SAN MATEO 15

1'Ba 'batsa'en yak'a xuta fariseo ko chjine kjuatexuma xi jendibani naxinanda Jerusalén kitsitiñat'are Jesús, 'ba 'bi kitsure nga tsiningiyare: 2―¿Ánñu bi tsik'etjusunni xutari kjuachinga xi yakuyana xuta chingana? Ngat'a bi titjun banejun ntsja nga kjen. 3'Ba Jesús kitsingojore: ―'Ba jun, ¿ánñu bi nik'etjusunñu kjuatexumare Na'enchana, nga tusa kjuachingare xuta chinganu nik'etjusun? 4Ngat'a enre Na'enchana 'bitsa'en kua'indut'a: “Chakuin na'enri ko nari”, 'ba “Xi ch'o kuetsure na'enre asa nare, kui xi tjinnere nga kjuinik'en.” 5Tunga jun mixun nga tsa tjin xi kuetsure na'enre asa nare: “Bi ku̱an kuasekora̱, ngat'a ngayéje xi tjinna̱ xi ku̱an kuasekonira̱ tsakaiñu, je 'ejñat'axia̱n tuxi sjani_ra̱ Na'enchana”, 6tsa tjin xi 'ba kuetsu, bi nde tjinnenire nga kuaseko na'enre asa nare. 'Ba 'ba=tsa'en miyunio kjuatexumare Na'enchana tu ngat'are kjuachinganu. 7¡Xuta jó nkjain! Xuta chinga profeta Isaías kixi= kinchja ngat'a tsojon kionga kitsu: 8Kui xutabi tu ts'a bekunnina̱, tunga inimare kjin tjindu ngat'a tsa'an. 9Tumé chjinire chje xi tsjana̱, ngat'a tu kjuatexumare xuta= bakuya. 10'Ba 'batsa'en Jesús kinchjare xutankjiun 'ba kitsure: ―Tasen ñojon 'ba ngatamankjinnu. 11Bi kui xi fa'as'en nga'a ts'a xuta xi tsijndire ngixkun Na'enchana, tusa xi 'betjuni ts'a, kui= xi tsijndire. 12'Ba 'batsa'en xutare kitsitiñat'are Jesús 'ba kitsure: ―¿A 'yani nga xuta fariseo kuach'ore ngat'are en xi kisji? 13'Ba Jesús kitsingojore: ―Ngayéje tsujmi ntje xi bi kis'entje ngat'are Na'enna̱ xi tijña ngank'aa, stjune ka'nda ko jamare. 14Ngu bi nisin_ru nchjabiu. Tu xuta ka= kui= xi baku ndiyare xuta ka. 'Ba tsa jngu xuta ka kuaku ndiyare ngijngu xuta ka, ¿a bi tu jngu ngojo kuixuya ngojó? 15'Ba Pedro kitsu: ―'Ba t'innii̱ jó tsunire kionga kisji nga bi kui xi fa'as'en nga'a ts'a xuta xi tsijndire ngixkun Na'enchana. 16'Ba Jesús kitsure: ―¿A tojo kje mankjiínnu jun ngayeje? 17¿A bi 'yo nga ngayéje xi fa'as'en nga'a ts'a xuta, kui xi fi ngaya ngats'a 'ba sa'e 'betju ngani? 18Tunga xi 'betju ts'a xuta, kui= xi ndibani ngajin inimare, 'ba kui= xi tsijndire xuta ngixkun Na'enchana. 19Ngat'a ngajin inimare xuta= ndibanire nga ch'otsa'en tsikja'etsjen, 'ba nga tsik'en xinkjin, nga tsa'en chajngi, nga tsiskako yojore, nga tsa'en cheje, nga nchja en ndesu, 'ba nga ch'o tsure xinkjin. 20Kui= xi tsijndire xuta ngixkun Na'enchana. Tunga tsa kuakjen ninga bi kuanejun ntsja, bi kui xi tsijndire xuta ngixkun Na'enchana. 21Nga Jesús 'etju kio, kijit'axin nangi ña batexumare naxinanda Tiro ko nangi ña batexumare naxinanda Sidón. 22'Ba jngu chjun xi kio tijña, xi ntjere xuta xi jendibani nangi Canaán, kitsitiñat'are 'ba 'bi kitsu nga kiski'ndaya: ―¡Ji na'en, ntjere David, ngatjas'eri kjuanima kakun ngat'ana̱! ¡Ki'ndi chjunna̱ ne 'ñu ti'benere jngu isennixtjin xi bi nda! 23Tunga Jesús nijnguú en kitsingojore. 'Ba 'batsa'en xutare kitsitiñat'are 'ba kitsure: ―Tusa 'ba t'in_ri chjunbiu nga ngatji, ngat'a tikji'ndaya tjenngina. 24'Ba Jesús kitsingojore: ―Kitsikasenna̱ Na'enchana nga tu kui sa kjuikuan xuta xi tjin ngajinre xuta tse'e Israel, xuta xi kichaja joni chutsanga xi tsakasent'axin tajngu. 25'Ba 'batsa'en ja'e chjunbiu 'ba tsakasenkunch'int'are Jesús 'ba kitsu: ―¡Na'en, tisekochina! 26'Ba Jesús kitsu: ―Bi nda tjin tsa xja'are niñuxtilare ki'ndiu 'ba kua'ere tjiunaño. 27'Ba chjunbiu kitsu: ―Jun na'en, tunga ka'nda tjiunaño kjine xi̱ xi bixungi ngi yamixare naire. 28'Ba 'batsa'en Jesús kitsingojore 'ba kitsu: ―¡Á tsa'en 'ñu makjainniri, na! 'Ba ngatjama jotsa'en nga ji mejénri. 'Ba ndekuini chubabiu kuanda ki'ndi chjunre chjunbiu. 29'Ba Jesús 'etju nga'ndebiu 'ba echu ndai ndachikun Galilea, 'ba 'batsa'en tsijin jngu nindu 'ba kio tsik'ejña. 30'Ba nkjin xuta ja'ekun Jesús xi ja'eko xuta xi kututjun kun ndsaku, xi ka, xi ni̱má, xi kututjun ntsja, 'ba ko nkjin ngisa xi inyafesun. 'Ba 'endut'a tiñare Jesús, 'ba kui kitsinda ngatsi'i. 31'Ba kui= kjua kuakunnire xutankjiun, nga tsabe nga ma inyanchja xuta xi ni̱má, nga inyamanda xi kututjun kun ntsja, nga ma inyafi xi kututjun kun ndsaku, 'ba nga inyamatsejen nganire xuta xi ka. 'Ba xutankjiun kitsikixiya nga tjinre kjuaje Na'enre xuta Israel. 32'Ba Jesús kinchjare xutare 'ba kitsure: ―Fa'anima=na̱ xutabi, ngat'a je ján nixtjin tjinre nga tjindukona̱ nga'e 'ba je bi nde tjinnire xichine. 'Ba bi mejénna̱ nga k'uete kjindia, ngat'a tsa chjen ngaya ndiyo kueyaya. 33Tunga xutare kitsingojore: ―¿Joni nga'nde kibi kioña tu'yá tjin, ñá=ñu sakuna xi chine 'ba kua'era 'ba tuku kji'i xuta? 34'Ba Jesús tsiningiyare: ―¿Jó tjin niñuxtila kich'o? 'Ba xutare kitsingojo: ―Yatu 'ba jó ján tjiuti. 35'Ba meni Jesús 'exa nga xutankjiun ngat'endu t'anangiu. 36'Ba kiskjebe nga yatu niñuxtilo 'ba ko tjiutiu, 'ba kitsjare kjuanda Na'enchana, 'ba sa'e kitsixkua 'ba kitsjare xutare, 'ba xutare kitsjare xutankjiun. 37'Ba kiskine tsi'i ka'nda nga̱ nda kitsere. 'Ba kionga je kiskja'añajan xkua xi ts'angi, yatu nisinya kitsere. 38'Ba xi kiskine niñuxtilo ñujun mi xuta xi'in, 'ba kja'ere yanchjin ko nisti ki'ndi. 39'Ba kionga Jesús je kitsikixant'a xutankjiun, ja'as'en ngani ngaya barku 'ba kiji nangi Magdala.

will be added

X\