SAN MATEO 13

1'Ba ndekuini nixtjinbiu Jesús 'etju ni'yare 'ba kik'ejña ngandai ndachikun, 2'ba ne nkjin xuta kuañajant'are. Kui kjua kik'ejñayanire jngu barku, 'ba ngatsi'i xutankjiun tsikinya ndai nando ña kixi chun. 3'Ba nga ko kjuakusun 'ejñare nga yakuyare nkjin kuya tsajmi, 'ba kitsu: ―Jngu xuta kiji nga kikjejndi xujma. 4'Ba kionga je tikjejndi xujma, masen xujmare tsixu ndai ndiyo. 'Ba ja'e tjiunisio 'ba kiskine. 5'Ba ngimasen xujmare tsixujin ndiojo ña bi tse nangi tjin. 'Ba ta'a jesu xujmo, ngat'a bi 'ñu nanga nangiu. 6Tunga kionga 'etju tsu'biu, kitsichjanre 'ba kixi, ngat'a bi 'ñu nanga kiji jamare. 7'Ba ngijngu ka'a xujma tsixu ngajin na'ya. 'Ba na'yo kuank'a 'ba bi kitsja'ndere nga nda kuacha xujmabiu. 8Tunga ngijngu ka'a tsixu ña nda nangi 'ba nda chan kitsja. Tjin xujmo xi kitsja jngu sientu, 'ba tjin xi kitsja yachute ko te, 'ba tjin xi kitsja kate. 9Xi tjin ñojon, ngatasen ñojon ―kitsu Jesús. 10'Ba kio xutare kitsitiñat'are Jesús 'ba kitsure: ―¿Ánñu kjuakusun nichjenni kionga chukue xuta? 11'Ba Jesús kitsingojore: ―Jun je kitsa'e'ndenu nga ku̱ankjinnu mé= xi 'mo tijña ngat'are ña batexuma Na'enchana. Tunga xuta xi yak'a bi kitsa'e'ndere nga ku̱ankjinre kibiu. 12Ngat'a xi tjinre, ngisa= tse kua'e ngisare 'ba ngisa tse s'e̱re. Tunga xi tsajainre, kui= xi stukja'axinre ka'nda xi tjinchire. 13Kui= kjua kjuakusun tsichjenña̱ kionga fakua̱ xutabiu. Ngat'a ninga inyakutsejen'a mé= xi tsa'an, bi machuyare. 'Ba ninga inyant'e mé= xi xia̱n, bi basen ñojon ni̱ mankjinjínre. 14Ngat'a nga 'ba tsa'en xutabiu 'betjusun enre Na'enchana xi kitsu xuta chinga profeta Isaías: Ninga nda kuinya ñojon, bi ku̱ankjinnu, 'ba ninga nda xutsijon, bi ku̱achuyanu. 15Ngat'a je kuataja inimare xutabi, 'ba kuaxtaya 'ba 'echja tuxkun, tuxi bi skueni 'ba bi kuint'eni, 'ba tuxi bi ku̱ankjinnire, tsa chjen sik'antjaiya inimare 'ba an sindaa̱. 16Tunga jun, ¡ndaxure xkún ko ñojón! Ngat'a xkún be= 'ba ñojón nt'e=. 17Kjuakixi= xi xin_nuu̱ nga nkjin profeta ko xuta kixi xi kis'e nixtjin kuatse jan kuamejénre tsabe mé= xi te'yo nganda'e, tunga bi tsabe. 'Ba kuamejénre yasen ñojon mé= xi tenu'yo nganda'e, tunga bi kjint'e. 18'Bamani tsu'ba, tasen ñojon jó tsunire kjuakusun ngat'a tse'e xuta xi kjejndi xujma. 19Kionga tjin xi nt'e 'ba bi mankjinre enre Na'enchana xi tsuya nga kui= xi batexuma, 'batsa'en ndiba chanayiu 'ba fa'axin en xi je kis'entjejin inimare. Kui jo=ni xujma xi tsixu ndai ndiyo. 20'Ba xujma xi tsixu ngajin ndiojo, kui joni xuta xi nt'e ion 'ba ta'a tsja tsa'en kjebe. 21Tunga ngat'a bi 'ñu tjinre jama ngajin inimare, bi kixi minya. 'Ba kionga tu kjuare ion nini fa'a kjuanima 'ba tsjenngicha ngutjunfani tsichaja kjuamakjainre. 22'Ba xujma xi tsixu ngajin na'yo, kui joni xuta xi kjebe ion, tunga tsajmi xi tjin ngasun'ndebi 'ñu tsikjo 'ba kjuanyino 'bonachare. 'Ba 'batsa'en bi tixa'ndere nga nda ku̱acha ion ngajin inimare xutabiu 'ba bi tsja chan ya'a. 23Tunga xujma xi tsixu ngajin nangi ña nda chun, kui joni xuta xi nt'e ion 'ba mankjinre 'ba nda chan tsja. Tjin xi tsja jngu sientu, 'ba tjin xi tsja yachute ko te, 'ba tjin xi tsja kate ―kitsu Jesús. 24'Ba 'batsa'en Jesús 'ejña ngani kjuakusunbi: ―Ña batexuma Na'enchana nde 'ba=nire joni jngu xuta xi nda xujma 'entje ngijñare. 25Tunga kionga kjiyufe xuta, kio ja'e xuta xi stike 'ba 'entje ngajin trigore ngijña xi bi nda 'ba sa'e kiji ngani. 26'Ba kionga kuank'a trigo 'ba kis'ere tu, 'ba nde kio kji'yare ngijña xi bi ndo ngayeje. 27'Ba kio chu'ndare xi naire trigo ja'e 'ba kitsure: “Na'en, ¿a bi xujma nda xi kik'entje ngijñari? Ngu, ¿ñá jendibanire ngijña xi bi nda?” 28'Ba xi naire kitsure: “Jngu xuta xi stikena̱ xi 'ba kitsa'en.” 'Ba chu'ndare kitsu nganire: “¿A mejénri nga kuechjune?” 29Tunga kui kitsure: “Janjain, ngat'a tsa xjunio ngijña xi bi ndo, tu ko jamare trigo stjuneya. 30Tusa janda ñatjen ngatamacha 'nda nga kjuechu chanre. Kui nixtjinbiu xin_ra̱ xi kuekja'a tsujmi ntjio nga tjun ngatafuneya ngijña xi bi ndo 'ba kua'ñu tuxi kuakani. 'Ba sa'e ngataminyatjo trigo ngaya ni'yana̱.” 31'Ba 'batsa'en ngijngu kjuakusun 'ejña ngani Jesús, 'ba kitsu: ―Ña batexuma Na'enchana nde 'ba=nire joni jngu xujma mostaza xi kiskjebe jngu xuta 'ba 'entje ngijñare. 32'Ba kui xujmabi ngisa= ichi ngisa nga ko mare ngayéje xujma xi tjin. Tunga kionga je mank'a, kui= xi ngisa je ma ngisa nga ko mare ngayéje tsujmi ntje xi kis'entje. Ka'nda jngu ya mani ya'a, 'ba ka'nda tjiunisio ma fa'etsinda ndaba nga'a tjiare. 33'Ba nde 'ejña ngani kjuakusunbi: ―Ña batexuma Na'enchana nde 'ba=nire joni jngu chjun xi kiskjebe ichi na'yu san 'ba kitsik'atjijinko 'ñu tsé na'yu. 'Ba 'batsa'en tsijin ngayéje na'yu ―kitsu Jesús. 34'Ba= tsa'en jako Jesús xutankjiun. Ngayéje en xi yakuyare ko kjuakusun kitsichjen, 'ba bi yakuyare tsa bi ko kjuakusun 'ejñare. 35'Ba kuán tuxi 'etjusunni enre Na'enchana xi kitsu nchja chinga profeta nga kitsu: Ko kjuakusun kuinchjaña̱, 'ba xia̱n mé= xi 'mo tjindu, 'nda nga kuanda ngasun'ndio. 36'Ba kionga Jesús je kitsikixant'a xutankjiun, ja'as'en ndaba, 'ba kio xutare kitsitiñat'are 'ba kitsure: ―T'inyachini̱ jó tsunire kjuakusun ngat'a tse'e ngijña xi bi nda xi kis'e ngajin trigo. 37'Ba Jesús kitsingojore: ―Xuta xi 'bentje xujma xi ndo, kui= Ki'ndire Xuta xi'iun. 38'Ba nga'nde ña s'entje, kui ngasun'ndebi. 'Ba xujma xi ndo, kui= xuta xi tse'e ña batexuma Na'enchana. 'Ba ngijña xi bi ndo, kui= xuta xi tse'e chanayiu. 39'Ba xuta stike xi 'entje ngijña xi bi nda, kui chanayiu. 'Ba nixtjinre cho̱n, kui nixtjin kionga kjue ngasun'ndio. 'Ba xuta xi kuekja'a tsujmintjio, kui= ankjele. 40'Ba joni ko ngijña xi bi nda s'eku 'ba s'etsojojin ndi'i, 'ba=nde ku̱an kionga kjue ngasun'ndio. 41'Ba Ki'ndire Xuta xi'iun sikasen ankjelere ña batexuma 'ba skja'axin ngayéje xi tsikajngije ko ngatsi'i xi bi nt'e enre Na'enchana. 42'Ba k'uetsojojin ña 'ñu tjima ndi'i, kioña xuta ski'nda 'ba ña kuajngaya nde'ñu. 43'Ba 'batsa'en xuta xi kixi kua'na= joni tsu'biu kioña batexuma Na'enre. Xi tjin ñojon, ngatasen ñojon. 44'Ña batexuma Na'enchana nde 'ba=nire joni jngu tsajmi xi 'ñu chjire xi tijña'mo jngu nga'nde. Xi kuasjaire jngu xuta, 'ba nde kio= 'ejña'mo ngani. 'Ba 'ñu tsja kis'ere ngat'are kibiu 'ba kikateña yeje xi tjinre 'ba ko tonbiu tsatse nga'ndebiu. 45'Ba nde ña batexuma Na'enchana nde 'ba=nire joni jngu xuta xi bateña tsajmi xi timangisjai ndiojo xi tsja kun. 46'Ba kionga je kuasjaire jngu xi 'ñu chjire, kikateña ngayéje xi tjinre 'ba ko tonbiu tsatse ndiojobiu. 47'Ba nde ña batexuma Na'enchana nde 'ba=nire joni jngu na'ya ti xi kichanikja'ajin ndachikun 'ba kiskaya ngayéje kuya ti xi tjin. 48'Ba kionga je kitse na'yo, meni xi tsuba tjiuti 'baxjejin ngandai nando, kioña 'bendu 'ba kja'ajin xi nda 'ba minya nisin 'ba 'betsojo xi bi nda. 49'Ba=nde ku̱an kionga kjue ngasun'ndio ngayeje. Kjua'e ankjele nga sik'endut'axinre xuta ch'okun ko xi kixi. 50'Ba 'batsa'en xi ch'okun k'uetsojojin ña 'ñu tjima ndi'i, kioña xuta ski'nda 'ba kuajngaya nde'ñu. 51¿A je kuankjinnu ngayéje kibi? ―kitsure Jesús nga tsiningiyare. ―Jun ―kitsu xutare. 52'Ba Jesús kitsure: ―'Bamani nga jngu jngu chjine kjuatexuma xi kisakuyare ngat'are ña batexuma Na'enchana, nde 'ba=nire joni jngu xuta xi tjinre jngu ni'ya je, ña tjindutjore tsajmi xi 'ñu chjire. 'Ba ngajin tsajmibiu 'baxje xi xatse ko xi chinga. 53'Ba kionga Jesús je jet'are nga yakuya kjuakusun, 'etju nga'ndebiu. 54'Ba kionga je echu ngani ña nangire, 'etuts'inre nga yakuya ngaya ni'ya sinagogare xuta xi tjin kio. 'Ba xuta tu kuakunre, 'ba tsure xinkjin: ―¿Ñá kikja'anire xutabi kjuankjinkakun? ¿Ñá= sakunire kjua'ñu tuxi tsa'enni kjuakun? 55¿A bi tsa ki'ndire chjine yo kibi? ¿A bi nare xi María 'mi? ¿A bi nts'e mani Santiago ko Kuse ko Simón 'ba ko Judas? 56¿A bi nga'e tjindujinna ndichja ngayeje? Ngu, ¿ñá= kikja'anire kjuankjinkakun ko kjua'ñubiu? 57Kui kjua kuach'onire ngat'are kui. Tunga Jesús kitsure: ―Tuñañu 'yakun jngu profeta, tunga ña nangire fa 'ba ña ndaba, tu'yá bekun. 58'Ba bi nkjin kjuakun kitsa'en Jesús kio, ngat'a bi kuakjainre ngat'are kui xuta xi tjin kio.

will be added

X\