ba ngata'anijin krure 'ba ngatjandetjenngina̱. 25Ngat'a xi mejénre sik'angi tajngu yojore nga k'uejñakun, kui= xi tusa kueya. Tunga xi kueya tu kjuana̱ ni, kui= xi tusa sakure kjuabenichun. 26Ngat'a, ¿mé= xi sa'enire xuta tsa sa'en ngayéje xi tjin ngasun'ndio, 'ba tsa sichaja inimare? ¿'Ba jó tjin ku̱an k'uechjintjai inimare xuta? 27Ngat'a Ki'ndire Xuta xi'iun kjua'eko kjuajere Na'enre 'ba kjua'eko ankjelere, 'ba kio k'uechjire xuta mé= xi kitsa'en nga jngu jngu. 28Kjuakixi= xi texin_nuu̱. Nga yak'a xi inya nga'e bi kueya ka'nda nga skue nga kjua'ekatexuma Ki'ndire Xuta xi'iun.

will be added

X\